32度的晚上, 只有風扇陪伴, 但一家三口在沒有冷氣的「和宜合道熟食市場」食到超滿足, (不是廣告)「満足食堂」絶對沒有改錯名.
前日阿太好興奮給我看:「我偶像Mukoangie話佢日本朋友開咗間食肆, 我哋快D去試啦!」, 於是, 昨晚便來到這個由兩名日本大廚主理的高質素, 街坊食堂.
佐藤師傅2004年便經由日本公司派到香港工作, 所以廣東話識聽又識講, 我問:「點解你會揀E度開食堂呢?」佐藤先生:「E度平租, 試一試先啦, 不過無冷氣, 同只有14個位置好細.」
其實只要好味道, 我又不介意沒有冷氣. 而且佐藤先生更會準備冰涼綠茶, 免費任添任飲, 消暑一流...SY:「爸爸!! 可樂都係$5...好抵」(可樂怪, $10蚊你都話抵架啦)
澳洲和牛$88(100g ) , 阿太第一時間點選, 她超高興:「抵呀!抵呀!真係入口即溶, 出面無$150都唔駛旨意有得食啦」(佢真係流晒口水喎)
自己燒自己食, 這四片和牛實在太香, 應該單靠海鹽吊味, 一放一入口, 牛味已經漿實整個口腔,
阿太:「唔駛點蘿蔔蓉, 用一啖飯嚟送, 再飲啖梅酒, 人生一大快事」
SY:「個湯都好好飲...(係喎!唔係普通味精麵豉湯),
我覺得我好似小丸子, 朝朝都飲麵豉湯...」(原來, 食堂的湯每日不同材料,蛋花海草,蜆,薯仔,洋蔥...今日是豆腐加海帶)
阿太:「哎呀! 澳洲和牛原來有3人份量呀! $258咋...早知叫啦...抵咁多, 有成15件, E家唔夠喉添呀」(下次嚟叫囉)
今日我點燒鯖魚定食($68)...足足有7吋長的鯖魚, 多肉之餘, 燒得又夠香, 我:「救命..真係一D腥味都無」
皮脆肉嫩, 簡簡單單的帶出魚油香,
好抵食...好好食...正到爆!!
坐在旁邊的街坊見我左影右影問我:「你哋第一次嚟? (我:係呀!) E度開咗4個幾月, 我哋全家成日嚟, 你都幾識食喎, 識搵到嚟」
(真係超好食, 係無冷氣囉) 街坊叔叔:「好食就得啦, 有冷氣隔離間茶餐, 唔好食都賣貴廿蚊, 你下次試個漢堡扒, 最好食」
満足食堂
葵涌和宜合道24號和宜合道熟食市場C6號舖
電話: 5491 8102
時間: 12:00-22:00 (星期三休息)
大仁生活facebook
哇！讚哦！....
回覆刪除