其實, 從前我們不是初一去大埔林村的, 只是因為數年前發現初一許願樹人流少, 行行走走非常方便, 自始便決定每年初一出發.
我:「嘩! 除咗熱, 今年點解仲咁咁咁多人嘅?」
朋友依莉建議:「不如我哋掃街先啦, 我哋未食飯」
我:「食鰻魚多士 ($50) 吖...看見係成條鰻魚架...」, SY:「鰻魚士多, 我鍾意食鰻魚呀, 好食呀」(係多士, 唔係士多喎)
我:「如果多士搽多D牛油就仲好, 我見佢好似搽咗蛋漿咋」, 依莉:「佢幾好食喎, 無骨, 但如果兩條鰻魚中間夾一塊麵包就仲正」
我:「咁可能唔係$50蚊, 係要賣$100蚊先得」
我對SY說:「E度都有船麵($30)食喎, 仲有4粒丸, 一舊豬頸肉, 一個炸豬皮, 抵過旺角好多喎」
這裡的船麵, 應該說是船粉, 很滑, 湯底微辣好夠味!!
SY:「如果今日唔係咁熱就更加好食....我E家好熱呀!」
我:「咁我不如買D嘢嘢飲畀你啦...$25特飲啦, 紙包要$10, 罐裝要$15, 好貴」
我們買了一杯荔枝特飲, 愛甜的SY:「夠甜又有氣喎」, 我:「點解荔枝白色, 雪碧又係白色, 但你杯嘢飲係藍色嘅?」(SY:係咪特別版呢?)
之後, 依莉帶來一盒香噴噴的黃金蛋黃炸魚皮, 依莉:「佢係即炒架, 仲熱架, 不過, 份量少過我哋上次屯門花市食嘅」
我食了一口:「嘩! 原來即炒熱辣辣食係咁正, 仲正過金鴨咁多喎」
Raymond:「真係好香鹹蛋味喎, 我本來上次食咗成兜都有D憎憎地...」(我:唔係吖, E個真係幾好食)
SY:「我想食雞翼呀!」我:「不如要一串菠蘿雞翼, 一串水牛城雞翼囉」(店員:各$20, 多謝)
依莉:「菠蘿雞翼個皮好脆, 同埋有菠蘿, 好似無咁肥膩」
SY食了一口水牛城雞翼, 大叫:「好辣呀! 呀! 呀!...」我:「辣嘅咩? 依莉你試試」
依莉咬了一口:「真係好辣...(你都唔食得辣?)...唔食得辣」(咁留返我食啦)
最後, 我們買了2粒泰國菠蘿仔($20/各), 店員:「你落少少鹽啦, 我哋自己炒過架, 鹹鹹地好食D」
阿太:「不過, 好似原味清甜好DD咁喎」
飲飽食醉後, 我們便開始許願儀式, 今年膠桔+蓮花套裝價錢與去年一樣, 都是$50, 但我們3時左右, 蓮花已經是有污積的二手Ver.
雖然寶牒一早變成「剔出心願」的懶人願望選擇題, 但SY說:「不如我剔晒佢啦, 咁咪多D好事發生囉」
寫過願望, SY興奮得即時跑到「許願池」放蓮花, 我家的小朋友還是十分愛玩水.
(之前你唔係話年年嚟許願樹悶咩?? E家又玩到咁開心)
因為, 我們有儲許願膠蓮花的習慣, 所以, SY一定會第一時間走到水池的末端, 撈起蓮花又要重新放一次.
玩完蓮花池, SY又跟了阿太及依莉去了掟許願樹, 今年特別多人, 應該是近年最多人一年的年初一...
許願樹圍滿了哈哈大笑的大人, 及小朋友, 不時聽到有人「Yeah！得咗啦…」;「好野！！終於掟到啦！！」
Raymond 掟完後, 不停昂頭努力找來找去, 我問:「你搵咩?」, Raymond:「我哋掟咗個寶貼上樹, 頭先我寫咗個2018字...E家試吓搵返」
SY：「爸爸！！我掟中咗啦…咁你幫我搵返啦！」 (吓！係邊呀？咁多桔…邊個先係我哋架？？)
PS: 特快專車63R 服務時間及班次
2018年 2月16日至19日（年初一至四）
由大埔墟站開出：09:00-19:00（10-30分鐘一班）
由林村許願樹開出：10:30-21:00（15-30分鐘一班）
2018年 2月20日至25日（年初五至十）
由大埔墟站開出：09:00-17:00（10-30分鐘一班）
由林村許願樹開出：10:30-19:00（15-30分鐘一班）
官方網頁: http://www.lamtsuen.com/index.html
香港許願節2018
日期： 2月16日至3月4日(年初一至年十七)
地點：新界大埔林村許願廣場
－大埔墟站A3出口乘64K或64P號巴士，在放馬莆站下車
－太和站A出口乘25K號綠色小巴，在林村許願樹下車
大仁生活facebook
沒有留言:
張貼留言