【年宵變掃街】美食嘉年華一樣‧花膠船麵蛇羹 @花墟

每年逛年宵孖寶, 定必是維園加旺角花墟, 昨日玩完「維園年宵~ 9大精選攤檔推介」, 今日便走到規模比較小的花墟, 但想不到今年竟然有驚喜.

阿太說:「好肚餓呀! 不如買D嘢食先啦」本來一心也只預計只是魚蛋, 燒賣, 維他奶, 但今年未入年宵, 門外已有十多檔美食任揀.

 

阿太:「嘩! 幾時E度變咗美食嘉年華咁? 連蛇羹都有喎...」天寒地凍, 吃蛇就正到不得了. 而且蛇肉份量也不少喎.

我:「抵喎, 一碗蛇出面賣緊六十幾蚊呀!」, 阿太:「但佢好似好細碗 (咁你平咗D就梗係細碗D囉) 有少少凍...(室外食無計啦)」

蛇羹 $45 👍🏻👍🏻👍🏻

SY說蛇污糟所以他不吃, 但指定要先吃旁邊甜品「烤棉花糖 $25」, 我:「咁甜...你一個人食晒佢呀...我唔食架」

原來, 一半是夾有芝士, 一半是普通棉花糖額外加朱古力.

SY呷一口更用手拉出糖絲, 很得戚的說:「芝士好食過朱古力, 因為一咬佢會爆D芝士味」

烤棉花糖 $25👍🏻👍🏻👍🏻

阿太:「又有榴槤食喎, 不如買囉...一粒粒炸波波 $50/4粒」我們付款後便等待店員即炸波波...

同一檔的旁邊又有炸蝦餅, 同樣$50/4件....我問店員:「可唔可以雙拼呀?」, 店員:「可以呀!」

阿太:「好彩咋, 唔係4粒榴槤真係好漏喎」(但眼見店員在製作波波, 我還以為是炸魚蛋添)

煎炸凍甜食物就一定是SY的最愛, 他吃了一口炸蝦便說:「好脆, 好味...媽媽你個波波好唔好食?」

阿太:「無乜榴槤味, (店員話係貓山王喎), 尋日維園個榴槤薄餅正好多, E個真係一D榴槤味都無, 油溢味就有」

炸蝦餅+炸榴槤波波  $50/ 各2件 👍🏻👍🏻

之後便到我最愛的片皮鴨...店員:「即叫即包, 新鮮片皮鴨 $40/4件」

不停將鴨肉, 青瓜, 蔥包入麵粉皮內的姐姐說:「真係包唔切, 你要等一等」(如此多人光顧, 應該好好食啦)

結果...SY:「原來得咁少料喎」, 咬了一口的阿太:「咩嚟架...咁難食嘅? 都唔係我哋食開包填鴨D麵粉皮嘅」

其實, 真的味道很鹹, 而且冰冷得沒有任何溫暖, 真的很難食...SY:「係囉, 上次酒樓食嗰陣, D皮熱到我攞都攞唔到」(佢應該有個蒸籠熱住啦...真係好鬼難食)

片皮鴨 $40 👎👎👎

吃完天下最難食的鴨, 我們竟然食到好好食的花膠雞

涼泮花膠 $40, 我問店員姐姐:「D雞湯係咪可以有得飲呢?」, 店員姐姐:「可以, 梗係可以啦, 你要唔要食D雞? 不過雞髀我哋食咗, 我見你兩父仔, 我畀多一小塊花膠你」

花膠雞湯又暖又甜又漿咀, 非常好味, 花膠又或者是魚肚吧...總知就是充滿骨膠的產物, 一向也是我的最愛.

全場食得最滿足的一檔!! 
涼泮花膠 $40 👍🏻👍🏻👍🏻👍🏻👍🏻

我跟SY說:「這間泰角很熟口面...在那裡見過呢? $30有船麵喎, 好似好抵」(SY咁你咪試吓囉)

船麵貪其細細碗, 但湯底濃,  粉夠滑, 可惜餸菜就只有兩粒肉丸及芽菜, 天寒地涷暖一暖胃, 特別覺得吸引.

原來, 老闆娘提我, 這泰角就是女人街頭半年前我去【黐線咁抵!!】$38 大大碟~嫩滑海南雞飯那一間...我:「但你舖頭都無泰國船麵食呢?」

老闆娘:「師傅話花市做海南雞飯唔方便, 所以就改做船麵囉....」(好食...只係餸太少囉)
船麵 $30 👍🏻👍🏻👍🏻👍🏻

巨型車打大芝士煙肉意粉 $40, 卡邦尼迷SY其實一早已經想食, 老闆:「你好鍾意食芝士架? (我個仔好鍾意架), 咁你要等一陣, 因為要煮熱D意粉, 先可以熱溶D芝士.

原來, 將意粉上滿芝士也要很大大力才可以喎.

染滿芝士的意粉再灑上煙肉, SY:「幾好食喎...」, 阿太:「睇個樣好似好漏」

我:「真係要快快食先得, 因為芝士一凍咗, 一定會好難食...同埋如果多D煙肉會更加好」

其實, 同場還有雞翅包飯、芒果糯米飯、串燒、芝士玉子燒等, 個仁覺得今年年宵加入美食嘉年華, 超碼可以新添少少新意, 總好過年年一乘不變啦!!

車打芝士煙肉意粉 $40 👍🏻👍🏻👍🏻

2018年年宵市場
日期: 2018年2月10日 - 16日
地點: 太子界限街花墟公園


大仁生活facebook