阿囝造曲奇 愛愛愛心心@無印MUJI Jam Sandwich Cookies

朋友知道我們一家最愛吃曲奇，前星期送了一盒無印MUJI的玻璃心心曲奇給我，滿心歡喜拿回家準備和阿囝一齊吃，誰知阿囝打開說：「爸爸！又話有曲奇食？無嘅？」

原來這是自製曲奇餅的材料，盒內只有2包大麵粉，2包小果醬，一個心型模型及一些小小的裝飾袋。於是我請阿太幫手造，阿太接過包裝看了之後說：「我哋屋企都無焗爐點做呀？」

當時心想：「哎呀！咁米浪費晒！微波爐可唔可以整嘅呢？」……本來事情就這樣擱置了，直至昨晚放工回來，阿囝和阿太親手遞上滿心心的玻璃曲奇，嘩！好靚呀！阿囝說：「我同舅父仔同媽媽一齊造畀你食架！」嘩!! 那一刻又驚喜，又感動。

原來阿太襯放假，帶阿囝回外家找經常鑽研咖啡及西餅的舅父仔幫手，一同造出這十多件玻璃心心曲奇。阿囝說：「媽媽以為打開個盒就可以做，唔係架，舅父仔仲要落街買牛油同牛奶架。」

我問阿囝你識得造蛋糕？阿囝答：「識！舅父仔將牛油同牛奶攪混，之後教我用手搓搓搓，然後要放入雪櫃架！」

阿囝問媽媽：「幾耐先攞返出嚟畀舅父仔切開一塊塊呀？（阿太：10分鐘）爸爸，凍十分鐘，舅父仔就用刀切細啲曲奇，切我就無份，不過，之後喺曲奇度用膠心心吸個心出嚟，就係我造嘅。」

我問：「咁之後就可以食未？」

阿囝：「未！梗係未，唔駛焗咩？曲奇同吸出嚟啲心心都要焗，果時啱啱做加菲貓，做到廣告舅父仔就話得，之後我米加啲橙同士多啤梨果醬喺曲奇個窿窿度，咁米食得囉！好簡單遮。」

阿太：「本嚟我哋諗緊駛唔駛係兩塊曲奇中間搽啲醬，原來唔駛架喎，啲曲奇一乾咗之後，底同面嗰塊就自己會黐埋一齊架喎。」

我致電多謝舅父仔，因為我知道其實他要處理自己的皮革生意好忙，今日還要被一老一嫩煩足半天，舅父仔笑笑：「因為屋企個焗爐太CHEAP，所以啲曲奇焗出嚟，有啲比較燶，有啲就OK，味道就無問題架啦！」

其實，不單止阿囝好開心，我也不捨得吃，阿囝送了兩塊給朋友吃時還大聲強調：「係我同舅父仔一齊做架，不過媽媽就負責影相比爸爸睇遮。」

Facebook :https://www.facebook.com/hayakutang

電腦肩救星唔駛搵必理痛止痛貼 12蚊店攪掂

經常用MOUSE，右手手腕一直痛，近幾年更開始一直痛上頸，所以經常要靠頭痛藥止痛，早前朋友見我頸痛，建議我去「AEON12蚊店」買支按摩棒，心想：「12蚊店都有好野？係真唔係呀？」昨晚經過信和，於是百無聊賴的我就走過對面馬路12蚊店逛逛。

電視廣告說必理痛止痛貼有效消除電腦肩，不過最麻煩的我又皮膚過敏不能貼這類鎮痛貼呢！

一上到時創興三樓，人山人海，找了一遍也找不到按摩棒，於是去問女店員，終於發現了原來有一堆按摩棒，朋友推介的是U形膠棒，女店員說:「另外一款軟身的更加好用架!」，我兩款也放上頸試試，U形的那款左右各有一個凸出部份，剛剛好可以按中我頸部最痛的位置，舒服！右手的麻痺也可以即時減輕。

 不過女店員推介的那款，則需要自己左右移動，可能我的頸背沒有衣服，所以左右拉動時綴著皮膚，不太舒適，最後，我決定買兩支U形棒，一支返工用，另一支則放在家用。付款時另一位女店員見我一邊按摩，一邊對阿太說:「真係幾好喎!!」，女店員竟然答我：「真係好用咩？（係喎！我長期頸痛，按左幾吓真係無咁痛咁喎！）咁我放工都要買返支！」

本來，我每日都要食一粒頭痛藥，這兩天也不用吃頭痛藥。哈！看來前晚買回來的6盒特強幸福止痛素，可以留回日後慢慢食。

PS：特強幸福止痛素又是另一朋友推介，價錢較必理痛更便宜，前天開始萬寧，屈臣氏售價竟然做特價，售價較出面藥房更便宜，我也掃了6盒。

Facebook : https://www.facebook.com/hayakutang

讓我數著年輪 這些年輪 好食得過癮@SOGO JUCHHEIM 年輪蛋糕

新正頭去親戚屋企拜年，走到銅鑼灣SOGO地庫，忽然見到Juchheim大廚在切牛扒一樣忙著在切年輪蛋糕，肚餓的阿囝看到大叫：「好想食呀！爸爸」。

隔著透明玻璃窗，看著大廚在切著切，加上開放式廚傳來烤蛋糕的香味，不過望到宣傳上要$1350元，有點卻步，於是問問店員售價，原來，年輪蛋糕分5款，可供50至70人用的原子彈大的才要賣過千，最便宜的只需$58元，本來新年限定有綠茶口味，但因為怕阿囝吃不慣，所以安全起見還是點了原味。

店員說：「因為最細SIZE 的牛油雞蛋味無真空密封，要3日內食完」飯前甜品，其實我一個人也可以KO，更何況今天8人共享，絕對無問題！

本來想買朱古力味，但新年停售，要之後每逢星期一至三才可購買，如果要買咖啡則只可以星期四至六才有售，其實又會限定得如此新穎呢!!

拿到大伯家，阿囝已急不及待的要打開年輪蛋糕來吃，他還要學利孝夫人進行切餅儀式，激死!! 

真的不要看小這年輪蛋糕，質感較所有港式蛋糕來得豐盛。一層一層薄薄軟軟的蛋糕，緊緻的貼在一起，如果我沒有數錯，應該一共有13層，蛋好香而且最正是不太甜，最外層加上糖霜，成為了最點綴的部份，好味道，好吃，好吃！

Facebook : https://www.facebook.com/hayakutang

「錢罌」我啱 @ 將軍澳中心 忍者小靈精Vs小雲 唐老鴨Vs米奇老鼠

上星期看報紙，忽然發現有老夫子，米奇老鼠懷舊錢罌介紹，原來文章正在宣傳將軍澳中心的一個歷代錢罌展，懷舊東西我最啱。

所以即使今日中午我要去荃灣，下午亦即時坐約一小時地鐵去將軍澳睇錢罌。

展覽主要分為三個展區，「古代系列」包括漢、唐、宋至滿清年間的瓷器錢罌。老實說，自己興趣不大，因為太傳統又沒有卡通人物，不過，拍照後，我開始有少少懷疑這些是否真的屬於標示的年代呢？因為明明有一個金豬錢罌，很明顯是為大會設計又有名人簽名，為何會列為「明朝」錢罌？

另一個展區就是本地銀行（渣打＋匯豐專區），這區吸引力大得多，不看不知道原來一直以來渣打銀行也愛送出迪士尼的卡通錢罌，單單是唐老鴨就已經有5款之多。

米奇老鼠，小飛象，前兩年一次以整個香港迪士尼也出了一次。匯豐早年送的銅製獅子我也擁有過，但1973年匯豐推的獅子點解樣子十足十獅頭嘜花生油呢 ?

展場中有一個最吸引我的就是一本60年代的紅簿仔，我望了很耐這本半開的紅簿仔，1960年這本紅簿仔的主人已經不時存入$100元，我還看到$500元的存款，嘩！50年前竟然可以第二頁已經有千多元的儲蓄，當年不知是否足夠當首期呢？

第三個展區就是我最感興趣的錢罌集體回憶，海洋公園的覽車，香港保險的兔仔，80年代成語動畫廊的熊貓博士及YY助手(是TVB出的嗎 ? )，家樂氐粟米片的老虎，還有可口可樂的積木錢罌，款款也熟口熟面。

因為早前J2重播了忍者小靈精，所以很多大朋友，小朋友一看到小靈精也叫得出他的名子，還有龍珠少年版悟空這些用瓷器製成的錢罌，大多數估計是香港出產的土炮貨。

而因為自己也有收藏一些日本企業物公仔膠錢罌，所以一看到住有銀行的軟膠叮噹，富士銀行的大空人，還有勸業銀行的小娃娃，不禁想到為甚麼收藏家楊維邦先生今次借出那麼少的日本系列錢罌呢 ?

今日很多父母也帶同小朋友來「睇錢罌」，而今日我一邊看展覽一邊聽得最多的就是：「哎呀！E隻錢罌我以前有架。」「爸爸以前有E隻獅子架，上次搬屋唔見咗！」他們爸爸的說話正正也是我的心聲，為何當年我會掉了匯豐的銅獅子和渣打的唐老鴨呢？

Facebook :https://www.facebook.com/hayakutang

粉嶺聯和墟重開啦!! 懷緬過去常陶醉 一半樂事 一半令人流淚

粉嶺聯和墟重開，蘋果日報說政府以每年以$1元租給民間團體3年，這座1951年建成的矮矮白色建築，今天重開，我和阿囝才有機會入內參觀，7年前看《每當變幻時》第一次接觸的「富貴墟」，今天終於可以正式來一個現實與電影場面的比較。

聯和墟在我心目中就是陳奕迅，楊芊華在電影裡的白色「富貴墟」，在粉嶺火車站門口乘52K專線小巴，請司機到聯和墟讓我們下車，後來發現同車一樣去聯和墟的乘客原來只需付分段收費的半價，哈！下次學識坐月子52K先按按半價鍵了。

車程大約5分鐘，小巴已經抵達聯興街，司機讓我們下車，我問一同下車的乘客聯和墟的位置，他答：「E度就係聯和墟啦，（乜聯和墟唔係拍戲白色矮矮個街市？），哦！你講嗰聯和市場停車場呀？直行轉右就係架啦。」哦！後來我才發現聯和墟是指聯和道、和豐街、聯發街、聯興街、聯盛街及聯昌街6條街及「粉嶺戲院」，真的大鄉里呢！


可能自己一聽見聯和墟重開就誤解為街市重開，原來重開三年，是有關團體自費翻新，重修市場，而政府甚麼也不用做，但就亦規定這三年只可舉辦環保回收、農墟及社區藝術活動。

大門工作人員叫著：「歡迎大家嚟到聯和墟街市，E度已經關閉咗十年架啦！大家可以到粉嶺戲院擺張戲飛，係街市入面搵出三個印章蓋上，就可以換到粉嶺歷史明信片一張」

 我問工作人員：「係米只有參觀？唔係重開街市有野賣呢？」友善的工作人員指指門口：「食完晏出面門口會有攤檔販賣一些手工藝及有機農作物，不過E家太早，佢哋未開。」因為當時只是11時多，門外只有一位賣環保袋的姨姨：「我本來係對面馬寶寶開，聽到E度免費擺，所以嚟試下，頭先我9點幾就到，原來其他人下晝先出嚟擺。」

聯和市場室內本來有60個檔位再加上現時用作停車場的二、三百個露天排檔，可以想你得到當年是何等的熱鬧。現在市場內模擬了當年粉嶺戲院售票的情況，阿囝以為真的有電影看就問我：「睇咩戲架爸爸？係米壞蛋奬門人？」

展覽還包括當年圍村風俗，舊式理髮店，蓋章式的當年茶樓的點心籠，一些團體的藝術品，還有一個生果店，第一眼我還以為是真的有生果出售，原來只是小情侶過來拍照留念。

原來每逢周末大會還會安排穿梭巴士及導賞團參觀大埔林村許願樹，可惜今天我們下午另有其他節目，所以唯有改周再來玩過，臨走前我請工作人員一同合照，她們說：「唔緊要啦，下次再嚟玩過啦！我哋到三月都有得玩嘅。」

今次到來的時間實在太少，未能真正細心欣賞街市當年的情懷及墟市風情。下次一定要再來及順路去許願樹走走。

PS：原來今日下午PLAYRIGHT會在聯和市場對面舉辦遊戲嘉年華，好想玩呵，記得知年前差不多時間，在中環我們也參與過PLAYRIGHT的一次嘉年嘩，唉！今次又再錯過機會，希望下次可以和PLAYRIGHT再玩吧！

Facebook : https://www.facebook.com/hayakutang

大埔林村許願樹許願蓮花行大運!! 第5年出馬!!

上回說到原來年初一到大埔林村許願樹，人潮較過往年初二，三少很多，行得輕鬆又舒服。

今年終於吃到恨足一年的珍姐豆腐花，果然沒有等錯，沒有吃錯，較昂坪360的三間山水豆腐花也更滑更香。吃飽飽之後我們就走到大會攤位購買許願桔和許願蓮花，今年沒有加價，價錢一樣是合共$50元。

 今年阿囝說要幫公公婆婆，爺爺嫲嫲一同許願，所以我們走到大會提供的檯慢慢寫上心願。今年阿囝較往年學懂更多生字，因此，他要求自己寫心願，阿囝一寫就寫足15分鐘，好彩今日人不多，沒有人催促。

我們先到許願池放蓮花，阿囝愛玩水，一聽到放蓮花開心得不得了。許願池十足一條迴轉壽司的輸送帶，我們在蓮花池開始位置許願及放下膠蓮花，之後就走到池的近尾段地方等待蓮花飄過來，阿囝不知多興奮，不停玩水不停大叫：「快啲嚟快啲嚟，E個唔係我哋嘅，唔係唔係，嚟啦！嚟啦！」

我們放了三次蓮花，但真的不明白，三次阿囝都玩得好雀躍，本來他還想玩第四次，但我說：「不如去拋許願樹啦！」，他點點頭，真的怕阿囝想放第四次蓮花呢！

因為，去年小朋友是騎著膊馬拋許願樹的，所以，今次一來到樹下，他已要求以同樣姿勢拋吉上樹，可能在較高的位置拋桔，阿囝今年拋兩次，許願桔就己經鐃鈎住樹枝，哈...YEAH!! 今年願望希望成真吧！

去年如果要跟印有林村許願樹字樣的大石頭合照，要付款$40大元，今年我們終於是可以自由和大石頭合照了，可能大會良心發現吧，而今年大會更特別提供兩檔拍照服務，分別可以與小獅子或假馬大鑼鼓合照，個人覺得那頭假馬太似「低俗喜劇」的驢仔阿嫂，還是有點戒心，所有沒有走近，老實說真的有點可怕。

其實今年已經是「第4屆香港許願節」，規模愈來愈大，（不過吸引得較往年更多國內人士入場，感覺不及以往的地道，看來林村之後也會被自由行攻陷）現場也漸漸變成如年宵一樣，又賣氫氣球，又撈金魚，又有花，又有玩具出售，打鼓拷鐘抱抱觀音塔，再來抽獎……老實說有點懷念當年純樸的許願情景。

下圖 (左) 是2009年布袋製的許願桔, (中) 2010年膠桔 初型, (右2棵) 2013及今年的膠桔，有葉的，像真度極高，連續兩年的桔也是一樣，看來這款桔已經會沿用下去了。大家可留意到連願望紙也變得更"方便", 許願也來multiple choice, 更合懶人一族.

Facebook : https://www.facebook.com/hayakutang

大年初一大埔林村許願樹行大運!! 好運好運唔多人!!

「桂林夜巿」深水埗農曆新年掃街夠過癮!! 一年一度熱鬧三晚可以接受!!

從前大約8-9年前, 每逢農曆年初一, 年初二, 旺角行人專區入夜後就會變身成街頭年宵市場, 又精品, 又美食, 應有盡有, 熱鬧非常. 但隨著行人專區的「藝術攤檔」興起, 近5-6年行人專區的新年夜市已經成為絶響. 改為捧出桂林街成為農曆新年的夜市皇.

經大前日蘋果日報報導後,「桂林街新年夜市　地道小吃重現 」桂林街更變得人山人海, 水洩不通, 蛇餅竟然可以由桂林街轉入福榮街, 並佔了半條馬路, 情況十分誇張. 不過, 今天報紙又講述「食環掃深水埗「桂林夜巿」 」, 最初還以為今晚「夜巿」被消失, 原來 食環只是黃昏努力一下, 最終還是保留了這個新年特色給我們作最後衝刺.

黃金電腦商場門外, 短短的一條桂林街, 兩邊聚滿約20檔的熟食小販, 近福華街街頭的3-4檔,主要由印巴藉朋友經營的燒烤食品, 及一檔本地檔主經營的炭烤肉串. 全部也吸引大批人龍.  其實, 燒烤檔不只得印巴藉朋友全部包辦, 本地朋友亦有經營, 不過, 不知是否味道問題, 或者外國風味特別萌, 所以蛇餅並沒有出現於本地燒烤攤檔上.

其實, 香港人真的很自律, 因為眼見桂林街上原來分別最少有6-7條人龍, 各自排隊等候心水美食, 最長人龍的依然是印巴燒烤, 八卦的我走上龍頭問問小情侶排了多久, 男朋友看看錶:「唔係等好耐咋喎!! 都係15分鐘度」. 反而等候最耐的就是位於近福榮街的臭豆腐及25元即叫即即蒸腸粉, 我問排隊的年青人, 是否等候需時, 年青人答:「原來都等咗差唔多半個鐘, 不過你玩下Facebook, 上吓網都唔係覺得等好耐遮」.

位於街中央的一檔出售油浸魚蛋的肥老闆十分攪笑, 大叫道:「我啲魚蛋好靚架, 畀粒你試吓你唔好出聲話比其他人知呀」他稱聲使用的並非一般麵粉及萬年油製成的魚蛋, 眼見$20元一碗白色細細粒的魚蛋, 初見還以為是鵪鶉蛋, 的確特別, 肥老闆很識做, 一見有人舉機, 即時擺出開心姿勢:「記得擺上Facebook同我宣傳下喎」, 哈!!哈!! 無問題啦.

街頭美食還有炸大腸, 炸蓮藕條, 鹵味, 印度薄餅, 牛油粟米等任君選擇, 最神在之筆就是於渣打提款機前有兩位美少女在出售$5元一杯的夏桑菊, 不得不讚她們的細心及醒目, 吃了一整街的煎炸熱毒食物, 當然要清熱一下吧!! 看來她們不愁沒有生意, 雖然現在還未有人龍出現於她們的檔出.

除了黃金商場這邊的桂林街有美食天堂外，近鴨寮街的另一端桂林街亦一樣有乾貨夜攤夜市供大家遊覽. 阿太說:「其實E邊只係將平時鴨寮街啲檔口推晒出路邊賣雜價攤遮!」今次她又好像說得沒錯, 尋寶勝地鴨寮街伸延至北河街街市.

不過, 這邊的東不是十分吸引, 放滿街道兩旁的都是舊電子產品, 遭人棄置的不完整東西, 最多就是DVD, VCD, 舊電話, 電話電池, 毛公仔, 陳年色情刊物. 當中阿太說:「你睇有個金色嘅BraBra喎!!」這不知是否登台用的呢 ? 另外, 本來還以為有人張多輛單車停泊於路邊, 原來是有檔主擺攤出售單車, 真的有點意外.

比較兩邊的桂林街, 可能鴨寮街本身平日也是出售相類似的東西, 所以我還是愛黃金商場那邊比較吸引, 因為平日少見接近20檔小食檔堆在一條短短的街道兩旁. 隨著農曆新年假期過去, 「桂林夜巿」 又要再等362才會再出現了.

Facebook : https://www.facebook.com/hayakutang