因為「街市遊樂團」, 上星期五, 阿太說:「不如聽朝早去新填地街食點心囉!!」
SY:「樓下米有壹點心囉...(太:「親親我好媽」嚴太, 同「愛‧回家」龍景峰都食架喎)...咁...我要去, 我要」(阿囝遺傳了我的電視迷基因)
我:「不如去食下午茶啦...點解要咁早去?」, 阿太:「人哋唔係你呀, 12點之後就無腸粉食, 3點閂門添呀! 總知你聽朝10點起身啦」
晨早空氣清新開朗....我們由佐敦地鐵站行至新填地街街市...阿太:「我仲以為係永安後面個大排檔,
原來炮台街隔離仲有一個大排檔喎」(係囉...我都係啱啱先知)
一抵達波記咖啡大排檔, SY即時大笑道:「係E度啦, 你睇麥包都係度...」
阿太:「好彩未到12點, 師傅仲係度拉緊腸粉」, 我們點了牛肉腸($19).
師傅在蒸汽籠罩的廚房不斷拉製腸粉, 我問:「點解12點後會無得食腸粉嘅?」
師傅一邊工作一邊答:「我哋午市改做盅頭飯,
腸粉都賣唔到錢, 因為我哋得一個罉, 唔夠爐呀!」 (原來是現實問題!)
SY由坐位走來門口找我...看到師傅前的大蒸籠:「嘩!好大個叉燒包呀!」
負責人阿茵答:「E個係雞球大包, 唔係叉燒包」, 我:「E家好少有大包食, 以前跟爸爸媽媽去酒樓就成日食...我要一個」
這裡的牛腸絶對無敵, 餡料足足相等於一籠牛肉球的份量...SY:「D牛肉真係好好食, 仲要多個樓下點心舖好多好多添呀」
雞球大包 ($14), 如此便宜的價錢, 如果早餐點一個已經可以飽到下午茶, 我:「嘩! 阿太...妳睇!真係成舊雞肉同埋仲有一大舊妳最鍾意嘅咸蛋黃添喎」
阿太:「你睇個蝦餃, 賣21蚊...隻隻都有三隻蝦, 真係好鬼大隻...」, 我:「咁就真係哈!哈!哈!啦」
SY:「爸爸! 你快D同姐姐傾計啦, 佢上次都同嚴太 (江美儀)傾計」... 知我者莫若仔也
我問阿茵:「好少女仔會做大排檔喎! ?」, 阿茵:「其實我都係幫手, 不過, 我想將從前香港地道的口味,
帶返比街坊. 你唔覺得E家已經愈嚟愈少舖頭, 可以畀我哋食返細路仔食到嘅味道咩? 」
老實說, 現在點心店開滿街,
但真的可以令人有回憶的感覺, 少之又少, 在大排檔吃點心, 非常溫暖...
阿茵:「E個排檔1978就起好, 我細細爸爸就帶我同細佬嚟食晏, 食完就返學, 以前唔係坐入嚟呀, 因為E家我哋入面有十幾個檔位, 所以座位全部係放晒出行人路」
阿太:「我覺得E度好有當年爸爸媽媽星期日帶我落樓下大排檔飲茶嘅感覺」, 阿茵:「係呀! 我就係想畀一班街坊, 可以有一個聚腳地, 又可以嘆一盅兩件」
我:「E度好呀! 抵食夾大件...」, 阿茵:「E個區D街坊都比較上咗年紀, 咁我哋都做返街坊價錢, 等大家都食得開心D囉」
其實, 我只是跟阿茵傾了3分鐘...SY及阿太已經將我的西多士 ($17) 吃剩3片...我:「吓? 我傾咗一陣咋喎...你哋食晒我碟西多??」
SY:「爸爸...仲有3舊」, 阿太:「我食多舊, 你食埋E兩舊米得囉...真係落D糖膠, 加D煉奶又幾好食喎」(你哋食鬼晒...真係好食得過啦....)
波記咖啡
地址 : 油麻地新填地街35-39號新填地街熟食小販市場1-2號檔
電話 : 2332 4285
時間 : 星期一至六: 06:00-15:00
大仁生活facebook
沒有留言:
張貼留言