上年我們買了三個福袋, (因為無飯家庭丁麵就係最好朋友), 所以小朋友一入場便幫我找出前一丁攤位.
今次兩款福袋, $90的送燜燒鍋, SY:「我哋屋企好多水壺咖啦」, 對於不煮食的我們, 另一款福袋吸引得多.
$110的福袋送雙耳鍋, 這個最多人排隊, 因為福袋送煮公仔麵必用鍋呀! SY:「紅色真係幾靚喎, 如果個蓋上面係出前一丁公仔就仲靚」(係喎)
SY:「爸爸! 原來同出前一丁影張相可以扭蛋喎」(Upload上IG後, 工作人員就會畀個錢仔你...我最想扭到日清妹妹)
結果, SY扭了手機手指扣, SY:「啱晒媽媽, 佢個扣已經好鬆」
之後我們向前行, 忽然被香噴噴的高湯味所吸引, 工作人員說:「日本人煮烏冬, $20...小朋友要唔要試吓?」
我:「好呀! 我哋要一碗」日本工作人員即時入廚房煮烏冬...3分鐘後超香的烏冬就端出來....可能我們非常肚餓, 這碗烏冬真的很好食.
吃完烏冬我再來一塊紅肉蜜瓜, 因為上次日本在Aeon超市買的蜜瓜實在太難忘, 今次的富良野更甜更腍, 我:「好食...不過太少, 5啖就無晒, 好味道」
行行走走, 我竟然發現有超大大粒串燒丸喎, 我問:「嘩! 你哋D丸咁大粒嘅」店員:「花枝+北菇貢丸+鮑魚草蝦 $25」
花枝丸好食, 其實北菇貢丸味更濃, 不過略嫌實了點, 鮑魚草蝦味道就是第三位...工作人員:「燒唔切呀! 要買就要再等幾分鐘啦」
一碗有3隻南非鮑魚仔, 還有一大堆螺片, 肉鮑螺, 工作人說:「你自己帶個玻璃碗嚟架? (係呀) 送多兩隻螺片你食啦」(嘩! 多謝)
老實說, 我最初以為食車仔麵, 原來全部也是鮑片, 螺片, 工作人員姐姐說:「你食肉鮑螺, 南非先有得捉, 香港無呀, 好食架」
第一次食深海肉鮑螺, 很腍, 跟 螺片口感很不同, 而鮑魚是主角當然夠入味, 我還是愛主角多一點, 一口一鮑魚, 煙煙韌韌果然鮑魚是最高. (個汁好好味)
籽嘉國際1A-C24
當走過FoodWise, 望到工作人員正在炒肉粒粒, 我本來以為是牛, 原來他說:「袋鼠肉$20..」
SY:「吓? 袋鼠都可以食嘅咩?」朋友說:「澳洲袋鼠多過人啦」, 我問工作人員:「袋鼠肉要唔要整熟D?」
工作人員:「愈生愈好食, 因為袋鼠無脂肪」, 不過, 是否我不斷跟他們說話, 我的袋鼠肉好像有點熟, 不太腍, 自己還是比較愛吃牛肉.
FoodWise 1C-B28
吃得太多鹹食, 所以過去程班長買了一杯$10冰涷冬瓜茶, 真的很合我口味, 甜度適中, 又夠凍, 一定健康過汽水.
程班長台灣美食 1B-B32.B34
而SY就想食雪糕, 但環顧周圍也是榴槤雪糕, 不過左行右行又給他發現雪條大特賣, 我:「我想食白桃味喎」
結果, SY試畢兩種口味, 便大叫:「白桃好食喎, 甜過士多啤梨, 爸爸你食士多啤梨好唔好呀?」
因為士多啤梨要呷入口後才變甜, 白桃就表面已經甜, 難怪愛吃甜的小朋友即時作出了選擇...(早知買兩支白桃啦)
榮屋冰果 1C-A29
最後, 我買了4盒巨蜂提子回家, 一盒$40, 兩盒$70, 真心抵吃, 一晚我已經KO了兩盒, 沒有去到的阿太說:「早知你買一箱啦...」(係囉)
美食博覽2018
日期：2018年8月16-20日（星期四至星期一）
時間：（8月16至19日）早上10時至晚上10時；（8月20日）早上10時至晚上6時
地點：香港會議展覽中心
大仁生活facebook
沒有留言:
張貼留言