網頁

2019年6月2日 星期日

【週末限定紅磚屋】食咖哩‧睇玩具‧試蜂蜜‧逛市集@錦田好去處

話說去年4月跟子子媽來 錦田壁畫村+益下家Cafe High Tea 途經紅磚屋, 阿太:「嘩! 原來E度咁多嘢睇㗎? 真係搵日再嚟行過先得」


正正因為紅磚屋只開放星期六, 日, 所以這個「下次」一等就等了一年零兩個月...


今日我們就連同Erie 及Raymond 再闖紅磚屋, 食好西, 歎返一個周末下午.


中午烈日當空, Erie:「好彩我有帶個芭蕉扇嚟啫」, 32度...我承認今次真的有點失策, 但好彩由地鐵站走到紅磚屋只是8分鐘路程.



一進入紅磚屋, 我們當然就是先醫肚吧! 子子媽推介:「你一定要食入面唯一一間咖哩屋, 佢哋d咖哩屋真係好好食」


我問咖哩屋老闆:「你推介我食咖哩牛定係咖哩羊呢?」老闆:「多數人都叫羊, 你加唔加$5轉包呢?  你哋可以一碟飯一碟包㗎」



我們還聽老闆推介, 點了一杯松露鹽鹹檸七...不過, SY呷了一口立即變酸梅干超人:「好鹹呀!!」



我也呷一口:「嘩! 真係鹹㗎喎...松露鹹一粒粒唔少嘢喎」


因為Raymond不吃羊, 所以由他先吃咖哩牛腩飯($55) , Raymond:「好腍喎, D咖哩唔會好辣, 幾好食喎」


Erie:「係呀! 佢d咖哩唔會太稀, 竭竭地幾正喎」; Raymond:「所以, 頭先老細專登嚟畀咗D秘製辣醬我哋, 加埋仲好食, 一樣唔係太辣」; Erie:「佢話可以提升咖哩鮮味」


我:「咁提唔提升到你D仙氣呢?」Erie:「咁我要揸晒成塊臉先得喎」


我:「不過, 我覺得咖哩羊($58)仲更加好食, 又唔羶, 仲腍過牛, 咬落仲更加同D咖哩夾」


Erie:「係呀! 我哋加$5轉咗做包都好食」; SY:「我鍾意食飯多D喎」; 我:「真係麵包點咖哩汁仲好食過飯喎, 脆豬包加$5, 好食好多」


之後我們又在另一小食店買了「鐵板炒麵」, 「香煎韭菜餃」, 「潮州炸豆腐」, 價錢大約$32-$35...


不過, 並不推介大家點「鐵板炒麵」, 其實跟我樓下粥店的炒麵分別不大, Raymond:「係囉...同我平時公司樓下賣D早餐一樣...」


「潮州炸豆腐」: 三款小食中最好味, 外皮薄又脆, 少少 淮鹽, 豆腐豆香又滑, 最好就是給我們蔥油醬汁, 配合炸豆腐更香更好味...


可以體積小就是潮州式炸豆腐吧! 因為將豆腐油炸都有分不同省份嗎? 我只知台灣臭豆腐跟香港的不同而已...總知好食就是了.


「香煎韭菜餃」, : 超多韭菜爆汁的餃子, SY吃不停...Erie:「雖然佢係煎, 但係一D都唔乾, 一咬幾多汁」


我:「我頭先滴到我成手都係汁添呀! 真係夠晒香, 不過韭菜食完個口好臭, 如果有白菜就真係超級正啦」



食飽飽我們便四周逛逛紅磚屋內數十間商店, 有賣懷舊襟章, 麥當勞小玩具的精品店.



又有賣木製品的擺設店.


更有蜂蜜專家蜂皇張開設的蜜糖店, 親切的蜂皇張:「過嚟試下我哋D蜂蜜啦, 唔洗買都可以試嘅」


蜂皇張繼說:「No1最好賣 野山黑蜂蜜, 含少少係口, 等佢慢慢溶, 可以醫痱滋, 喉嚨痛, 防蝕牙...」(蜜糖唔係沖水飲嘅咩?) 張先生答:「平嗰D就梗係沖水啦, 貴嗰D都得, 但係嘥咗囉」



蜂皇張旁邊擺放了大量我的最愛Bearbrick, 我說:「哎呀! 我發夢嚟過E度」Erie:「點會呀?」; SY:「你乜都見唔到, 乜都睇唔到...」


我:「唔係喎, 我發夢仲入埋去同老細傾計㗎喎, 等我入去問一問佢先...」


結果我膽粗粗向在店內忙著玩遊戲機的老板查詢, 他答:「入嚟啦, 歡迎呀!!」


原來, 老板玩的是深水埗新買回來的遊戲機, 他說:「我其實都係屋企太多嘢, 當E度係半個倉, 又可以Display, 星期六, 日米坐下, 同人傾吓計囉...哈哈哈」


紅磚屋真是一個很優哉游哉的地方, 紅磚屋大廳雖然沒有冷氣, 但空氣流通, 而且溫度較街低2-3度, 結果我們逛到坐了在椅上休息, 直至差不多5時才繼續行程.


(待續)


黑白豬咖喱屋
地址 :元朗錦田紅磚屋22號舖
電話 : 95194545

紅磚屋小食店
元朗錦田祠堂村地段390至400紅磚屋

RCM Recommend (紅磚屋2號舖)
電話: 6018 9625

元朗錦田祠堂村地段390至400紅磚屋
只開放逢星期六、日、公眾假期
時間: 10:00 am - 6:00 pm
錦上路西鐵站: B出口, 步行約8分鐘
網址: www.YL.hk/rbh




大仁生活facebook



沒有留言:

張貼留言