【觀塘工廈任玩任食】$88懷舊放題三粒鐘

一聽到食自助餐, 阿囝即時興奮大叫:「好嘢!」. 不過, 今日觀塘工廈餐廳供應的, 嚴格來說只可以叫小食放題.

$88任食3小時, (周末$98), 來這裡主要貪可以有玩具玩. 阿囝:「咁好嘅? 3個鐘頭都可以玩?」(食飽先準玩呀!)

一走入門口, 就有攤位遊戲王牌「電流棒棒陣」...阿囝隨手拿起電棒, 在鋼條中穿梭自如:「爸爸!你睇我...完全無響紅燈」(梗係啦!! 你都未開電制)

老翻紅白機配14吋Konica舊電視, 很少有機會玩電視遊戲的SY顯得很興奮:「哎呀! 死咗...原來要揼斧頭架」

我問小朋友:「你唔覺得個電視矇查查咩?」他雙眼死叮實14吋螢光幕答:「少少啦! 不過好好玩, 好刺激喎」. 估不到30年前我迷戀的, 千禧後的小朋友一樣鍾意.

以80年代做主題的餐廳, 食物質素...亦十足從前學校小食部一樣, 有得食, 食得飽, 但真的不能與「好食」拉上關係.

全部(幾乎)也是叮叮小食, 龍蝦丸, 貢丸, 菠蘿腸仔, 沙律, 似炸完又炸的餃子.

即時加熱即食的雞肉串, 還有麥樂雞, SY最愛一口西多士, 這個算是最有製作水準了吧? 阿太:「$98食D咁嘅嘢, 真係好賺」(會唔會我哋太老呢?)

阿太:「你睇其他人都係嚟捉棋, 玩啤牌, 咁同上樓Cafe都無乜分別, 任食...你睇無乜人叫完再叫吖??」(咁...個西多士都入到口嘅)

「飛行棋大王」又迫我玩...., 我:「屋企都有飛行棋啦, 駛乜嚟E度玩呀?」, 大王回答:「唔同, E度有嘢食呀!!(但你食咁少嘅?), 都唔好食, 唔好問啦...爸爸! 到你行啦」

簡單看看小朋友, 玩釣魚機, 玩捉棋, 玩鐵皮雞仔, 這位小朋友真的天生很愛玩...

最攪笑...我介紹黑白俄羅斯方塊機給SY:「以前爸爸坐車成日玩架」, SY:「點解無顏色嘅?」, 不過小朋友同樣玩了4-5關才放棄.

懷舊不死, 在場年青人真的玩到嘻嘻哈哈, 可能大家都只想找個聚腳點, 食物質素, 可以填飽肚皮就得吧??

$88可以任點任食任飲任玩舊時玩具,  11:30玩至14:30,  三小時過去,  覺得發現新大陸的SY:「咁快夠鐘嘅? 我唔想走呀! 好好玩...」...

不過, 不足半小時, 阿囝:「爸爸! 我好肚餓」(又難怪, 有時有D食物真的不應該入口, 於是我們情願又走去美心下午茶囉)

懷舊任食任玩:
星期一至五：14:45-17:45 ($88)
星期六和日及公眾假期：第一輪：11:30-14:30；第二輪：15:00-18:00 ($98)
(好彩6月有9折)


開餐達人
地址：觀塘開源道47號凱源工業大廈1樓B室
營業時間：星期一至日：06:30-22:30
電話：3689 2496


大仁生活facebook