今日我們又到科學館玩，走到門口時SY問：「係咪又睇狗仔放臭屁？」 我：「今次『生物多樣性』仲好玩，仲多嘢玩呀！」
聯合國宣佈2011-2020年為「聯合國生物多樣性十年」，希望大家認識保護生物多樣性的重要，同時鼓勵我們積極愛惜當前生物多樣性以減緩它們喪失的速度。
還未開始走入展館，SY已經被入口「本地生物多樣性」區的「捕魚攻略」電視遊戲吸引著⋯⋯第一次試玩後，被扣60分，我說：「哦！原來唔係條條魚都可以捉呀！細魚唔可以捉，瀕危絶種魚又唔可以捉呀！」
認識保護罕有魚隻後，SY便愈玩愈開心：「原來細魚游游吓，會變大魚呀，咁就可以捉囉⋯⋯爸爸！你睇165分~Yeah！」
開心指數:★★★★✰
本來不停捉魚的小朋友，當他發現我正在對面「蝴蝶畫室」畫蝴蝶，竟然又放棄捉魚走過來問：「爸爸！你係度做咩？」
我：「自己畫一隻屬於自己嘅蝴蝶，之後一㩒個制，你畫嗰隻蝴蝶就會飛出嚟喇！」
其實，自從K2後SY已經對畫面不感興趣。但這個裝置設計得非常正，望著自己孕育的蝴蝶，暢遊大世界，勁有滿足感。SY：「爸爸，我覺得E隻靚過我頭先畫嗰隻。」開心指數:★★★★✰
「海豚及鼠海豚骨骼」可以自己砌出海豚，SY：「乜原來海豚都有分鼠海豚同海豚喎。」，我：「係囉！原來睇佢個咀同背鰭喎，我都係E家先知咋。」
「世界生物多樣性」區，不少大朋友、小朋友也愛走入大樹屋內「聆聽大自然」。SY：「E度係聽音樂呀！」
我：「點解你聽音樂，聽到咁驚？」，SY答：「佢唔係音樂嚟喎，係落雨行雷喎，有好多聲揀嘅，我哋聽吓森林蟲叫，好唔好？」（風吹樹葉的沙沙聲，混同蟲蟲叫聲，好Relax）
大樹窿旁邊有一個「適者生存」問答互動機，其實，我們可以從8款備受保護的動物中，揀出一款去認識牠們⋯⋯
SY：「爸爸！原來答啱晒就會出Video，答錯就無得睇Video⋯⋯」，我：「你咁叻答啱晒4題？」
SY非常囂張的答：「我頭先專門揀企鵝嚟答，答咗3次就啱晒啦⋯⋯嘻嘻嘻。」（答三次⋯⋯都真係叻嘅）
大樹後有一個很廣闊的「森林小徑」，沿路上、樹幹中、森林旁都有叢林小生物的介紹，SY不停在小徑上走來走去，直至我叫他嘗試參與一下樹中的小遊戲。
我：「你睇下個樹窿仔，你可以伸隻手入去，估下有D咩架喎⋯⋯」，SY：「吓？ E度有隻飛蛾嘅相⋯⋯我唔敢摸，我驚喎。」
其實， 這只是亞馬遜熱帶雨林生長的巴西堅果而已， 我要親自拿出來給小朋友看， 他才放心再去試其他的樹窿⋯⋯已經是小學生啦，看來真的要想辦法去鍛鍊一下這位小童的膽量。
開心指數:★★✰✰✰
「時光變遷」主要集中玩DNA，對於一個半世紀前念文科的大叔，一聽到DNA只會想到TVB劇集驗親生爸爸之用，但這裡就將DNA融入遊戲當中。
「DNA狂舞派」正正就是當年機舖盛極一時的跳舞機⋯⋯SY：「原來，有A，有T，有C，有G跌落嚟，我就踩返地下個英文字⋯⋯好玩呀！」
阿太：「我都一齊玩啦⋯⋯」，SY：「唔得呀！一個人玩架咋⋯⋯」
旁邊有三位中學生竊竊私語：「A同T一齊，C同G一齊，A-T之間有兩條氫鍵結合；G-C之間則有三條，應該係⋯⋯」其實，我完全不知道他們說甚麼，我們只知當跳舞機來玩。 開心指數:★★★★★
我對SY說：「你睇E個好似拔河嘅遊戲幾得意⋯⋯」，
原來這是「動物基因組」，用作展示不同動物在一個細胞中的DNA長度。
SY：「蝙蝠係65CM ，袋鼠最長呀！140CM ，人就係116CM ，爸爸！其實係咩嚟架？」我：「人類有23對唔同嘅染色體，應該係佢哋拉成直線掛⋯⋯」其實，當我還未解釋完，小朋友已經拉了媽媽去旁邊砌DNA積木⋯⋯（激死）
這個「生命中的結構方塊」積木遊戲被SY說為「好高科技」，其實是要找出正確的積木面，再轉動它至正確方向，用實體代表氨基酸的積木去結合屏幕入面的蛋白質。
以為自己真的砌積木的小朋友：「媽媽⋯⋯你要搵啱圖案，佢突出嚟係紅色，你就要搵返相同形狀囉⋯⋯知唔知？」（好似係人嘅蛋白質結構單位，唔係真係以為積木呀？）
開心指數:★★★✰✰
最後的「自然實驗室」，則要配合周三和周末的指定時間，就可以參加不同主題的生物多樣性工作坊，今日是George老師教大家用五官認識生物多樣性。
George老師：「我畀大家聽一聽五種雀仔嘅叫聲，之後大家要答返邊隻係點叫喎！」
原來，要分辨相思、麻雀、七姊妹的叫聲一點也不易，我就連豬屎渣也誤以為是相思⋯⋯SY：「爸爸！ 真係渣⋯⋯無禮物！」
後來George老師也很好人，每一位小朋友，不論答對與否也可以製作香包：
「E度有7款天然嘅防蚊香料⋯⋯我哋就覺得香，但係蚊蟲就好唔鍾意E啲味⋯⋯」
我問SY：「你鍾意邊一款呀？」，
SY：「艾草就最軟腍腍，小茴香就最香⋯⋯E個香茅⋯⋯爸爸⋯⋯唔係應該係豬扒咩？」
George老師：「係呀！真係平時我哋食香茅豬扒D香茅呀⋯⋯哈哈哈⋯⋯不過，E家未煮唔食得。」
臨走前，SY又再要求多玩一次「捕魚攻略」，SY:「E個Number 1最好玩！畫蝴蝶就第二名，跳舞機就第三，（我：我鍾意做香包喎！）， 如果食得嘅包，我就鍾意D囉！」（唔通係科學館做叉燒包咩？)
日期：星期三、六及日
時間：下午2:00及3:00（每節約30分鐘）
地點：科學館地下生物多樣性展廳自然實驗室
語言：粵語
工作坊有不同主題，可瀏覽 http://hk.science.museum/zh_TW/web/scm/pe/bdg/activities.html
導賞團：
日期：星期六及日
時間：下午1:15及3:45（每節約25分鐘）
地點：生物多樣性展廳
語言：粵語
名額：每節15人
註 ：於「生物多樣性展廳」入口即場報名（先到先得）
科學館開放時間
星期一至三、五：上午10時至晚上7時
星期六、日及公眾假期：上午10時至晚上9時
星期四（公眾假期除外）、農曆年初一及二休館
大仁生活facebook
沒有留言:
張貼留言