相關網誌: 跟 J2「飲食男女」去覓食的隱世美食. 去年市政大樓要進行為期半年的翻新工程, 所以芽莊城亦被迫休息.
前前後後, 我也差不多接近2年沒有再來探關先關太, 其實, 這篇文章亦是2017年年頭時的記錄, 因為當時吃完剛剛在apm新開業, 所謂全越南最好食的錦麗, 即時令我想起芽莊城.
2年沒見, 關太依然笑容滿面, 非常好客, 第一時間問我:「靚仔, 今晚想食D乜嘢呢?」, 放了半年長假的關太, 果然神彩飛揚.
而主理廚房的老闆關先生, 依舊磨打手的為客人煮粉, 炸春卷, 雞翼, 豬扒. 雖然忙過不停, 但仍然跟我閒話家常.
關先生:「我哋放假嗰半年, 返咗去加拿大幾個月, 之後返香港, 我就去酒樓兼職, (吓? 點解咁辛苦, 唔休息吓), 手停口停, E度又無得開, 梗係要搵份工幫補呀」(關老闆真係好勤力)
到芽莊城, 識食一定要先點越式併盤($55), (春卷X2, 蝦餅X2, 雞翼X2, 扎肉X5), 因為, 當年的春卷要有緣才可以吃得到, 蝦餅又鮮又甜又彈牙.
雖然這裡賣的不是牛油雞翼, 但其實老闆的手藝一點也不失禮, 當然, 扎肉就是阿太的摰愛...不過, 我則麻麻地.
重新裝修的熟食中心, 環境不再簡陋, 但價錢依舊相宜, 迷你套餐最貴也只是$31元包熱飲, (這相畀3年前也只是象徵式的加了$4元呀!)
關太不時要更換新的魚露, 因為是老闆足料秘製的傑作, 就是我也用了半碗來伴湯河...
阿太：「嘩！啲魚露真係好正喎」 , 關太：「老闆整架！」, 關先生:「食越南嘢嘅靈魂, 所以一定要做得夠醒神先得」
酸酸甜甜夾上爽爽脆脆的紅白蘿蔔絲, 一開蓋非一般的濃濃的香味即時撲鼻, 食指大動就是因為還到好東西呀!
當年, 我開始學人飲咖啡, 就是因為關太的滴漏咖啡吸引我, 我每次來都一定必飲越南滴滴($16).
望著滴滴咖啡, 由小小變成一杯, 再加入煉奶, 很有充實的感覺...
其實, 我喝咖啡會胃痛, 除了關太的越南滴滴...不過我未曾飲過凍的..下次有機會要試一試.
阿太永遠也是吃香茅豬扒撈檬 ($30), 阿太:「豬扒同以前一樣大大塊喎, 我最鍾意佢會畀好多芽菜、蘿蔔、青瓜、葱油、乾葱頭、椰菜...超正」
毫不吝嗇的分量, 單單薄薄的豬扒煎得色澤耀目, 甚麼是一咬入魂呢? 你來吃一次就會明白.
新鮮滾熱辣的生牛肉湯河 ($30), SY呷了一口湯即時大叫:「真係好好食呀!」, 阿太:「真係D河粉都充滿牛肉湯味」
關生說:「雞湯我哋煲6個鐘, 牛就煲足7, 8 個鐘架」, 難怪味道如此吸引. 阿太每次嚟都說：「飲完條脷都無乸住乸住, 真係好嘢」
SY:「E度真係好, 又平, 又唔駛排隊, 仲要好好食, 點解上次我哋去apm嗰間 (錦X), 要等咁耐先有得食?」
我:「新屎坑三日香掛」(註: 我已經沒有再上apm, 所以不知道, 現在的錦X還要唔要排隊)
芽莊城絶對是深藏在街市中的超班, 超值美食小店!!
(關老闆兩夫妻非常的親情故事, 大家可瀏覽之前網誌, 或到 「飲食男女」：https://www.facebook.com/peoplesproduction 尋找)
地址： 深水埗北河街市政大樓2樓熟食中心10號
沒有留言:
張貼留言