半年前, 己經計劃去塔門, 不過朋友依莉說:「冬天去應該無咁靚, 不如遲D先去啦!!」
結果, 天公不造美...計劃由3月一直壓後至5月初才可以出發...
老實說, 平日的話, 我們一班「晚睡晚起」的懶人應該無緣登陸塔門的, 因為全日只有08:30, 及15:
公眾假期去塔門則特別為我們一群愛睡的寶寶, 加開一班12:30 呀! Yeah!! 今日, 我們便一行5人, 齊齊出發~塔門半天遊.
SY:「塔門有咩玩呀?」有做功課的我答:「有牛, 有山, 有水, 有石, 有大草原, 有海膽炒飯...總之你跟住爸爸啦!」
由大學站 A出口沿單車徑行 15分鐘就便逹馬料水碼頭, 離遠我己發現有長長人龍在等候上船. SY:「仲影...快D行啦, 無位啦!」
因為知道錯過了12:30的船, 要等到15:00才有船, 所以我們預早了15分鐘到逹.
結果排第120, 順利登船...阿太:「成隻船坐滿晒...乜咁多人去塔門嘅?」
我最初也以為大家齊齊「迫爆塔門」, 誰知船會先停深涌, 荔枝莊, 兩個地方也差不多落了半艘船的乘客.
怕暈船浪的SY1小時15分鐘全程站在船頭.
他說:「哈! 原來, 咁快就到喎, 企係船頭好呀! 唔怕暈船浪, 仲有風景睇...落船啦...落船啦」
最近碼頭有公廁, 公廁旁邊的波波士多有風爭賣,
大$50, 小$45...如果大家屋企有的話, 帶過來玩便可以慳返少少.
士多前有姨姨賣海味, 茶果...SY:「快D行啦, 媽媽去咗前面買雞泡魚喎」
心想:「雞泡魚? 買嚟做乜呢?」, 阿太:「個老闆話係真雞泡魚做嘅標本嚟吖...我諗住買嚟畀我D杯緣子」(又係為杯緣子影相用)
塔門名物是海膽炒飯及炸墨魚丸, SY問:「爸爸...E度有三間餐廳, 邊間先係呢?」
三間餐廳聚集在一起, 分別是「新漢記」, 「新有記」, 「新惠和」, 三間均售相同的食物...
依莉說:「新惠和門口好似多D人等, 不如就食E間啦...」(好呀!) 而我認同的原因, 正正就是新惠和門口, 有姨姨不停製作炒飯...影影影.
不過, 可能我吃慣海膽手卷, 如果與海膽炒飯($100)比較, 感覺海膽份量不夠震撼.
當然, 金黃色的炒飯的確吸引,
而且以炒飯來說, 相當有水準, 只是落海膽來炒, 則變成沒有了海膽的濕潤, 黏稠的口感...
阿太:「你係米以為炒完飯, 再一大板海膽舖上面, 好似手卷咁呢? (我:係喎!)你就想~」
之後我們還點了海膽煎蛋三文治 $40, 雖然海膽份量也不算多也不算少,
但因為有蛋醬的配合, 這個三文治較炒飯來得更好味喎.
吃飽飽, 我們便沿路往天后廟出發往塔門大草原營地...不過竟然給我在天后廟前, 發現有我最愛的涼果..
涼果姨姨:「試吓我哋D冰梅啦...蜜糖柑桔水都可以試飲呀! 小朋友, 你唔夠可以添比你, 唔好揼咗隻杯就得啦」
冰梅真的好食...我後悔只買了一包, 因為我公司附近的涼果店, 竟然是沒有冰梅買的...嗚~嗚~嗚!
時間為15:20 我們正式踏上天后寶樓牌坊,
沿左邊小徑步行約 15分鐘去大草原...
SY:「唔知難唔難行呢?」
我:「應該唔會難行啦, 全部都有路, 又唔係行山....」結果, 可能10分鐘, 我們已經登上了大草原...真的是一望無際的大大大草原呀!
不停拍手的SY大叫:「好靚呀! 好大個草原呀! 」...塔門草原又被稱為「弓背山坡」, 親眼望到真的「弓起」, 十足十寒背的駝峰.
居高臨下遠眺山下無敵海景, 天公造美帶給我藍天白雲...這一刻, 自己也忍不住大叫:「E度真係好靚呀!」
此時SY又興奮大叫:「大新聞! 大新聞! 隻牛走咗去哥哥姐姐個帳幕度呀!
哈哈」
說時遲那時快, 大牛又已經走到另一邊...SY笑過不停:「佢又走咗去人哋野餐嗰張地墊度喎....哈哈哈」
之後依莉便與SY三人齊齊放風爭, 老實說, 我肯肯定我20年沒有放過風爭...但Raymond說:「E度放風爭真係勁易, 因為大風到唔駛拉線, 隻風爭自己都升咗上天Lu」(咁米好囉)
玩罷風爭, 我們便由觀景台沿小徑往下走大約3分鐘便到山崖底的小石灘.
SY:「哦! 咁多石頭, 所以頭先路牌寫住疊石」(正確應該係「呂字疊石」), 不少情侶, 家庭也坐在石頭上看海看浪...
石灘的石頭有分大及細, 大草原下的石頭較細, 愈往右邊方向走, 石頭就愈大...
SY:「爸爸! 你快D行啦, 我想去前面高高嗰度坐呀!」(咁你去啦...我影你)
原來, 一直向右邊走, 就會發現一個大草坡...大家也會沿大草坡爬回大草原.
其實, 有時我也覺得SY精力過於充沛, 朝朝一早便起床, 每日不停跑跑跳跳,
3-4層樓高的大草坡, 他一下子便爬了上去....救命的好體力!
坐在大草坡往下看, 絶對心曠神怡, 非常治癒的好地方是也.
因為, 我們要乘坐17:30坐, 開往馬料水的尾班船, 所以我們17:00便跟大草原說:「再見」, 阿太:「D人係度露營, 夜晚咁大風咪好凍囉」(所以, 我都係鍾意屋企張床多D)
走上走落, 肚又開始餓...回到碼頭前, 我們便決定醫一醫肚吧! 塔門炸墨丸我們還未試,
因為即叫即炸....SY在等的期間, 又食冰菠蘿, 又食雪糕...(點解阿囝可以食咁多嘢嘅呢?)
原來, 塔門是一個非常早休息的小島...3間餐廳只剩新有記未關門...不過, 剛才 $70/13粒的炸墨丸, 這裡便要$75...(沒辦法...貴$5都要試吓啦)
一打開外賣盒, 阿太:「嘩! 好香喎」, 我:「仲有一包醋畀我哋添喎...」
SY試了一口:「好好食呀!」, 我:「超級彈牙, 又香口...好食呀! 點少少醋仲正...早知頭先買多一盒啦」
原來, 小小的塔門, 可以休休閒閒的走4小時, 本來以為不夠時間, 經過今次之後, 下次來可以更慢活, 更Hea...因為坐不到回馬科水的船, 還有到黃石碼頭的快艇呀!
您的文章很正,內容很實用又有養份,謝謝您!!
回覆刪除謝謝
刪除