【點解日日都賣晒??】玫瑰花棗皇糕, 抵過食珍寶珠

UNCLE FONG 有朵玫瑰花(金絲棗皇糕)!! $10四粒甜品...超抵喎.

最近, SY每晚沖完涼一定會叫:「今晚有咩甜品食呀?」...卒之手瘦腳瘦, 但就煉成一個大肚腩.

對付甜品怪, 最好買健康少少, 食完又不太罪惡的甜品, 於是我鎖定玫瑰花做目標.

前日, 問太子分店店員, 對方回答:「賣晒! (聽日我幾點過嚟會有呢?), 唔知」...昨日, 我又問同一店員:「賣晒, 無再返貨, 唔知幾時再返」

心諗:「車!好巴閉咩? 我去九龍灣分店, 唔鬼幫襯你」, 結果, 14:15趕到九龍灣, 終於買到最後8粒玫瑰糕.

姨姨好好人:「4粒熱你可以即刻食, 4粒凍, 你唔好叮, 一定要蒸先好食」

熟的4粒, 我與同事分享, 同事K:「唔...好香喎, 不過就係得個香字囉」, 同事H接口:「係呀!好重紅棗味, 都幾好, 唔算太甜」

我答:「算啦...當支玫瑰花呃吓Like, 十蚊有四粒, 真係抵食過珍寶珠, 煙煙韌韌幾啱我胃口喎」

回家將其餘的蒸熱, 我將玫瑰金絲棗糕遞給SY:「你今晚嘅甜品呀!」

大叫「花花好靚呀」的SY一邊食一邊說:「好食喎, 好似彈弓, 爸爸你食唔食呀? (我:你食啦..我食咗啦), 咁我食3粒, 媽媽食一粒啦」

難怪甜品怪的肚腩愈來愈大啦!

大仁生活facebook