LOHAS 樂活博覽好玩到暈倒當場!! 認真得差點召白車!! 請保重

話說上周四至日會展有一個樂活展，因為我要返工，所以請阿太帶阿囝去玩。阿太問：「樂活係咩？」。

其實，「樂活」一詞在TIMABLE見得多，一直大約只知道是快樂享受健康生活，原來上網看才知LOHAS是英語Lifestyles of Health and Sustainability的縮寫。（LOHAS Park 等於臭臭的日出康城我就知。）

博覽主題是健康的吃喝玩樂，健康食品一大堆，我最愛飲薑茶，現場試飲蘋果醋，阿囝竟然意想不到的說好味道，所以又買了回家。

因為上次我們到元朗農場鮮奶有限公司，阿囝餵羊餵得十分高興，所以我以為今次展覽會有大量推介本港有機農場的活動。不過原來，展場主力以推廣台灣的農場之旅為主。

不過，展場有小丑扭波波，又有魔術表演，最重要有小手工，阿囝回來即時給我看那個彩沙匙扣。阿太說：「台灣人真係零舎好人，香港排隊個攤位理得你死，台灣人會不時走出嚟講唔好意思，又畀茶我哋飲，到再排多一陣又話唔好意思，又送一啲小禮物比阿囝」

健康展覽遇上一位不健康的媽媽，這位不吃午飯的媽媽拖著阿囝入場館，因為人流太多，加上又抵不住美酒試飲，她對我說：「台灣試飲唔似香港得一啖，竟然畀我一大杯，無理由唔飲晒啦，無禮貌⋯⋯，我飲咗一杯，就眼前一黑，暈咗係地上。」

我問阿囝：「媽媽暈嗰陣你知唔知？」阿囝：「唔知道呀，我睇緊魔術！」暈倒地上的媽媽繼續：「好彩旁邊有啲好心人又同我搽白花油，又畀朱古力同熱茶我飲，又叫人讓開，又幫我撥扇，有人仲問我要唔要CALL白車。」

暈到的媽媽後來沒事，坐在椅子上望著阿囝睇表演，休息一回又精神爽利的在場逛著綠色健康生活項目。今次真的要多謝在場的有心人出手相助，仗義相救，另外，希望這位媽媽不要再每晚玩CANDY玩到凌晨2點吧。

PS：阿太我沒有說誰人暈倒地上，無人知道是誰的請放心。

Facebook : https://www.facebook.com/hayakutang

傳說中神級上海生煎包 @荃灣祥興記 湯汁爆滿的包

偶然經過荃灣川龍街，忽然嗅得陣陣肉香，望一望麥當奴對面十字路口，原來開了一間祥興記上海生煎包，廚房是全玻璃窗設計，通透的可以看足4-5位師傅製作生煎包的過程，一邊看一邊口水已經不停流出來。

下午4時左右，大門有等候外賣的人龍，又有食客急不及待在店前即食香噴噴和熱辣辣的生煎包。太正了！！再望望廚房內多名師傅在造皮，包餡，再放入大大平底鑊，加水後，原來還要不停轉動大鑊的，嘩！出爐的生煎包熱騰騰，脹卜卜，不用多說，即時購票入店進食。

店舖不大，老實說坐得擠迫並不舒適，兩邊均為自閉位，我坐在中央的長檯，大動作一點也會碰到隔離食客，與面對面不認識的食客才隔30厘米，坐得太近真的有點尶尬。店內其中一幅牆扮成紅磚舖成，並且掛上十數中幅上海食店的照片，算是等食時的唯一消遣，不過祥興記地方細細，但鮮汁肉味卻3D式包圍全店，真的愈等愈肚餓。

這裡主打生煎包，但還有粉絲湯，不過今次我吃的上海雙檔，由百頁包菜餡放湯配粉絲，唔～下次再來祥興記不用多想，一定只點生煎包就夠了。

大約3-4分鐘，一客四個的主角終於上檯了，生煎包體積較糯米滋大一點，包頂洒滿芝麻，還有輕輕的香䓤點綴，底部打摺部份煎得金黃色，因為看到其他食客大啖咬入生煎包後，即時被包內湯汁燙傷口腔，所以我先輕輕咬開一個小孔，嘩！包內澎湃的湯汁即時溢出，嘩！嘩！又甜又香的肉湯，不用多說，先一口喝下去吧，正到不得了。

其時，對面食客的生煎包也送到檯上，女食客說：「好喇！等我哋試下傳說中的生煎包啦！」（原來這𥚃級數己達傳說級！勁）「嘩！好多汁呀，好脆呀個底，啲皮好薄，豬肉都幾鮮喎！」她的朋友答：「係幾好食，不過啲湯鹹咗啲！⋯⋯好彩我哋叫咗個粉絲湯，飲返啲粉絲湯無咁鹹」

其實，我大部份認同她們的說法，除了對生煎包過鹹的說法，反而我覺得肉質鮮嫩兼帶點點肥肉，不會是碎肉碎肉混合而成，夠入味，味道剛剛好，如果下次來應該配老上海烏梅汁一定會更加好味。

同場有食客說：「咁快又加價，幾個月前嚟食先係買$23蚊4隻，咁快就加$5蚊」我本來生煎包只有油麻地OSCAR的出色，原來現在又發掘多一間，我想我會短期內再來，即使$28元4隻我也覺得超值。

Facebook : https://www.facebook.com/hayakutang

尖沙嘴SOGO結業了 ~ 時光逆轉17年前的小熊國及名店城

前年在尖沙嘴文化中心工作，整整一年幾乎天天也經過SOGO，雖然不是經常購物，但也算出相入對。SOGO忽然結業又未至於失望，少少不捨得吧！

 尖沙嘴SOGO，2005年9月30日開幕，計一計差不多9年，感覺好像開了不久久似的。不過其實我也有對這間SOGO有些失望，因為沒有家品部，電器，玩具及雜誌部，超級市場規模也比較細，沒有濕貨出售。

記得SOGO未開之前，2002年這裡名為「亞馬遜商場」的小熊國，不過沙士前要收費入場，後來經濟不景就變為免費，印象中這裡曾扮成好大自然、好森林的地方，因為自己不太愛BearBear，所乆我好像也只是去逛過2－3次左右。

(而翻查資料，現址未變身成小熊國之前，1997年開始17年前此處稱之為名店城。)

我真的以為SOGO是2月尾結業的，今天想走到尖沙嘴鐘樓看情人節花燈會，吓！原來SOGO已經於2月12日星期三光榮引退了。

其實，未到SOGO前，我也奇怪為何地鐵J出口沒有了SOGO的指示呢？原來地鐵公司一早已快快手把商戶的名稱抺掉，行動迅速得有如商台無理解僱李慧玲一樣。

今日店員作最後執捨後，臨離開前對護衛員說：「明哥，CHECK下嗰袋先啦，最後一DAY啦！真係拜拜啦」護衛搖搖頭揮揮手：「走啦！得架喇！再見啦！」就這樣最後一批SOGO員工就告別了。

註: 小熊國及名店城圖片來資 : www.kktravel.com.tw 及 維基百科用戶-Wing1990hk

Facebook : https://www.facebook.com/hayakutang

情人節變身金田一逃出密室@銅鑼灣

早前朋友說：「上次去玩逃出密室勁正！（好驚架喎！好似海洋公園哈佬喂嗰啲就真係米攪我？！）一啲都唔驚架，考智力，推理解謎，十足金田一咁架」一提及金田一，我即時上網找資料及訂位，昨日情人節前夕，兩公婆齊齊接受考驗，走到銅鑼灣勿地臣街逃出密室。

預約時間下午2點，我們走到密室大樓，嘩！樓梯，牆壁已經設計得氣氛十足，大門還上了大閘，暗暗沉沉，心想：「撳鐘後電動閘門打開，會不會有個鐘樓駝俠走出來開門呢？」誰知我真的想多了，工作人員只是遲我們20秒從樓梯步行上來，他只是有事遲了少少回來開閘而且。（少少失望）

工作人員LAWANCE：「你哋係咪第一次玩呀？我哋有三層，暫時有三個密室，最難係（阿爾卡特拉斯）我就唔建議第一次嚟嘅人玩，（出埃及記）要上樓梯嘅，不如玩（伽斯底里奧內）關係十二生肖。」

阿太擔心問：「係咪真係無人跳出嚟嚇我哋架？」LAWANCE：「放心！我哋係玩科技，玩機關，十二生肖大約有3關半密室，全部都係考推理，但你哋只有45分鐘破解所以機關咋！」

我又八卦問：「通常有幾多人可以少過45分鐘走返出嚟呢？」LAWANCE：「100組人大約10組人可以成功跳返出嚟！」吓！10份1的成功比率如此低？ 我心情即時由輕輕鬆鬆變得緊張。

我們首先將手提袋放入Locker，之後LAWANCE給了我們每人一個電筒，再按動計時器，我們的密室考驗立刻開始。不過，因為密室內不准拍照，所以，未能為大家解謎……..。

我可以說約30呎的暗黑密室當中，就算找出了提示，但也要去應付相關的機關，其實並非1+1=2般的簡單。例如明明看到上了鎖的櫃內有可用物件，但偏偏打不開鎖頭，首先我唯有夾硬的把櫃內公事包拉出來，哈哈！好彩的我又真的成功，不過，原來任務是一定要打開木櫃的。我為何會知道呢？因為LAWANCE從外叫咪：「你一定要開鎖先可以過關架！唔可以夾梗抽出嚟架！」

最終我們用了20分鐘才能通過第一關，之後經過走廊，走到第二關，哈哈！一個密碼夾萬，縱使我們猜中了密碼為4位數字，但怎也撞不中0-9的組合，結果，我們走來走去，45分鐘就這樣過去了，鬧鐘響起，我們失敗了！

心有不甘的我問LAWANCE夾萬密碼，他答：「其實你可以叫咪問我哋攞貼士架！（吓！可以嘅咩？）當然可以，不過，我以為你哋想自己解謎，所以無比貼士你，因為真係有參加者唔鍾意人幫架。」

我們出來後，另外一組預約了3時的5人團體就即時接著闖入十二生肖機關挑戰45分鐘。記得剛才第一關大約有5個謎團，我們兩個人，你想少少，我想少少，當成功破解所有機關，大火爐自動打開時，心情真的非常興奮。

我問LAWANCE有沒有限人數的呢？因為人愈多，應該愈快可以破關，LAWANCE：「最多7個人，最少2個人，（吓？唔可以一個人玩架？），因為怕一個人困在暗黑環境，始終唔係咁好。（我想下次帶埋我小朋友嚟再闖12生肖，因為E家好唔甘心！），小朋友有你哋睇住都可以玩，如果下次你哋玩返同一密室，我吔只係收半價架咋！（正喎！）」

我已經決定下次約埋朋友帶埋阿囝，快快再破十二生肖密室，因為現在我的心情十足打機過不到關，但又不能立刻按「繼續」鍵，無得玩心癢非常。我要快快再來挑機！十二生肖你等我來破解你啦！

Facebook : https://www.facebook.com/hayakutang

情人節免費的浪漫@尖沙嘴文化中心綵燈會

今日是元宵情人節, 尖沙咀鐘樓文化中心旁有元宵晚會, 哈!! 為何我會知道呢 ?因為我以為綵燈晚會連續多晚舉行, 昨晚已經走了去拍照, 原來一切更精彩今晚2月14才有得玩.

雖然, 攤位表演, 樂隊演唱, 舞金龍等今晚才有得欣賞, 但靚爆的綵燈裝置整個月也長期亮著任看.

「LOVE」非常熟悉的LOGO, 東京新宿電車男等愛瑪仕的地方, 台北101大樓的地標, 紐約第57街一樣有「LOVE」.當然他人的是雕塑品, 今次鐘樓的是綵燈裝置

這個綵燈展命名為《情意漫遊》, 用不同地方的結婚儀式做主題, 有傳統的中國「迎親」, 歐洲皇室婚禮, (其實我覺得似凱特和威廉王子多一點), 日本和服及韓國大長金, 當然還有最公式的婚紗與禮服.

看宣傳單張, 今晚還有猜燈謎環節, 題目會不會貼滿在這所2個人高度的大花燈上就不得而知, 不過, 最重要答對會不會有禮物呢 ? 如果每答對一條就可獲贈鮮花一支也不錯吧!

雖然今晚「Pre情人節」天氣只有8度, 但很奇怪的走到這浪漫「爆燈」的鐘樓底竟然真的不覺凍, 可能幾千甚至上萬棵燈泡照亮著的原故, 又或是我感染了現場各情侶們的愛的力量呢 ?

Facebook : https://www.facebook.com/hayakutang

阿囝造曲奇 愛愛愛心心@無印MUJI Jam Sandwich Cookies

朋友知道我們一家最愛吃曲奇，前星期送了一盒無印MUJI的玻璃心心曲奇給我，滿心歡喜拿回家準備和阿囝一齊吃，誰知阿囝打開說：「爸爸！又話有曲奇食？無嘅？」

原來這是自製曲奇餅的材料，盒內只有2包大麵粉，2包小果醬，一個心型模型及一些小小的裝飾袋。於是我請阿太幫手造，阿太接過包裝看了之後說：「我哋屋企都無焗爐點做呀？」

當時心想：「哎呀！咁米浪費晒！微波爐可唔可以整嘅呢？」……本來事情就這樣擱置了，直至昨晚放工回來，阿囝和阿太親手遞上滿心心的玻璃曲奇，嘩！好靚呀！阿囝說：「我同舅父仔同媽媽一齊造畀你食架！」嘩!! 那一刻又驚喜，又感動。

原來阿太襯放假，帶阿囝回外家找經常鑽研咖啡及西餅的舅父仔幫手，一同造出這十多件玻璃心心曲奇。阿囝說：「媽媽以為打開個盒就可以做，唔係架，舅父仔仲要落街買牛油同牛奶架。」

我問阿囝你識得造蛋糕？阿囝答：「識！舅父仔將牛油同牛奶攪混，之後教我用手搓搓搓，然後要放入雪櫃架！」

阿囝問媽媽：「幾耐先攞返出嚟畀舅父仔切開一塊塊呀？（阿太：10分鐘）爸爸，凍十分鐘，舅父仔就用刀切細啲曲奇，切我就無份，不過，之後喺曲奇度用膠心心吸個心出嚟，就係我造嘅。」

我問：「咁之後就可以食未？」

阿囝：「未！梗係未，唔駛焗咩？曲奇同吸出嚟啲心心都要焗，果時啱啱做加菲貓，做到廣告舅父仔就話得，之後我米加啲橙同士多啤梨果醬喺曲奇個窿窿度，咁米食得囉！好簡單遮。」

阿太：「本嚟我哋諗緊駛唔駛係兩塊曲奇中間搽啲醬，原來唔駛架喎，啲曲奇一乾咗之後，底同面嗰塊就自己會黐埋一齊架喎。」

我致電多謝舅父仔，因為我知道其實他要處理自己的皮革生意好忙，今日還要被一老一嫩煩足半天，舅父仔笑笑：「因為屋企個焗爐太CHEAP，所以啲曲奇焗出嚟，有啲比較燶，有啲就OK，味道就無問題架啦！」

其實，不單止阿囝好開心，我也不捨得吃，阿囝送了兩塊給朋友吃時還大聲強調：「係我同舅父仔一齊做架，不過媽媽就負責影相比爸爸睇遮。」

Facebook :https://www.facebook.com/hayakutang

電腦肩救星唔駛搵必理痛止痛貼 12蚊店攪掂

經常用MOUSE，右手手腕一直痛，近幾年更開始一直痛上頸，所以經常要靠頭痛藥止痛，早前朋友見我頸痛，建議我去「AEON12蚊店」買支按摩棒，心想：「12蚊店都有好野？係真唔係呀？」昨晚經過信和，於是百無聊賴的我就走過對面馬路12蚊店逛逛。

電視廣告說必理痛止痛貼有效消除電腦肩，不過最麻煩的我又皮膚過敏不能貼這類鎮痛貼呢！

一上到時創興三樓，人山人海，找了一遍也找不到按摩棒，於是去問女店員，終於發現了原來有一堆按摩棒，朋友推介的是U形膠棒，女店員說:「另外一款軟身的更加好用架!」，我兩款也放上頸試試，U形的那款左右各有一個凸出部份，剛剛好可以按中我頸部最痛的位置，舒服！右手的麻痺也可以即時減輕。

 不過女店員推介的那款，則需要自己左右移動，可能我的頸背沒有衣服，所以左右拉動時綴著皮膚，不太舒適，最後，我決定買兩支U形棒，一支返工用，另一支則放在家用。付款時另一位女店員見我一邊按摩，一邊對阿太說:「真係幾好喎!!」，女店員竟然答我：「真係好用咩？（係喎！我長期頸痛，按左幾吓真係無咁痛咁喎！）咁我放工都要買返支！」

本來，我每日都要食一粒頭痛藥，這兩天也不用吃頭痛藥。哈！看來前晚買回來的6盒特強幸福止痛素，可以留回日後慢慢食。

PS：特強幸福止痛素又是另一朋友推介，價錢較必理痛更便宜，前天開始萬寧，屈臣氏售價竟然做特價，售價較出面藥房更便宜，我也掃了6盒。

Facebook : https://www.facebook.com/hayakutang