2016年1月5日 星期二

【中醫館食糖水】家一樣的溫暖牌糖水!! 足料又抵食@康瑞涼茶

中醫館都有糖水食?? 同事M:「吓? 中醫咁正氣, 無諗過同糖水夾得埋喎」正正因為事情太有趣, 所以我都好想去八卦下.


康瑞醫館旁邊正正就是胡太打理的康瑞涼茶:「我賣咗涼茶廿年, 十年前有位台灣朋友, 提議我唔好齋賣涼茶咁悶, 所以就教我整芋圓賣埋糖水囉」



(我想食鎮店之寶, 可唔可以推介我?) 胡太不用思考:「特色仙草百配 ($20), 最多人叫. 上年田蕊妮係隔離拍「鬼同你OT」都話我賣咁平仲咁多料喎」


!!! 名不虛傳的「百配」芋圓、地瓜圓、西米、珍珠、仙草、紅綠豆、薏米、白玉湯圓仔, 份量簡直滿到瀉.


這個價錢, 味道又似十足屋企媽媽煲的愛心糖水一樣, 一邊飲仲可以分享胡太的生活故事, 超值!!超值!!超值!!


(其實點解中醫同糖水, 涼茶有咩關係呢?), 笑容滿面的胡太答:「我媽媽, 家姐, 先生都係中醫, 我囝讀埋出年都中醫畢業, 所以, 我哋先一邊賣糖水涼茶, 一邊開中醫館囉」(!原來係中醫世家)


(台灣仙草好滑, 乜唔係涼粉嚟咩?), 胡太教路:「唔係!! 台灣人會用嚟煲雞, 有藥用價值架, 可以用嚟排雜質添」(真係好好食)



本來我想外賣酒釀桂花鴛鴦湯圓回家, 不過胡太的糖水實在太太太好食, 所以, 我一個人忍不住食了兩大碗溫暖牌糖水... 


我問一邊幫我落蛋花的未來準醫師:「湯圓都係你哋自己造架?


胡太接口:「係呀!我包架, 你應該今日朝早嚟, 咁就可以影我點樣準備囉, 淨係仙草D準備功夫, 每日都要用最少4個鐘呀!(係喎, 早知我一早嚟啦)



機械製與人手包, 真的一食便食得出分別, 細細粒的湯丸, 餡料也滿滿的, 好香, 好有令人食不停的感覺.



今晚, 有幸發現這家庭式小店, 我有強烈執到寶的感覺. 逗留短短廿分鐘, 坐我旁邊的兩對小情侶, 亦和我一樣對糖水讚口不絶. 衷心推介...胡太的愛心糖水!!無得頂.


特色仙草百配 $20//酒釀桂花湯圓 $25 (晚上7時前只供外賣, 7時後可於醫館內堂食)


康瑞涼茶
地址 : 深水埗醫局街179A地鋪
電話 : 90343832


大仁生活facebook

沒有留言:

張貼留言