2017年6月11日 星期日

【日本神社嘆放題】$168任點任食~仲有繪馬許願 @ 旺角

朋友Richard約飯局說:「旺角開咗一間超抵食日式放題, 6點前入去$168咋」


我答:「吓? 唔係兆萬嗰楝嘢嗰D呀? 全楝都伏嘢嚟喎...」



Richard笑笑口:「梗係唔係啦, 信和對面創興呀! 我食過架啦, 裝修到日本神社咁, 門口仲有繪馬可以畀你許願添」


如果食家Richard推介, 一定不會有錯, 於是當晚一行5人便齊齊走去神社食放題!!


Erie一見到繪馬便對我說:「阿仁你駛唔駛寫呀? 希望早D出糧都好吖!」(如果係靈就好~繪馬神賜予力量)


甫一坐下, 我便發現「落單紙」足足有A-J的選擇...我:「嘩! 真係有97樣嘢食, 同11樣飲嘢喎」


Erie:「個墊枱紙仲可以畀你褶千羽鶴添!」(不如妳幫我褶吖...14個steps好似好難)


Erie:「一D都唔難...好啫!」(嘩!係喎...點解你可以褶得咁鬼快嘅?)


Edward :「你係咪鍾意食海膽呀! 一人兩件海膽壽司啦...」....好正的海膽, Creamy!!



但原來我一口最多只可放4件呀!(太貪心差D啃親添)


之後, 我們還點了火灼三文魚, 三文魚腩, 我細細聲說:「點解D左口魚邊, 同帶子賣相咁乾憎憎嘅?」, Erie:「其實, 相比旺角其他放題已經好好多啦!」


刺身賣相又反而很不錯,三文魚腩, 油甘魚, 吞拿魚腩, 象拔蚌, 甜蝦, 馬刀貝, 雖然不是極級貨色, 但也算肥美, 任食價錢有這種質素絶對是沒有失望.


上月我們到塔門食的海膽炒飯要$100, 當然, 今次的海膽份量不及塔門, 但炒得夠乾身, 想多一點海膽的話, 或可自行將海膽壽司的海膽加入炒飯內吧!


芝麻脆皮雞翼帶微辣, 外皮脆岳岳, 好好食... 燒羊架, 天婦羅亦一樣不錯.


芝士焗蠔...唔...芝士夠多, 不過蠔則有點似未發育, 差一點點...少少失手吧!


日本番薯不得了...皮帶少少脆, 整粒番薯又甜又蓉又好食. Erie:「一田賣8-9粒都廿幾蚊架」


如果燒菠蘿可以再燒得有水準一點, 我應該會更加分...


汽水及茶完全任飲, 而且每次落單, 之後上菜的等待時間也常之快, 最重要是從未有被更改落單數目. 真的非常老實.


最最最重要是本來說好任食2小時…結果, 我們坐多了25分鐘一樣沒有問題, 非常之讚. (可能平日比較少人吧!)


評語:$168+10% 有如此環境+食物質素, 超值!!


神輿日本料理
地址:旺角彌敦道601號創興廣場5樓
電話:3160 8456
營業時間:4pm-1am


(任食2小時)時間及價錢:
6pm前入座或10:30pm後入座:星期一至四$168、星期五至日$178
6pm-7pm入座或9pm-10:30pm前入座:星期一至四$198、星期五至日$208
7pm-9pm前入座:星期一至四$228、星期五至日$238
小童收費一律$128




大仁生活facebook

沒有留言:

張貼留言