仍然是長洲平日遊, 昨日說到母親節飲茶後趕船入「包山嘉年華」,
玩完我最期待的爬包山後, 便是阿囝的最愛環節, 磨打式瘋狂攤位遊戲!!
不過攤位遊戲的魔力, 並比不上一個「波」...我說:「嗰邊有小丑扭波波喎」,
SY登時放棄排隊, 走去找小丑哥哥...
小丑哥哥:「小朋友你想扭咩呢? (SY:布甸狗), 吓...我唔識喎,
機械狗得唔得?, (SY:咁我想要把劍), 劍..得...」
不過, 此劍的命運, 不出1小時, 已被破壞之王當真劍玩到爆開了.
今年的佛誕是5月14日 ,
所以今日的三座包山還似剛剛開似整理, 師傅答:「2-3日啦, 星期三左右應該就會攪好晒」辛苦晒各位, 天時暑熱, 大家也身水身汗.
之後, 本來年年會探的雞蛋仔婆婆, 原來真的退休了...SY:「唉!!
我都好想食雞蛋仔...點解婆婆唔做呢?」(仲駛講..實係衰業主加租啦) , 新舖名叫Remember...係米有意思呢?
包山的主角, 一定是平安包, 佛誕前入長洲, 一定要應節食包,
因為之前看飲食男女訪問郭錦記睇到喊, 自此買平安包一定只到這裡.
而街坊會一樣正準備平安包...SY:「咁多包, 點食呀??」取其意頭,
愈多人得到祝福就更加好啦.
長洲一定是出名平安的小島, 因為不止有平安包, 還有平安西瓜.
其實只是去年青衣戲棚的電鑽西瓜, 不過老闆好攪笑, 我也忍不住買了一個來食.
冰鎮即鑽即食西瓜$30, 但走過幾檔, 未雪又不包開的西瓜$20...$10買個享受,
30度的5月初, 抵到爛啦.
我已經有7年沒有食過甘永泰魚蛋, 因為次次過來舖位...一定過18:00...年年也關門大吉.
今年竟然給我買到全店最後一串芝士丸+三文魚丸...嘩!!
有運行!!有運行!!
臨上船前, 一定要走到長洲天后宮前中興新街「芒果王」買糯米糍.全長洲最好食,
皮薄得如A4紙一樣...
之前有網友質疑:「咁薄不如淨食芒果」, 不過單單食芒果,
又沒有了煙煙韌韌的過癮...我買到連老問娘鄭太都認得我, 所以, 我經常話長洲人最有人情味.
沒有留言:
張貼留言