UNIQLO $39限量福袋!! 排2個鐘為慳$261？

UNIQLO一早強力宣傳由今日起, 一連三日全港21間分店以$39元賣88個內值$300元的福袋, 今天放假預計會逛銅鑼灣, 所以也想襯襯熱鬧.

今朝早上10時聽收音機, 陸叔說Uniqlo母公司日本迅銷(06288)上市, 高開26%. (但後來最終也只微升1%收市), 哦!原來Uniqlo慶祝上市, 所以舉行限量福袋活動.

(註:圖片來源:Uniqlo官網, Utravel及Madsoda)

可惜, 早上10時45分到官方Facebook看到網友已留言說所有福袋已售罄, 大家不用排隊. 有點失望, 所以最後也作了一個午睡才過銅鑼灣.

下午走到銅鑼灣利舞台旗艦店, 剛巧有一名女顧客向店員查詢福袋情況, 女店員解釋 :「我哋會分男裝, 女裝, 而且男女裝都再有大, 中, 細碼. 」 我問:「如果我聽日嚟排隊要幾點度呢?」店員答:「今朝最早8點已經有人企係門口, 到9點幾就差唔多有180人, 所以, 今日我哋10點3就開門畀大家入嚟買福袋.」

吓! 8時就已經開始排隊 ? 就算是首賣iPhone6我也絶對不會這樣做吧. 從網上由 http://www.madsoda.com/madnews/ 及http://www.utravel.com.hk/ 拍攝得到的福袋開封圖所見, 每個福袋內均有3-4件貨品, 一般也是1對襪配2件2件短袖Tee,再加一件內衣.

(註:圖片來源 Utravel及Madsoda)

老實說, 如果不用排隊, 花$39元當買3件睡衣也不錯, 但是為甚麼會有人願意花2小時, 目的只為了節省$261元(即$300元減$39元)呢 ? UNIQLO估計不會升值的吧 ? 況且款式也未必一定合心水. 其實, 明天我返工前是否應該走去店舖前看看究竟排隊的是香港人, 國內人, 還是受僱的南亞裔人呢 ?

PS: 官網晚上7時發出特別通告, 說福袋反應熱烈, 明天及後天店舖將會提早營業, 這也算是避免混亂的一個好安排.

Facebook : https://www.facebook.com/hayakutang

万豚屋奇蹟!! 竟然唔駛等位!! @尖沙嘴 豬手烏冬強烈推介

起碼4年沒有光顧万豚屋，主要原因怕太多人，上次在門外排隊也等了個多小時，年初四晚致電，店員竟然說：「有位，E家出面無人排隊…」即是坐車過去開餐。

（望一望日曆，今日正正是農曆二月初五，霎眼間又過了一個月，原來我把這篇文章擱置了30日，老人痴呆的我是否愈來愈嚴重呢？）

走進万豚屋，我問店員還有沒有豬手，她答：「小食的醬油豬手已經賣晒，跟烏冬的還剩一份」本來想點兩碗，唯有一碗改豬軟骨吧。

未到10分鐘，盛在石頭窩內燒得滾滾燙的湯烏冬先上檯，「卜轆卜轆」起著泡冒著煙，熱力迫人。我問店員為何今晚的豬手如此旺場，「差不多啦，每晚大約8點就會賣晒架㕸，可能午市無得食，晚市人人都點掛。」

烏冬上舖滿菜苗，煙煙韌韌的烏冬，配上粟米，肉片及半熟雞蛋，4年如一日的好味道。之後豬手來了，真的不能說笑，豬手已去骨，皮肉之間的肥膏不太多，炆得又腍又惹味。正！

另外，朋友點的豬軟軟骨一樣煮得可以一啖一口的嚼嚼嚼，因為中間的軟骨已經弄得完全軟化，感覺就如在豬肉一樣。

另外我們還點了大大碗的蟹秄蟹肉沙律，炸豬扒，日式煎餃子及南瓜天婦羅，不過一與烏冬及豬手相比，當然則變得平平無奇。

當日，新正頭年初四，店員在我們臨走前對小朋友說:「攞啲糖食啦，新年快樂,，快高長大呀小朋友。」這位女店員真的很熱心，又肯推介那款菜色好食, 那款比較普通，態度一流。

好奇的我問店員現在是否不用再排隊輪候呢？她笑笑口：「唔係呀！每日都要排架，可能啲人唔知我哋今日開，以為年初五先開，所以今日先至唔駛排隊咋。」哦! 原來如此!!

Facebook : https://www.facebook.com/hayakutang

排隊啦!! 民豐湯圓滑嘟嘟 @荃灣街市街

話說一個月前到荃灣，經過街市街小巴站對面，發現有一條人龍，基於事事關心精神，我走到人龍中向一位姨姨打聽是否有著數呢？姨姨答：「排隊買湯丸呀！（堂食定要返屋企煮架？）一盒盒買返去，梗係要煮先可以有得食啦！」當日有事忙，不想拿著湯丸四圍逛，於是擱置了排隊購買的打算。

  

前天，又經過荃灣，又是經過街市街民豐，人龍又再圍著店前，今晚扚起心肝自己也走入人龍中排隊買湯丸。

人龍有分開排隊買即煎韮菜餅，如果買湯圓的又是另一條隊，店舖的右手邊有兩位女店員忙碌的在搓湯圓，我只愛吃甜味，所以我問可否花生，蔴蓉，豆沙三併呢？

 

  

店員說：「唔得，只可以駌鴦雙併。」於是我選了花生配豆沙，$25元25粒。店員說：「一定要打平放，今日唔食就放入冰格，最好三日內食啦。」

付款後，我才發現原來有不少客人也選購雲吞及水餃，山長水遠來到荃灣，沒有理由只買湯圓，於是白菜水餃，白菜雲吞各買一盒，即叫即包，民豐的收銀櫃後正正就是一個即製工場，大玻璃窗完全可以讓客人看穿食品的製作過程。不過是否今天人手不足或是其他原因，差不多大部份顧客付款後也要企在一旁等「收貨」。

 

民豐還有生麵，烏冬，糯米糍，茶粿，粽，不過今天的河粉經己售馨。看來我要多來一次，如果要試盡其他美食。

回家第一時間煮湯圓，細細粒的湯圓，花生及豆沙餡也不太甜，外皮煙煙靭靭，不算太厚，25粒五個人分享，每人五粒感覺剛剛好，阿囝說：「好食，紅紅黑色（豆沙）好食過黃黃色個粒。」阿太說：「真係好香喎，好新鮮味道，真係好食過我哋平時買百佳嗰啲喎。」

第二晚，我們三人再將餘下的15隻雲吞及15隻水餃煮作晚餐，雖然放入了冰格一整晚，但比較往常吃慣的「灣仔碼頭」好食得多，香噴噴而且食得出箇中肉甜的感覺，如果只計重量級肉餡，民豐贏晒。

老實說，民豐的餃子肉餡絕對可以與荔枝角道的「美味」相比較，她們的雲吞正正就是我小朋友時代吃慣的老實雲吞的味道，不過可惜的是略嫌民豐的水餃皮及雲吞皮也比較厚。奇怪！她們有獨立出售自家的水餃皮及雲吞皮，莫非有人天生為厚皮控？ 

PS：店內牆上貼了一張UMagazine的剪報，原來民豐已有60年歷史，最有趣是兩位台灣姐妹，分別於70年代先後嫁了給民豐的兩位太子爺，真的親上加親。

Facebook : https://www.facebook.com/hayakutang

毛毛雨的第十屆大角咀廟會之「表妹係邊度？」@ 福全街

2014年3月2日 (星期日) 第十屆 大角咀廟會，這個每年3月例必封了大角咀福全街、合桃街、菩提街、杉樹街等舉行的大型街頭文化祭又來了。

今年阿太與阿囝是第二次正式實地參與，從前阿囝未出世，我們拍拖曾經經過過，又有一年偶然發現巡遊，又停下來玩了一回，今次阿太應該算是第五年見証廟會，而我今年則需要開工，唉！無緣參與，只可以靠阿太拍下來的照片，感受氣氛。

其實，我覺得廟會絕對與大角咀非常配合，推廣中國傳統藝術，振興這個仍然還美麗的街坊地區，福全街早上巡遊表演，晚上千人盤菜宴，廟會真的過癮。(老實說感覺絶對似足日本鄉效的文化祭!!)

 我家阿囝十分迷戀舞龍獅，阿太說：「下午3點幾去到，已經人山人海，大鑼大鼓，阿囝就好興奮話抱我睇，抱我睇，舞龍獅啦!! 好野!! 」

「不過其實前面全部都係人，我哋淨係望到人頭，同幾隻獅子囉，不過阿囝話要睇，咁我哋就睇多一弓陣，舞獅都完，本來我哋諗住走去玩攤位遊戲，但係忽然間見到有兩隻獅子仔走埋嚟喎，周圍啲街坊話小朋友摸吓啲獅子頭啦，一年都會好運架」沒有錯，從照片看到小朋友們及阿囝真的很聽街坊提點，個個自動自覺不停摸獅頭不得止，獅尾也不放過呢！

本來今天還有木偶飄色，梅花樁表演，不過時間不配合，特派記者應該看不到這精彩表演。

晚上放工回家，當我一打開門口，阿囝即時遞上廟會攤位遊戲的戰利品：「爸爸！你睇我頭先睇完舞龍獅玩遊戲贏到啲壞蛋獎門人間尺幾靚！仲有媽媽得到E個叫平安繩喎！」

阿太說：「好多有心團體擺攤位活動，又送米，又送紀念品，好多人排隊玩嘅。」

阿太笑笑口對我說：「本來我哋玩完攤位遊戲之後，過咗隔離公園仔玩瀡滑梯, 點知有個女人走嚟問我表妹係邊度？…… 吓！我心諗係米認錯我係佢親戚呀？點知佢又再大聲問多兩次表妹係邊度？……原來, 佢想講廟會係邊度。」嘩！猜不到阿太也學了歡樂今宵盧DAVID，及阮兆祥當上GAG王之王吧！

Facebook : https://www.facebook.com/hayakutang

在葵涌影的行貨花

天氣凍凍熱熱凍又熱，真的很難適應，結果，捱到第一次，第二次轉天氣最終病了。走到醫院，坐著呆等，悶得發慌，可能坐在醫院一等就要等上數小時，於是決定四周圍走走解解悶。 

剛才坐專線小巴時，經過荔景山道，發現接近醫院宿舍附近，竟然有幾棵紫荊花樹，我從來不愛影花，不過，在醫院等候時間實在太無聊，根本做任何一件事也比等更有意義，於是就發生了我人生第一次影「行貨花」的事情！

因為沒有帶相機，所以全程只是用我部NOTE3拍攝。 陪同朋友說：「E啲花都好影嘅？你慢慢影喇，我上去CANTEEN坐吓好過。」

粉紅色，白色，紅色的幾棵盛開的大樹主要集中於宿舍的右手邊。

如果再往前行，轉入醫院，在斜坡的小草地上，零叮的小花叢內一樣有鮮花綻放。

春天的小蜜蜂真努力，左走右走採花蜜，無聊的人在看勤力的人在工作。

東奔西跑為搵食，有時呆等一樣為搵食，如果，兩者揀其一，我情願選擇後者，所以，我也十分感恩。

百無聊賴賞賞花，好過又忙又要被人媽。

Facebook : https://www.facebook.com/hayakutang

罐頭當LEGO 砌隻米奇老鼠出嚟都得@奧海城x惜食堂 第二屆「愛心罐香港」

罐頭可以當LEGO般砌出天星小輪，砌成一個手袋，砌一隻咖啡杯？從來沒有想過可以，所以一聽到消息即時走到奧海城看看是一項怎樣的比賽。

原來，這已經是「惜食堂」連續第二年舉辦的「愛心罐香港」比賽，不過後知後覺的我，不知道原來比賽已於上周末現場舉行完畢，現在只剩下11件巨型罐頭留於奧海城展覽。

現在還有工作人員在修補展品，他正忙著為「地球」貼上「陸地」。工作人員說:「罐頭就代表海洋，公仔麵就係陸地，細細個E個就係澳洲。」

原來這些全部也是真的罐頭，當展覽完成後就會將5萬個罐頭全部送去食物銀行及慈善機構，頗有意義的活動。

今次的展覽大部份也一看便知道正在砌甚麼，例如獲獎的「天星小輪」及「寄出愛郵筒」。罐頭郵局清一式綠色及加入大量郵件，所以一看便知道，不用左猜右想。

不過，有部份展品並不易看，例如，這隻稱為龜的作品，真的要看了介紹，再細心找個角度才勉強感覺到有隻小龜正破蛋而出。

龜仔旁邊又是另一隻龜，不過，這是前排鬧得滿城風雨的海天堂龜零膏。老實說，我左看右看也不知道他們在砌甚麼，只知道展覽完成後，捐出去給人吃的龜零膏會不會有發霉發臭呢？ 如果送給我也未知是否敢吃。

雪糕車製作得有點矮，看似私家車多於一輛雪糕車，而今次自己覺得最有趣的展品，一定就是站在奶茶杯的米奇老鼠。

走得太近，你會看不清楚是米奇，不過，如果你走遠一點，或者是隔著手機拍照，米奇的「得戚」臉貌就會即時呈現眼前。正！！

Facebook : https://www.facebook.com/hayakutang

「大隻佬」雲吞麵 返嚟啦!! 黑布街重此有翻生氣

半年前, 7月29日, 大隻佬雲吞麵( 龍記麵家)屹立於黑布街31年 光榮結業. 真的沒有想到7個月後的今天, 竟然傳來驚喜! 弟弟接捧, 「大隻佬」雲吞麵 返嚟啦!!

新店同樣就在黑布街, 正正就在舊舖位的對面, 重新包裝, 正式以「大隻佬」命名, 昨天至明天 (2月26日,27, 28日)試業3天, 3月1日正式開張大吉.

今次由 「大隻佬」龍哥的十弟「細哥」掌舵, 今天在店內不見龍哥, 換來五位大隻佬忙過不停. (其實, 接了龍記的小食店, 我最近一星期經過也見關上鐵閘, 不知是否又已結業呢 ?)

新店夠新式, 光鮮, 但就是少了龍記的那份懷舊及各大大小小的大隻佬海報, 不過, 當你一站在店門就可以聞得暖暖的麵香. 今晚我們夠幸運, 晚上7時半入場, 到7時50分, 大隻店員已經對門外等侯的人客說 :「唔好意思呀, 介唔介意聽日再嚟過呢 ?」八卦的我當然第一時間插嘴:「咁早休息嘅?」店員笑笑口:「啲野賣晒啦, 無野賣喇, E三日算係當壓力測試, 3月1號正式開舖應該會好啲架啦!! 」

蘋果介紹「新龍記」~大隻佬加入新口味豬肉丸、魚皮餃, 我當然要試, 阿太今晚點了一碗豉油炸醬撈河粉, 我們還要試試從前鎮店之寶辣牛筋及豬手.

食物一上檯, 即時傳來半年前吃過的香味, 阿太說:「炸醬撈好好味呀! 一啲都唔鹹喎, 真係同出面其他嗰啲唔同架喎」. 辣牛筋真的無得頂, 上次獨自到龍記, 以為很辣沒有吃, 嘩!! 原來只是小辣辣多多腍入味到不得了, 必食!!必食!!一食即上癮, 難怪有龍記熟客:「真係等半年都值得架, E種味道真係第二度食唔返!」

今晚店內大部份也是龍記的熟客,(汗顏的我只光顧過一次!!), 細哥本來於廚房內忙過不停, 但看到老朋友們也忍不住出來道謝 :「黎老闆, 點呀! KEEP唔KEEP到對面嘅味道呀 ? 」那位黎先生當然點頭並有傾有笑, 此時我拉了阿囝在細哥面前, 細哥看到阿囝, 微微彎彎腰說:「小朋友食得飽唔飽呀?」阿囝可能有點怕只是點點頭, 尷尷尬尬走到我身旁, 我問細哥可否合照, 細哥即時有善的蹲下身與阿囝一同合照. 並不停的說:「多謝晒!! 多謝晒!!」

「大隻佬」麵依舊與龍記的份量一樣「的的骰骰」, 不知是否太好味還是甚麼原因, 3-4口就吃完整碗麵, 真的不夠喉!! 不過, 因為今晚已經不能再加單, 唯有下次再來找細哥, 再來吃好味到不得了的辣牛筋吧!!

大隻佬麵家FACEBOOK:
https://www.facebook.com/pages/大隻佬麵家/658669670841548

蘋果日報 :
龍記翻生　改名大隻佬   十弟揸旗
http://hk.apple.nextmedia.com/news/art/20140227/18639401

大隻佬雲吞麵 龍記麵家@黑布街 結業了. 第一次=最後一次
http://www.utravel.com.hk/member-blog/qqlee2000/AD4RZxEgA3M/

Facebook : https://www.facebook.com/hayakutang