我對阿太說:「你以前住觀塘...咁你知唔知點樣去寶達邨呢? 因為嗰度開咗條食街...我想去掃街呀!!」
結果, 一行5人還是在觀塘坐$33的士到秀茂坪新開的MC.BOX.
阿太:「嘩!真係變晒, 同我以前完全唔同晒喎」 (5個人得你一個嚟過, 我哋未嚟過, 唔會知以前係點囉)
寶達商場街市, 新內開了一條小食街，入口正正就在秀茂坪天主教小學旁邊, 由早上開至凌晨12點才關門.
對街坊來說可以吃宵夜當然好, 但我們山長水遠走來, 第一次還是先吃過下午茶比較好.
這條小食街, 大約有6至7間小食店... (穿過街市的另一邊還有4-5檔), 但還是近小學這邊比較熱鬧. SY:「爸爸! 我好肚餓啦...不如買D餃子比我食先啦!!」
可能是新開業的原故, 每一檔也人頭湧湧, 皇后餃子的姐姐說:「湯餃可以揀椰菜, 韭菜, 芹菜, 白菜, 但煎餃就無得揀, 整到咩就食咩」
這可能就是$28/10隻湯餃, 與$10/3隻煎餃的分別, 餃子是現場不停由姐姐在大家面前包裹的, SY:「我想食多幾隻味喎!!」
可惜, 我們不能選擇, 偏偏我點了韭菜湯餃, 而煎餃又同樣是韭菜, SY:「是旦啦...我好肚餓」
這裡的餃子真的有很多韭菜, 而且肉味也很出, 夠香, 我:「真係唔錯喎, 只係佢褶埋D皮個位置厚咗D...真係幾好」
SY:「我想試埋其他味道嘅煎餃...」(下次佢無咁多人先啦...E家都無得揀)
推介: ★★★★☆
朋友Erie:「我哋一定要買食好啲嘅"櫃桶腸粉" ($26)呀!!」 (咩櫃桶腸粉??) ~
我:「哦! 原來係潮州腸粉....嘩!! 我哋攞咗籌, 要等30碟喎」
結果, 4個蒸爐櫃桶, 一對手, 我們足足等了30分鐘才可以食到這碟只有蔥花, 叉燒粒的腸粉...
其實, 我之前吃過的潮州腸粉，有生菜, 雞蛋, 豬肉...而且可能火喉剛剛好, 所以蒸出來的米漿仍然爽口, 不過今次的....
我:「太煙韌, 應該煎得太過火, 老到有D似我D皮, 鞋烚烚, 而且料又比較少...」
SY:「我覺得好似食緊麵, 都唔似腸粉」, 阿太:「都有蔥花味嘅, 下次都係試返傳統腸粉啦」
推介: ★☆☆☆☆
之後我走了另一邊入口的琪味手撕雞, 買了半隻手撕鹽焗雞($55), 我對Erie說:「點解頭先我見佢落一大匙羹黃色粉落D手撕雞度...好似好得人驚??」
Erie:「吓? 係唔係雞粉嚟呀? 因為一般唔新鮮嘅雞先會落雞粉喎...」(嘩! 咁同食味精米無分別??」
Erie:「半隻雞, 佢又真係比返晒D雞腳, 骨, 翼尖我哋喎, 真係成盒骨仲多過肉, 老老實實畀返半隻雞你睇」(即係$55都幾貴, 咁鬼多骨, 除非我好鍾意食骨啦)
我:「唔知係咪我條脷太敏感呢? 我開始乸住乸住啦!! SY你都係唔好食啦...我唔想你食咁多味精」
推介: ★☆☆☆☆
之後, 朋友Erie及Raymond便走到新興車仔麵買油雞髀($16)及車仔麵兩餸($25), 而阿太就說:「不如你買個韭菜豬紅 ($18) 畀我啦」(又係韭菜)
阿太:「雖然韭菜同幅圖比較少咗好多, 但係佢D豬紅幾正, 又唔散, 又算多又唔貴, 我哋屋企樓下間雲吞麵舖要賣$28架」
我只愛吃炸髀, 所以油髀就交給朋友Erie及Raymond:「雞髀夠平, 又夠大隻, 啖啖肉都唔差喎!」
Erie:「車仔麵揀咗秘醬同腩汁, 夠辣夠惹味, 但得兩粒魚皮餃太少, 唔多抵食, 漢堡扒都係漢堡扒味囉...無乜特別」
推介: ★★☆☆☆
最後, 吃完鹹食, 當然要來甜品, 現場所見可以選擇的甜點不多, 撈得店有香蕉煎餅 ($20)
看似多士, 原來是煎春卷, 中間夾入大量香蕉, 再配煉奶...Erie:「個皮好脆呀!! 」
我:「E個真係全場最好食喎, 仲正過餃子, 可能我鍾意食甜嘢, 又鍾意佢脆岳岳層皮, 好食呀!」
推介: ★★★★★
其實, 現在領展的商場很懂攪氣氛, 街市內不時有DJ叫場, 拍賣長腳蟹, 又有超特價$10十個紐西蘭蛇果...SY:「爸爸! E度好似我上次去青衣做小DJ嗰場」
跟本就是同一個模, 同一個發展商出品, 乾乾淨淨, 但就一式一樣, 我也不知道是好還是不好了.
沒有留言:
張貼留言