【葵芳誠意小店】超值串燒‧海南雞飯 ! 真‧泰Magic

超高興!! 因為網上識認了葵芳地膽, 她留言說:「蘇折對面新開咗間平, 靚, 正串燒, 我已經食咗5次, 佢哋D海南雞飯仲正」

地膽推介即時要去試食, 晚上7時, 老闆楊先生正坐在店內享受著陳百強的一生何求.

我們三人走近, 老闆即時起來有禮貌的說:「歡迎! 想食串燒?? 坐坐坐! 我即刻整畀你哋食」

(老闆你一個人開舖?) 楊生謙虛說:「唔係! 我乜都唔識呀! 我幫我老婆手咋, 醃肉, 切, 煮, 全部都係佢, 我只係你哋要咩, 就燒出嚟, 手板眼見功夫」

(咁楊太又識整泰國嘢呢?) 老闆一邊燒肉一邊說:「佢係泰國人嚟咗香港30年, 我之前做食都做咗30年, 不過唔係廚, 係營運, 所以落手落腳燒都係得一個月咋」

真材實料又夠抵... 龍眼冰的龍眼多過冰, 老闆對推:「我老婆秘製有三款泰式醬, 不過我建議你食原味, 我自己都係就咁食」

雞金翼, 牛肉, 司華力腸各$13, 茄子, 雞腎, 雞骨更便宜, 只是$11...老闆說得對, 原味已經肉味超出, 可能你想多點刺激, 那秘制醬溫純, 不會太搶肉味.

老闆:「畀你試下個魷魚翼, 我平時得閒都自己燒嚟咬, 好爽; 我食牛肉都唔鍾意點醬, 根本已經好夠味」(係呀!係呀!魷魚翼真係好好咬)

燒到香噴噴又超有肉味的串燒已經又平又好食, 而更有仙氣, 更超值, 更無敵的一定是海南雞飯.

阿太:「旺角賣$70, 「又鞋又叔」完全唔得」, 泰村的海南雞滑嫩得似十足NewBornBB一樣, 有雞味的雞飯買少見少...最黐線竟然只賣$30, 仲送飲品一包.

(咁平點做呀? 老細) 楊生:「我哋本來想做街坊同學生意, 因為附近有5間學校...(嘩!咁一定大受學生歡迎啦), 無學生嚟食, 因為我哋做外賣, 得三個位, 無冷氣, 學生去晒隔離食啦」(吓???)

食到尾聲, 楊太終於忙完樓上小菜, 她竟然送了一碟芒果糯米飯($30)給我, 阿太:「嘩!好靚呀! 個飯係心心嚟呀」

楊太:「我自己諗架...因為一舊飯會好悶」(同我影相鍾意襯啲Bearbrick一樣...等阿太仲成日話我九唔搭八, 點綴呀!)

一向沒有飯氣, 又不愛芒果的SY竟然跟我搶食...我:「你平時望都唔望一眼喎??」SY:「甜品嚟吖, 點同平時D飯...好好食呀! 可唔可以叫多碟?」

淡淡而香的椰汁, 竟然沒有搶走芒果的甜...其實樓下餐牌點解沒有這款甜品, 老闆娘請食又唔好意思叫多一碟, 下次一定要一人一碟先夠喉.

今晚超高興, 因為有誠意, 又好味小店很難找, 老闆兩公婆又好傾, 又好人...

臨走前楊太問SY:「你知唔知我哋英文名叫咩呀? (囝搖搖頭), Thai Magic, 下次再嚟好唔好?」, 一定!! 一定!! (如果我中咗六合彩, 一定搬過嚟仁芳街住, 到時晚晚「泰咩直」)


泰村美食 Thai Magic
葵芳仁芳街11號地下
2111 1378


大仁生活facebook