網頁

2017年4月15日 星期六

【半天文青遊】輕鬆逛鹽田梓 @ 西貢

朋友問我:「無端端點解要去鹽田梓? 有咩玩呀?」因為我想逃離石屎森林, 又只想輕輕鬆鬆, 零難度行山享受大自然...


長洲, 大澳, 梅窩去到悶...所以今次揀去距離西貢市約3公里, 一條絶對有保育價值的客家村落「鹽田仔」.


原來, 西貢碼頭有不少船家也可以去鹽田仔, 但專為往返鹽田並包括參觀導賞費用的, 就只有通記對開好姐...



負責人推介:「你哋會唔會係入面食埋晏呀? 如果係就記得要訂定隻土窑雞呀!



當日, 我們坐最早一班船入村, 10時開船15分鐘便到逹. 朋友說:「平時我瞓到12點先起身, 今日晨早就嚟到西貢陪你」(我知你唔話得喇!!)



我問船家:「鹽田梓大唔大架? 我驚我無氣力行晒, 你哋5點就最後一班船嗎?



船家笑笑口:「慢慢行都係45分鐘就行得晒鹽田仔有幾大吖!!放心啦...細路仔行都無問題嘅」


剛巧有熟悉鹽田的叔叔同船, 我們一同上岸, 他向朋友講解:「鹽田梓有300年歷史, 全村莊都姓陳, 係客家人信奉天主教」



原來這條純樸的小村莊, 保存了不少從前的鄉村味道, 忽然間感到自己很老文青喎!!


我們第一站便走到有97年歷史的澄波學校, 門外有義工姐姐在賣鹽製手信:「全部都係我哋義工親手造架, 收益就用嚟維修村內文物, 同建築」



小吊飾內的鹽特別粗, 義工姐姐:「真係我哋鹽田梓出產架...」朋友於是買了一個十字架$30.


原本是村民的小學, 現在變成為文物館, 從前村民的日常用品也一一展示出來.



SY:E度咁似我學校嘅?」根本從前這裡就是學校呀!


阿太:E度好得意呀...有齊接新娘的行程及項目..., :「係喎!! 又話E度係學校嚟嘅? 點解會教接新娘呢?



因為這是記載著鹽田梓村的歷史故事, 昔日村民生活的日用品的真‧保育館吧!



澄波學校旁邊就是建於1890年的聖若瑟教堂, 聞說內裡的玻璃畫是一名學生, 製作出來記念十九世紀來鹽田仔的神父...


不過, 進入教堂記得要安靜, 否則像我吵鬧喧嘩的話, 最終會被工作人員勸戒, 之後還是尷尬的離去.



離開教堂, 我們聽到好像有女士們在鬧交...「喂!拜拜...走啦你...!收聲啦...有隻雀仔跌落水」


當我們走近聲音來源, 原來是頭鸚鵡, 牠會不停自言自語, 阿太:「好彩係日頭咋, 如果係夜晚真係會被佢嚇死」



之後, 我們沿山路走上山頂, 簡簡單單的不用10分鐘便可以到逹頂端的小涼亭.


:「嘩!好靚呀! 真係一望無際呀!」阿太:「原來望到對面有個哥爾夫球場架」


假期可以毫無難度的享受居高臨下的風景...忽然覺得人生是多麼的美好!



走過高山, 往下而行5分鐘, 便到達如同拍攝TVB劇集一樣的玉帶橋. 小朋友很興奮的向前跑...SY及悅悅:YOHO!!, 阿太們:「你哋小心D跌咗落海呀!!


站在橋中央, 四面被大海與山間包圍, 頓時會感受得到鹽田仔三代人共同努力舖出連貫兩島的小路. 這就是「斜陽玉帶三代橋」.



正當我非常享受海天一色之際, 阿太催促說:「你又話要去聽鹽田導賞, 11:30, Miss咗就要等到14:30喎」


於是我們便急步走回剛才的鹽場, 看看昔日鹽田的風貌...(哎呀! 我哋遲咗呀! 導賞已經開始咗喇)



聞說開村先祖設田曬鹽為生, 產鹽則以水流法, 藉潮漲時海水經水閘流入鹽田, 多餘海水由另一水閘排出, 經過日曬風吹, 便產出海鹽.


導師說他們全部都是義工, 只是公眾假期才回來, 所以平日鹽田仔已經沒有人居住.


:「咁你係米姓陳呢?, 導師回味道:「唔係! 我太太就係, 50年前我追佢嗰陣, 入到嚟拍拖, 一齊睇星星, 捉魚, 鹽田仔真係好靚」



隨著導師的眼神遠望鹽田, 情景太似17年前的「茶是故鄉濃」, 遠處應該會有林家棟, 張可頤漫步入鏡吧!


之後, 導師推介:「嗱! 你哋坐係鹽田邊, 影埋海水D倒影, 好靚架...好似上年嗰套「那些年」嘅海報架...



「那些年錯過的大雨, 那些年錯過的愛情, 好想告訴妳 告訴妳我沒有忘記」, 愈來愈愛上鹽田仔這個地方!


拍照後, 剛剛好便到了我們預約的午飯時間土窑雞 $298, 菜脯煎蛋 $78, 豬頸肉飯 $58



價錢貴就是貴了一點, 但離島價錢, 大廚又專誠走入來煮給大家吃, 貴少少也沒有所謂, 一次半次吧!


老實說, 這隻雞真的又嫩又入味, 如果只想少食多滋味, 可以只訂半雞...不過, 豬頸肉飯則只屬不過不失.



我懷疑SY遺傳了我的潔癖性格...因為他吃完飯竟然主動向我提議:「我可唔可以去掃一陣地呢?


小小的鹽田仔, 我們又差不多走馬看花行了一圈...但還未到14:45回程船, 於是我又提議, 不如來過甜品吧!



碼頭旁邊的茶座, 有茶果, 有砵仔糕, 有豆腐花, 有小食...SY:「我要豆腐花...」工作人員說:「食茶果啦! 全部都係我哋自家造嘅, 客家茶果」



阿太:「紫色係咩味呀?,叔叔答:「紫心蕃薯, 黑色係雞屎籐南瓜入面係紅豆, 原來係咁嘅色, 出嚟就係咁嘅色」



茶果足料又夠香, 煙煙韌韌是不錯的, 如果不是冷了, 有一個蒸爐不停保溫, 熱騰騰的應該可以有100分呀!



親親大自然4小時又完結, 朋友問:「開心麻有我哋陪你嚟郊遊?



我答:「梗係開心啦, 不過下次再嚟, 揀坐12點班船, 之後食飽飯, 先參加14:30導賞團, 再輕輕鬆逛鹽田, 17:00最後一班船返西貢就最Fit, 因為今日真係超早呀!


鹽田梓唯一餐廳訂炭燒土窑雞 : 94674448

鹽田梓查詢:
電話:2791-6226
網址:www.yimtintsai.com

$50 來回船票包參觀費用 (2017年1月1日由$45加至$50)
西貢碼頭坐15分鐘街渡即可到逹.


周末及公眾假期: (通記酒家對面上船)
10:00 11:00 12:00 13:00 14:00 15:00

回程:
12:20 14:20 16:00 17:00


大仁生活facebook

沒有留言:

張貼留言