【有得點唱】家庭Feel素食快餐店 @ 高高望灣仔

食肉獸都會去食素? 當然吸引我的除了特別下午茶之外, 還有駐場歌手獻唱.

快餐店食齋, 有得點唱, 又可以無限發呆望街景, 不會有人趕你走, 絶對無敵之選.

這個素食店位於大有商場斜對面2樓, 我對SY說:「以前E度係聯誼會嚟, 我成日同D同事嚟食晏, (SY:咩係聯誼會?) 可能真係上世紀遺物, 今時今日都好似唔多再見到有」

甫一走入食肆, SY便走到水牌前大叫:「嘩!真係同大家樂差唔多, 爸爸! 我想食叉燒飯」(下午茶4點幾, 不如食小D啦, 我驚一陣食唔落飯)

原來, 這裡平日所有食物都有8折, 周末就沒有, 店員:「不過星期六, 日, 我們有駐場歌手唱歌, (E家無嘅?) 頭先中午, 同一陣六點開始」

這裡有一大片玻璃, 可以望到莊士敦道, 菲林明道, 灣仔道車來車往的情況, 百無聊賴望著別人來來回回, 原來又有少少寫意.

如果平日夜晚來吃三餸飯, 有例湯, 有紅麴飯, 只是$50 (八折)又真的很抵食喎. 而今日我們點了素餃子 $32/5隻.

SY:「E個係白菜豬肉, 定韮菜呀?」我本來有點害怕奄尖的小朋友會嫌棄素餃, 誰知他發現不是豬肉, 也即時大叫:「好食喎, 仲好食過八方雲集喎」

我覺得很有當年小朋友伯父伯娘家吃到的味道:「D餃子真係好有家庭Feel! 真係好食」

夏威夷Pizza$48, 原來素Pizza與平時食開的Pizza Hut分別也不會太大, 可能肉粒, 火腿也不是佔大多數吧! 不過, 我還是愛餃子多些.

之後就來一碟兩個似蛋撻, 而是由椰奶扮蛋黃的蛋撻 $18/2件. 我專登不告知SY便問他:「好唔好食呀?」

小朋友不停食:「梗係好食啦...(平時D好食, 定E個好食?), E度好食好多」, 一向不愛椰汁的SY竟然吃不出這個蛋撻不是蛋造.

我告訴了真相後, SY死撐說:「我唔鍾意飲椰汁啫, 椰奶變做蛋撻就唔同啦!」

原個南瓜布甸 $35, 因為一老一嫩也不吃南瓜, 我估計如果大廚可以將南瓜外形變做叉燒包, SY應該會肯被騙地KO了整份甜品的.

這裡真的很健康, 就連西米椰汁糕也只佔一半, 另一半就全是南瓜肉, 我覺得似食頭盤多於甜品喔!

吃完了下午茶, 還未到點唱時間, 我們又坐了半小時, 杯緣子專家左影右影之後, 我們決定過188巡視業務, 晚飯時間再回來.

所以說這裡是非常Hea的快餐店, 我們再走上來, 沒有再點任何食物, 只為聽Christine唱歌, 亦沒有人理會我們.

原來, 很多熟客也為了跟Christine點唱而來, Christine:「小朋友你鍾意聽咩歌?」(佢都唔聽歌嘅, 求其一首兒歌啦).. Twinkle,Twinkle Little Star就是Christine送給SY的.

最後, Christine又唱了似水流年...食快餐都可以聽真人唱歌, 真享受. 不過煲劇王SY臨走前問我:「不如叫姐姐唱愛回家之八時入席得唔得?」(吓? 咁唔夾, 我唔敢講出口喎)

愛家素食 Loving Hut
灣仔灣仔道93-99號聯泰大廈2樓
2574 3248

大仁生活facebook