網頁

2017年8月13日 星期日

【澳門掃街】真係好平~好多嘢食 @ 下環街市

因為聖誕節時澳門人依莉詩於FB介紹過「澳門平民美食集中地」下環街市, 在我心目中, 澳門就只有酒店, 酒店, 及酒店, 所以一見到平靚正食肆, 一定要去試!!


Google大神顯示, 由大三巴步行到下環街市只是11分鐘, 結果我們去問人, 人人也說:「坐車啦, 有排行呀! 大街差只有2部巴士去唔到...你問下人啦」


又一次証實, 地道澳門人真的很親切, 巴士上的姨姨叔叔詳情的教我們怎樣可以去到街市...

下環街市真的如同本港18區的熟食市場, 所以第一感覺似熟悉又陌生, 「明明就是第一次過來呀!」



走到二樓, 燈光比較昏暗, 但算整整齊齊, SY:「香港有上環, 有冇下環?」(下環就係係澳門囉)


我們走了一圈, 決定光顧最長人龍的一間車仔麵店...小豬媽:「我哋5個人, 不如叫個全餐麵啦, 乜都可以試勻呀!」


招記美食姨姨雙手好似摩打, 不停執碼, 不停煮, 再問下一位吃甚麼, 一腳踢忙過不停...


姨姨:「無晒麵啦, 我畀瀨粉你啦, (全餐有D咩?)... 你見到有咩就有咩,今日魷魚賣晒, 我畀多件魚餅你啦...我哋賣晒就算架啦, 做完就收工囉」


本來$61, 姨姨就只收我們$60, 而當我們揀好位置後, 更加找人為我們送上雞翼...「阿姨話頭先畀漏咗你哋喎...」(真係老實, 其實你唔畀我哋都唔知啦)


全餐瀨大大碗, $60足足可以給我們3大2小食到很滿足, 魚餅、薯仔、蘿蔔豬扒、鳳爪、雞翼、豬大腸、魚蛋、豆卜、菜、雲吞等.


排隊其間見很多人也點撈麵, 姨姨:「唔係呀! 撈麵, 湯麵都有人叫」, 可能下次要試試撈麵, 因為我看到滷水汁十分入味喎.


阿太:「E度嘅豬扒好勁呀!」, SY:「真係好腍」, 小豬媽:「E啲真係叫入口即溶」, 對! 簡直出神入化竟界.

招記美食
檔號:3-26
營業時間:7am-8pm


其實, 我對煲仔飯很有情意結, 更何況是$33就有大大煲...阿太:「真係香港十年前食煲仔飯都好似要$35啦...咁鬼抵」


源進瓦煲美食的老闆:「你畀咗錢先, 之後十分鐘後返嚟就有得食啦...」(我最愛吃臘腸, 不愛潤腸, 所以今日揀了臘腸雞)


人情味的老闆說:「你哋要唔要多D菜, 我畀多D你哋啦, 有就唔怕畀多D, 因為我都閂門, (吓? 4點咋喎), 係呀! E度間間都差唔多4-5點就閂架啦」


小豬媽:「嘩! $33蚊有咁多飯焦, 幾正喎...雖然有少少濃!」


阿太:「臘腸同雞都係OK級數啦...我對飯焦麻麻地有興趣」, 小豬媽:「咁嘅價錢, 算合格啦!!」, 我:「係囉! 廟街四季E家最平都要$48一個煲仔飯呀!」

源進瓦煲美食
檔號:3-27
營業時間:7am-5pm

朋友依莉詩推介一定要食香蕉糕...在香港從未見過香蕉糕, 當然要試, 老闆從「Display櫃取出Sample加熱」, 我問:「吓? 唔係即場造新鮮嘅咩?」


老闆:「無啦, 得一底, 你要唔要吖?」在極不情願的情況下, 為了要食香蕉糕, 小豬媽唯有繼續付款說:「山長水遠嚟到唔通唔試咩...」




小豬媽:「真係好香香蕉味喎, 不過原來撕開係無香蕉嘅, 即係實心雞蛋仔咁囉!! (其實E底會唔會隔夜呢?) 唔會掛!?」


(個人覺得質素似香港龍津的雞蛋仔質素囉)


為了再一次証實, 我派了卧底SY再出擊, 看看是否真的再沒有香蕉仔...5分鐘後, 卧底SY端來一底全新的香蕉仔


我:「哎呀! 我知啦, 老闆唔想嘥咗個Display Sample呀...小豬媽我有得食新鮮version啦...不過, 點解新鮮整無咁香蕉味呢? 好似你底隔夜嘅香D」


小豬媽:「嗱! 所以話防腐有防腐好囉」 註:朋友依莉詩指, 有人抄原裝的香蕉仔, 而依莉吃的香蕉仔是在樓下司打口大街的一檔...(我下次識食啦)


明記美食
檔號:3-06
營業時間:10am-6:30pm


誤打誤撞, 竟然給我發現吳廷記有冷糕食...


我:「我要食冷糕呀!」, 老闆答:「冷糕要冬天先有得食喎, E家得紅豆餅 ($8)」


現場所見, 老闆真的不停手在即場製作招牌紅豆餅, 拿上手熱辣辣, 一咬便看到紅豆餡滿瀉出來, 不過, 小豬媽說:「可能個皮我略嫌佢有少少韌」




我不是太好紅豆, 加上小豬媽的評語, 我還是愛吳廷記的甜品...阿太:「係呀! 佢E碗楊枝甘露真係無敵($22), 又平好足料又好食, 香港30蚊都無一半料呀!」


我:「我個爆珠涼粉都正啦, 又爽又夠過癮, 五顏六色都夠晒吸引」


小豬媽:「菠蘿冰好飲喎, 菠蘿又夠多, 又唔會太甜!」, 我:「咁你覺得隔夜香蕉糕好食, 定係菠蘿冰好飲?」, 小豬媽:「我唔想啋你!」

吳廷記
檔號:3-02
營業時間:9am-5:30pm


全場最推介一定是香滑豆香豆腐花, 小豬媽:「真係好香豆味!」, 我:「黐線咁抵! $6熱/$6.5凍, 熱食真係夠晒滑, 凍會唔會差D?」


小豬媽:「唔係喎...凍都好滑, 不過你熱食個碗靚D囉」, SY:「點解無黃糖畀我落嘅?」


小豬媽:「因為老闆話已經落咗蔗糖, 我又加咗淡奶, 所以係滑上加滑」, 我:「係呀! 我都係第一次豆腐花落蔗糖同淡奶, 真係好好食」, 阿太:「仲好健康添, 真係超推介」

寬記豆腐花
檔號:3-10
營業時間:8am-6:30pm


最後, 因為SY沒有機會在豆腐花上放黃糖, 於是我點了一個夾油多給他放砂糖, 老闆娘:「你揭開多士, 灑D砂糖上去啦, 好食好多架」


最愛甜的SY當然不放過機會, 之後大口大口咬夾了大大塊牛油的多士說:「真係好好食喎...下次我食多士都要落砂糖!!」


就是這樣的一餐豐富下午茶, 3大2小吃得非常飽足, 又非常經濟, 更非常感受得到澳門地道人情味的一餐便完美結束啦!! 多謝各位瀏覽!!

泉記咖啡美食
檔號:A24
營業時間:11:30am-6pm

下環街市熟食中心
地址:澳門李加祿街下環街街市大樓2樓
時間:7am-8pm
交通:巴士路線9、16於「下環街市」站下車


大仁生活facebook

沒有留言:

張貼留言