最近發現朋友走去玩「電子世界爭霸戰」, 好幻彩, 好型, 好吸引喎...心癢癢一問, 原來地點就在旺角, 極方便我, 於是今日連同舅仔一家愛‧作戰.
今日SY異常抗奮, 平時很怕跟陌生人傾計的他, 換衫時不停拉實阿Don問:「入面咁黑嘅? 又咁多煙...會唔會有鬼架? 點解我射唔到子彈出嚟嘅...」
Don:「入面迷宮得你哋4個人咋, E支係鐳射槍, 無子彈嘅, 你係紅隊, 要射藍隊」, 口震震的SY:「但係黑忟忟好得人驚, 支槍咁重...我都係唔玩...(我:爸爸同你一齊呀!), 我好驚」
Don:「咁不如我陪埋你入去啦, (SY:哦!好啦, 你唔好走開喎)」我心諗:「吓? 我陪就驚, 你識咗阿Don唔夠5分鐘喎」
接觸新東西, 阿叔真的反應慢了一點...我不停受到阿太, 舅仔的攻擊, 我問Don:「點解我射唔到佢哋?」
Don:「被人射中就要停5秒, 你畀人射到3次, 快D返嚟基地復活先啦!」
好彩每一場都可以復活60次, 否則我未學識用支槍, 已經要退出戰場.
這個之前話「好驚!好驚」的小朋友玩戰後不足3分鐘, 已經不再理阿Don, 不停在迷宮走來走去...
我還在學習支槍之際, 小朋友又走到敵方陣地大叫:「我射到你啦!舅父...哎呀!!我都響咗啦, 我要返去復活, 你再射我都無用啦...」
最初我以為貼牆而行最安全, 但最後我決定打游擊伏低進攻,
SY:「係喎...爸爸! 我都學你先得...嘻嘻, 好玩呀!」
不過就在我終於摸上手, 極速上彈, 瞄準, 閃避, 出擊之際, 原來15分鐘已經過去...心諗:「咁快嘅? 玩完啦? 我啱啱先熟咗支槍點用咋喎」
我:「好啦! 要除咗裝備啦, 走啦」,SY:「爸爸! 我唔想走呀? 真係好好玩, 我想再玩」可惜阿Don指, 之後時段全部都約滿...唯有下次再來玩過啦.
SY:「我真係唔想走, 等我射多幾下先得唔得...」我:「開頭話唔入去玩又係你, E家唔肯走又係你」 今日阿太47分, 我組29大敗, 下次我一定要帝國螢光反撃.
小攻略: 第一次玩, 要聽講解, 所以決戰時間只有15mins. 如果連續玩兩節, 就最著數, 因為第二節免換衫, 免講解, 變相激戰最少超過20mins. (下次我都要Book兩節, 今次真係蠢)
ResaLaser HK - 最螢鐳射槍戰
旺角亞皆老街24-26號東方大廈8樓
電話:3580 0030
大仁生活facebook
沒有留言:
張貼留言