2015年12月13日 星期日

【概念零距離】冠軍人馬企正面前~為你煮熱咖啡 @ Starbucks 家樂坊

繼金鐘麥當勞的Next Concept Store, 原來Starbucks一樣在油麻地家樂坊開設了Concept Store, 雖然我不是星粉, 但八卦的我, 有新玩意一定想試.


家樂坊地庫的Concept Store非常之大, 面積可能較登打士街, 及中環都爹利街的概念店更加之大



原來這裡只新開張了三天, (1211開業), 難怪我還能聞到新裝修的氣味.


我問店員有何獨家食品, 她答:「我們三款牛角包都是獨家發售」SY: 「爸爸! 我好鍾意食牛角包, 我想要朱古力味,得唔得?


於是我們點了「馥莓忌廉」及「朱古力脆脆忌廉」, 我捨棄了「芒果乳酪」, 因為我怕乳酪會太酸.


SY不停說:「好食!好食! 不過可唔可以唔好切開我個牛角包, 佢好慘, 我好想成個食呀」(:好慘因為我要分享你個朱古力呀??)


這份甜品算特別, 賣相亦算可愛, 但是否如SY說的好好食, 我有所保留, 起碼仍未有一試難忘的級數.


概念店最最最大賣點, 正正就是Reserve Coffee Experience Bar, 所以特製的杯上也大大個印上「R」字.


可以近距離, 親眼看著咖啡師為你煮熱咖啡, 份外輕快些, 同你傾 同你飲 密密斟咖啡...原來好正.



概念店標榜4款咖啡豆...TANZANIA MONDUL ESTATE」、「VIETNAM DA LAT」、「COSTA RICA LA CANDELILLA」及「PANAMA CARMEN ESTATES


其實...對於一名未戒奶的咖啡初哥...真的識「條鐵」, 所以我揀了酸度, 及濃度都是中級, 又包含有朱古力成份的TANZANIA. (其實係乜我都唔知)


咖啡師Suki:「三款沖調方式, 你揀邊種呀? (:??? 濾壓壺好似好少人叫呵??), 梗係啦, 一向我哋係哋用濾壓壺, 同埋好多人屋企都有, 咁一定少人點嘅」



(我面前E款幾特別喎), Suki豪氣回我: Siphon (虹吸)! 好呀...大約請等20分鐘」


(今日算唔算多人?) Suki:「我哋開咗三日, 尋日試過客人要等大約一個鐘, (點解唔放多幾個虹吸壺?), 可能初初要試一試先, 之後會再加」


原來Suki來頭非常勁, 因為她正是Barista 2015冠軍人馬, 她身旁同事說笑道:「係呀! 佢好勁架, 唔係我點會企係佢隔離聽佢吩咐, (Suki:你亂講啦)


(要練幾耐先攞到冠軍架?) 一邊試咖啡一邊答我的Suki:「我好彩囉, 我只係練咗一個幾月」(!咁鬼勁嘅你)


(點解我見你每次都會試飲一杯仔先再畀客人呢?), 笑笑口的Suki:「係呀!我要試下味, 如果唔合格, 我情願沖過一杯先畀客飲啦」


不過, 對於一個BB班級數的我, 見你又要調水溫, 又計時, 連吉杯也要用沸水保溫, 你沖甚麼味道我也覺得你超專業啦!!


究竟在那裡加奶的呢? 還是 TANZANIA一定是齋啡來的? 太甘太苦吧!! 結果我放了一些朱古力粉來加甜.


SY:「朱古力粉?? 我可唔可以食少少呀?」結果我給了一匙羹給他吃....一呷即咳的小朋友:「都唔係朱古力嚟架, (咳咳咳)爸爸....(咳咳)係咖啡, (咳咳)!() 我想要水」


飲飽食醉後, 當然就參觀一下這間很有轉角藝術色彩的概念店, 大頭公仔畫, 個個也飲著咖啡, 都很有指導性...


不過, 應該間中再夾一些在溫習, 或者賣保險的人像, 就更有真實感.


原來, 今日特製的咖啡杯可以獨立購買的...SY:「我想買個細細杯, 好得意...(他指用來飲Espresso的一款)」我:「你飲咖啡咩? (:飲水囉)


今日到Starbucks也學到咖啡知識, 果然夠充實, 未知概念店會否攪工作坊, 我真的好想知道, 如果「外行仁」沖出來的咖啡, 和達人Suki沖出來的效果會有何分別呢? 不知有沒有機會可以玩一玩呢?


地址:旺角家樂坊分店(旺角登打士街56號家樂坊地庫)



大仁生活facebook



沒有留言:

張貼留言