懷緬過去常陶醉, 想到舊事...正正就是我這個大叔愈來愈愛做的事.
所以, 當我知道長沙灣有工廈, 完全重現我童年時代的士多, 我簡直想搬入去住.
今日, 士多內阿太說得最多的一定是:「我以前有過E隻鉛筆鉋, 我好似抽過E款手錶仔, 嘩!E對溜冰鞋, 我真係有過...」
SY:「媽媽, 你好似乜都有過咁嘅?」, 我答:「不過, 乜都揼晒啦, 所以, 儲嘢唔好揼嘢, 真係好有用, 起碼E家唔駛講以前乜乜乜啦」
舊士多有玻璃活門雪櫃並不令人驚訝, 最喜出望外的竟然是維他忌廉,
維他奶, 綠寶的玻璃瓶內, 依然有當年的飲料.
我決定今日開始儲齊維記, 十字牌, 牛奶公司樽樽奶...在場有參觀者說:「$10支綠寶好抵, 我上次係第二度買要$50一支」
負責人Kinson問:「咁你有冇買? (少女點頭說:有)」(嘩!$50蚊買一支泰國新版綠寶算頗貴)
Kinson:「咁儲返幾十年之後就好有價值啦」(咁又係)
「美樂士多」內有兩部非賣品坐枱式電子遊戲機. 正正就是當年我不吃午餐, 為省下飯錢去學校附近士多, 用來玩食鬼, 打太空保衛者之用.
Kinson:「我見你帶埋囝囝嚟, 專登開畀你哋玩下, (真係架? 要唔要收唔收錢呀?) 梗係免費任你玩啦」
今日, 更加第一次見到第一代坐枱遊戲機的「內涵」...原來真的是一部小小電視機藏身於木枱內喎!
SY玩過不停, 我很怕他會太大力, 弄斷了操作杆, 我說:「你小心D呀, 哥哥話由日本寄返嚟運費都要萬幾蚊呀...你整爛咗我真係無錢賠喔」
我問:「E部機係1978年嘅, 你覺得Pokemon好玩, 定佢好玩呢? (SY:一樣都好玩)」, 看來小朋友可以玩便已經心滿意足喎.
之後, 我發現士多內掛滿了當年的宣傳掛牌...
記載著從前有過的活動的資料卡, 正正就是我這個垃圾佬的最愛,
飲屈臣汽水可以換Lego...現在屈臣也不知去了那裡了.
飲百事揭中蓋掩可以有永安百貨公司幫你「找數」, 頭獎一萬元, 70年代一萬元可能可以做首期了嗎?
還有珍珍薯片, 及沙士...從前有雪糕車的叔叔介紹我買沙士, 好記得他說:「飲完會有一股氣衝上鼻, 仲好飲過可樂」, 但現在的沙士已一早沒有了當年的效果.
今日, SY坐上上海理髮店的皮製剪髮椅上,
就當成瀡滑梯一樣玩, 我說:「大佬!E張係古董, 唔係瀡滑梯呀」,
SY:「乜唔係梳化嚟咩?」
接著小朋友對打字機非常感興趣, 他問:「爸爸! 點解中間嗰度會一路向左邊去嘅?」, 玩慣電腦的小朋友, 可能一時間也不會明白喔!
店內還有一台懷舊戲院磅重機, SY:「等我除咗對鞋試下先...」(你又幾心水清...知道對鞋有重量喎)
最後, 有幸遇上Kinson的拍檔Patrick, 他說:「我以前住筲箕灣, 屋企對面正正就係有一間士多, 我成日都流連嗰度, 所以我好想重現當時的生活」
一走入美樂士多+雜貨店, 絶對似是坐了叮噹的時光機回到從前一樣, 樂而忘返原來我們又玩了約3小時.
雖然, 我們沒有購買任何物作,
但這個下午卻重拾大量童年回憶, 我問SY:「你悶唔悶呀? D嘢你全部都唔識喎」
SY:「我鍾意打機, 仲有得飲汽水飲, 梗係好玩啦...仲有扭計蛇同D扭蛋都好得意...」(看來...玩具真係無時間限界喎)
臨離開前, 我發現了我的最愛小露寶,
Patrick說:「其實, E個小朋友係我嚟, 當年屋企人帶我去影機影嘅」(嘩! 你連件衫都係小露寶...你就好啦)
營業時間： 星期一至五（1pm-6:30pm）星期六（2pm-6:pm）星期日及公眾假期休息
地址：長沙灣青山道500號百美工廠大廈12C（顯示地圖）
查詢：9223 8538
大仁生活facebook
沒有留言:
張貼留言