【Call黃太實錄】$28屯門三聖食風味足料艇仔粉

3個月前, 我們第一次試過在香港仔致電流叔, 食過令人難忘的艇仔粉後, 有朋友告訴我:「喂! 屯門都有㗎喎, 你不如去試埋啦」

於是我在狗年年尾致電屯門碩果僅存的粉艇艇主黃太:「我同我先生做咗四十幾年, E家都半退休㗎啦, 所以唔係成日開, 過咗年啦, 不如你新年之後再打畀我睇吓, 好唔好?」(好吖!! 好吖!!)

於是心急的我, 初六便問好黃太, 初七便約同子子, 齊齊去三聖食艇仔粉!! 地膽魚子媽:「我住咗係屯門三十幾年...無無無...廿幾年, 三聖食海鮮就久唔久嚟, 但係艇仔粉就真係唔知道有喎」

既然如此, 我們便約同在三聖輕鐵站等, 沿豐漁樓, 青山冰廠方向, 走去青山灣海濱長廊找黃太吃地道風味艇仔粉!!

兩個小朋友嘻嘻哈哈, 由輕鐵站走約3分鐘便大叫:「冰廠呀! 冰廠呀!」, 再走1分鐘便已經到達長廊入口. 於是我即時致電黃太.

黃太:「係就企係嗰三隻大船前面條樓梯等我啦, 你食過未㗎? (我:未呀! 我專登係旺角入嚟試你D手勢㗎) 吓! 你旺角入嚟? 我D嘢好咋㗎」 (十分謙虛的黃太)

大約5分鐘, 黃太的艇來了...艇仔粉$28一碗, 我們選了一碗河粉, 一碗麵, 黃太:「你要咩餸呀! 燒味、叉燒、紅腸、雲吞、魚蛋」

後來黃太說:「我哋D湯用大地魚+燒豬骨煮㗎, 你哋試吓睇過...好彩你打畀我, 因為我哋今日(年初七)先開返」(所以, 大家想找黃太食艇仔粉, 記得電話預約先會比較好, 避免撲空！)

我們今天非常失策, 因為忘記自備餐具, 但沒有想到黃太的$28艇仔粉會大碗得如此抵吃.

魚子媽:「我以為佢好似街邊食豆腐花咁, 食完畀返隻碗佢, 原來唔係...下次我哋識自備餐具喇, 不過, 佢盒粉真係好大碗, 又多菜, 好健康, 好抵食」

SY:「黃太D叉燒仲好食過太興...」; 魚子媽:「雖然頭先佢話以前先係自己做燒味, E家係交貨嚟, 但佢哋都揀得好正, D叉燒係有燶邊, 仲係半肥瘦添」

我:「佢D魚蛋都好入味喎」; 魚子媽:「佢可能知我哋唔係即刻食, 所以D粉同麵唔會煮到好腍,  麵仲幾彈牙, 同唔重鹼水味...講真, E家食碗車仔麵都四十幾蚊, 黃太賣$28, 真係超值」

坐在海濱長廊, 慢慢嘆艇仔粉, 除了享受, 就是舒服, 好嘆...真心推介大家要來試一試充滿風味及好好味的黃太艇仔粉!!

屯門粉艇
地點：三聖邨碼頭冰廠隔離
電話：9237 8244
備註 : 記得電話預約 避免撲空！


大仁生活facebook