網頁

2019年4月5日 星期五

【$398全包】同長老嘆海參、鵝肝、燕窩自助晚餐 @ 九龍維景酒店

上星期, 因為慶祝生日, 所以一家大細走了去食自助餐, SY:「爸爸! 我真係鍾意食自助餐多過食中國餸呀!」(你咁㨂飲擇食, 我梗係知你唔鍾意去酒樓啦)


嫲嫲問我:「點解揀窩打老道E間酒店食自助餐呢?」; 我答:「唔好咩? 對到我哋以前住嗰度正一正, 幾親切感呀...最重要夠晒平, 你哋老人家加埋一都係$348, 小朋友HK$268, 真係抵過旺角打邊爐呀!」


SY第一時間帶爺爺去夾壽司及刺身, 爺爺:「嘩! 全條魚E隻好幾好好食咁喎」; SY:「我鍾意食三文魚多D」


我食了一口鱆紅魚:「唔係喎...真係鱆紅魚魚味重好多, 正過三文魚多多聲」


嫲嫲:「我去攞長腳蟹先...」; SY:「我幫你夾, 我幫你夾」


嫲嫲:「你睇吓D長腳蟹幾多肉, 真係啖啖肉」


爺爺:「我都想食...」; 嫲嫲:「嗱! 我剝埋殼畀你啦~等你啖啖肉」


我:「個鮑魚仔先夠晒鮮, 天然到夠晒健康, 食完都無罪惡感呀」


之後, 當嫲嫲再次出動之時, 正正就是她的最愛蒜香炒蟹添加的時候, 熱辣辣的炒肉蟹...嫲嫲還即時教SY如果揀多膏的大蟹蓋.


一邊食蟹膏一邊笑容滿面的嫲嫲:「我最鍾意食E啲㗎啦, 你睇吓幾多膏, 幾正...(真係好似鹹蛋黃一樣), 真係好好食, 我E個蓋真係好多膏呀」(嫲嫲真係食住都偷偷笑喎~)


其實, 我好最愛吃鵝肝, 但因為實在太不健康, 有時也過不到自己的一關, 不過, 偶然一件, 還要即場被師傅煎得香噴噴, 我又怎忍得口呢?


就連一向健康的爺爺也大開破戒的吃了一件後說:「真係好香, 外層煎到脆脆地, 入面又唔粉, 原來加咗D藍莓汁真係忍唔到口㗎...第一次加藍莓汁咋, 咁好食㗎喎」



即煎鵝肝的位置同時有即煎鐵板燒虎蝦及羊扒...我問爺爺:「你又話無牙嘅?」; 爺爺:「D羊好腍㗎...無牙都食到, 咁我就食到啦...」


這裡食自助餐, 每人有一份海參扣鵝掌, 我奇怪:「點解自助餐唔係任食嘅呢?」


嫲嫲:「隻海參原條上仲有咁多刺, 成本一定唔平啦...如果人人都任食, 應該酒店會蝕本囉」(哦! 我仲以為海參係平嘢嚟添~)


還有現場即點即加熱的花膠海皇金湯, 我:「嫲嫲你睇下碗湯幾多花膠?」


嫲嫲:「係喎! 真係有咁多花膠喎! 」; SY:「我頭先以為係芒果汁嚟」; 嫲嫲:「南瓜做湯, 有益㗎...」


這個有花膠的靚湯, 大叔Encore完再Encore... 為的就是「我要膠原!! 我要同皺皮講拜拜啦」


正當我們還在吃鹹食之際, 有小朋友已急不待走了出去搵師傅即場製作香芒燕窩班戟...


SY:「我要同嫲嫲一樣落好多忌廉...」; 我:「嘩! 嫲嫲你食咁多Cream嘅?」; 嫲嫲:「我最鍾意食D唔健康嘢㗎啦」


班戟...而且還加入燕窩, 連我也忍不住先拿一份, 阿太:「SY 你知唔知咩係燕窩? (SY搖頭), 即係燕子口水囉...」


SY:「吓? 口水? 咁米好污糟...點會有人食㗎?」; 我:「燕窩係補品, 養顏, 今晚又燕窩又花膠真係好滋補, 好正呀!」


甜品怪之後還要來朱古力噴泉棉花糖, 黑森林蛋糕....SY:「爸爸!! 無晒黑森林啦...變咗Tiramisu, 不過我都想再添」(你係米咁鍾意食甜嘢呀?)




我反而對豆腐花有興趣, 因為清清地, 朱古力噴泉太邪惡啦.


最後一人一杯Movenpick...我們便捧著肚的滿足地回家...


麻煩的SY:「原來Movenpick的咖啡味好食過士多啤梨...士多啤梨好似食沙冰咁...都係咖啡, 朱古力最好食...爸爸...我哋幾時再食過自助餐呀?」(吓? E餐都未消化...我飽到上心口喇)



棕櫚閣西餐廳⭐海參、鵝肝、燕窩自助晚餐⭐
原價: 星期一至四:成人每位$458;小童每位$318;長者每位$408
            星期五至日及公眾假期:成人每位$488;小童每位$338;長者每位$438
每位奉送「海參扣鵝掌」一客!
憑優惠券: 成人每位$398;小童每位$268;長者每位$348(免加一服務費)
優惠不適用於5月11,12日
電話:2760 3666 / 2197 3509
地址:九龍窩打老道75號九龍維景酒店一樓
索取優惠網址:
https://www.facebook.com/MetroparkHotelKowloon/app/1516332248605268/



大仁生活facebook



沒有留言:

張貼留言