【日本青提~果欄最抵】「長野信州」Vs 「岡山晴王」大比併

「是咁的」....話說上星期三走到灣仔新開業的築地朝聖, 臨走前發現有超澎湃, 又肥大的青提售 $358. 心想:「嘩!食咗曉飛咩...」

當晚又順路經過中環結志街一果檔, 竟然發現這份由日本長野信州來的香印青提, 只售$250, 阿太說:「你去油麻地果欄一定仲平, 你信唔信吖」

於是, 今日放假便走到果欄, 嘩! 果然相同的香印青提, 只售$150 - $180 不等,  我問伍記欄Eva:「其實點分架? 點解仲有個貴D嘅岡山晴王呢?」

姐姐好好人答我:「長野香印價錢係大抽, 同細抽嘅分別, 佢個味道帶茉莉花, 不過甜度無晴王咁高, 晴王就帶荔枝味, 仲有禮盒裝添」

格價專家格盡果欄, 最平最包滿的青提都是伍記欄,  不過晴王禮盒裝$260, 無盒就$200, 我無理由多花$60買一個吉盒吧??

Eva:「送禮就買有盒囉, 你自己食無所謂啦. 老實講, 個盒係日本嗰邊收我哋, 唔係我哋收貴你架!」

(近排E啲青提好HIT喎, 新返貨? 係米無人再食巨峰?) Eva:「咩新返呀? 賣咗幾年啦喎, (乜我咁OUT??) 巨峰D人嫌太過酒味, 所以食青提囉」

回家後, 急不及待要試食無核青提, 心諗:「咁大個人都未食過咁貴嘅提子」. 其實, 以外貌來看, 便宜一點的長野信州青提更飽潤, 更似打了BOTOX.

SY試食完後說:「其實, 兩粒都差唔多喎, 分唔到」....阿太又試:「 晴王勁多汁, 但太甜...有D乸喉, 我鍾意比較清, 無咁甜嘅 香印青提」

至於我則愛香印的實實在在, 但晴王多水多甜又好像更吸引...很難取捨喎!! 

但當食多三, 四, 五, 六粒後, 晴王高分少少, 因為我愛甜一點呀!

PS: 因為果欄的彩虹奇異 ($50), 又較築地 ($83) 便宜得多, 於是我又買了一袋回家.

 可能, 以這個價錢, 我還是覺得百佳$12.9的更大, 更甜...彩虹的只有靚靚內在美, 又細, 又酸呢!!

伍記欄鮮果皇
地址：油麻地石龍街1號
電話：6536 6332
時間：星期一至日1000-1900


大仁生活facebook