【隱世那些年Cafe】周六限定‧青蔥歲月返晒嚟

舊鐵皮玩具、膠相機、第一代Macintosh、影樓木馬、中學枱凳, 觀塘工業大廈內隱世秘密基地Cafe...

「那些年錯過的大雨, 那些年錯過的愛情...」我一推門入咖啡店, 腦海隨時響起胡夏歌聲. 阿太大叫：「哎呀!套煮飯仔賣唔賣呢? 好靚呀!」

老闆Eddie答:「E個係上個月Cafe嘅懷舊主題展覽品, 我幫你問問物主啦, 因為唔係我架」, 雙眼發光的阿太, 似想強行搶走她的心頭好...驚驚驚

我問老闆:「E度係米新開架?」Eddie:「3年前我租E度係做Studio, 因為自己又鍾意咖啡, 2年前就開始兼賣埋咖啡」, 同一時間可以將兩種啫好一齊發展, 真的很羨慕Eddie.

今日小朋友對小木馬一見鍾情, 坐在上面當真馬圍著Cafe轉圈, 我曾阻止, 但Eddie說:「無所謂啦, 係影樓D道具, 120磅坐上去都唔會爛嘅, 小朋友你放心玩啦」

另一邊牆掛滿一系列懷舊塑膠玩具相機, 物主朱Sir解釋:「全部都係我當年買吓買吓, 儲返嚟, 不過, 你唔好問我出處, 幾十年我都唔記得晒」

曾任教觀塘職業訓練中心24年的朱Sir, 桃李滿門, 現時本港有接近7成的攝影記者也是他的高足, 甚至Eddie亦是17年前, 由朱Sir教導出來.

朱Sir:「因為Eddie係E度開咗Studio, 我幾年前先租到樓下8樓做黑房」

這裡枱枱凳凳正正就是記載了兩師徒當年的回憶, Eddie:「3年前觀塘職練訓結業, 我哋買咗幾套枱凳返嚟, (要錢買架?), 梗係要啦, 不過好值得留念, 係真嘅」

Cafe的餐牌也設計得非常校園, SY:「同我本手冊一樣架喎」, 很有氣氛的Cafe, 可惜每星期只開放一天.

(點解唔開多幾日呢?) Eddie:「因為上年我係紅磡開咗一間Cafe, 加上半年前囡囡出世, 所以自己真係無時間, 但係我又唔捨得觀塘一班熟客, 所以就只開星期六, 簡簡單單畀大家飲吓咖啡, Hea吓囉」

雖然Latent Image的西餅並非由老闆親自焗製, 但Eddie會親切跟你交流任何攝影, 咖啡, 童年往事. 嘆環境, 享受感覺已經贏晒.

我忽然覺得Eddie有點似叮噹, 這裡就是坐時光機回到80年代最美好的時光.

真正有靈魂的回到童年Cafe, 其實只有軀殼的扮懷舊地方...無得比啦.  最重要3月份, 這裡更有意想不到好玩意, 詳情明天續....

Latte $32
拿破崙$18



Latent Image byEddie Chan
地址 : 觀塘觀塘道毅力工業中心10樓D
電話 : 56164515
註 • 只開星期六 2pm-8pm


One Little Room
地址 : 紅磡漆咸道北436號富運大廈地下10號
電話 : 56164515
時間 : 星期二至日11am-10pm


大仁生活facebook