【食好西九龍】韓男用心煮 @ 窮食真‧韓式套餐

如果不是朋友約我, 我一定不會到西九龍中心搵食. 心諗:「唔係呀? 乜樓上都有好嘢食咩?」

今日一走上8樓，我簡直大開眼界:「嘩！乜E度變到咁多檔嘢食, 我上次應該十年前上嚟, FoodCourt好似唔係咁」

朋友C:「前年改建咗, E家個FoodCourt好多正嘢食㗎, E間韓國嘢，真係韓國人開，佢嗰D紫菜卷超正」

Full House的朴老闆略懂中文, 我向他請教:「你最推介我食咩好呢？」

笑容帶有少少尷尬的朴老闆答:「抄年糕, 紫菜包飯, 都幾好...不過其實我都唔係好識」

(點解你會嚟咗香港嘅?) 朴老闆:「十年前, 因為姐姐嚟香港結婚, 咁我又跟嚟, 今年5月就十年啦, 我係E度都開舖都差唔多6年」

老闆推介的炒年糕($28), 醬汁甜甜酸酸中帶少辣, 配合軟軟硬硬, 煙煙韌韌的年糕, 絕非浪得虛名.

而且還付有半隻蛋, 不過, 之後再來一碗炸年糕($17), 份量少一點, 但皮帶少少脆, 多一層口感, 正好多。

（點解炸年糕仲好食, 但仲平D嘅?）朴老闆:「因為炒年糕嘅醬好難整...好貴, 炸就無蛋, 又無醬, 份量少D, 所以平」

套餐包半份紫菜卷, 暖暖的紫菜包飯, 即叫即包...最攪笑, 付款後, 老板會交一張明星卡給你...

我奇怪:「E隊係咩人? (GOT7呀), 多謝喇, 我唔要啦, 我都唔鍾意韓國明星」

朴老闆:「唔係送畀你, 你一陣攞嘢食畀返我」(哦!籌嚟嘅...我仲以為送畀我做乜鬼).

每份套餐, 都有兩盒小前菜. $29-$40的套餐, 有前菜, 有茶, 出色舒適超級超值.

老實說, 一般韓式包餅用料也是紅蘿蔔, 青瓜, 醃蘿蔔, 火腿, 蛋之類, 但老闆就在你面前製作, 誠意可加, 我鍾意, 堅有人情味.

其實, 我們還同時點了泡菜豬肉, 燉牛肉, 泡菜煎餅, 朋友說:「老闆無推介你就唔好叫啦...(係囉, 我下次醒目D囉)」

泡菜煎餅也算合格, 可能我比較鍾意質感多少少, 最重要減多一點油, 也不錯啦.

起碼朴老闆不太明白的時間, 也願意用Google 翻譯作溝通. 不過, 點解他鍾情GOT7, 我則聽極也不明白原因...莫非隊員其中一人是他的親戚??

浪漫滿屋 (深水埗)
深水埗欽州街37號西九龍中心8樓美食廣場32號舖


大仁生活facebook