放假的晚上, 當然就是出動覓食的好時機,
我早上跟阿太說:「無印Cafe係尖沙嘴開咗分店, 不如今晚去食囉!!
我續說:「不過好似係海港城E家食齋㗎喎...」, SY搭嘴:「吓? 我唔鍾意食齋...(我:不過佢哋啲蛋糕好好食㗎喎...), 好呀!好呀! 我鍾意食蛋糕㗎」
晚上走到海港城4樓, 重新裝修的無印更加有日系感覺, 走入店的左手邊, 就是全新的Café&Meal
MUJI.
望了一下餐牌的阿太, 很得戚對我說:「你又話食齋? 人哋有雞, 牛, 豬, 魚...你唔係見到人哋寫「素の食」就以為食齋呀? 你仲話讀過日本喎, "素"係原味咁解呀...哥仔」
心諗:「車!! 一時唔偷雞啦妳...懶叻」, 快快想轉個話題的我:「阿囝, 原來有兒童餐喎, 仲有橙汁, 你要E個好唔好?」
SY看到隔離枱的漢堡包薯條, 他又想吃...本來我想拒絕, 但很有趣, 漢堡包中間的不是牛肉, 而是燒大菇. (嗱!! 我都話係齋啦!!)
薯條怪第一時間搶薯條食, 之後說:「嘩!爸爸, 你個包好香」對!我也覺得, 大菇燒得非常香噴噴, 而且配上面的沙律, 望住個包, 我腦海忽略想起6個字~「好可愛呀!!衰鬼」.
銅鑼灣分店是自助形式購買, 而這裡則是餐廳落單點食物,
嘩! 8個冷盤, 9個熱食, 今晚我們各選兩款, 真的心大心細還未決定得到,
差不多吃完兒童餐的SY:「你哋仲未揀到呀?」
四品料理$108, 全晚最最最驚喜, (絶對Juicy過城城公開戀情), 一定是「腐竹長芋豆乳雞湯」.
好純, 好足料, 好入味, 好令人懷念, 好有阿媽Feel, 就是這杯雞湯的「飲後感」. SY:「豆漿咁多渣??」~(大佬, 你真係唔識貨, E啲叫真材實料呀)
SY好開心:「有雲吞呀!! (我: 你試吓)」, 不愛吃菜的小朋友, 當然不太喜歡.
不過, 腐竹包菠菜變成一隻另類湯餃,
配上超濃忌廉味, 雖然味道不是一試難忘,
但忽然覺得這隻湯餃, 溫柔過傳統的多多聲喎!
PS: 佐飯恩物「燴牛肉」, 我忘記單獨拍照, 激腍,平時肉眼都嫌韌, 無牙的SY, 也撻了我一整舊來吃...
阿太突然"喂"我:「你一定要試份黑醋豚肉, 惹味到呢!! 好食, 真係好食...」
飲品...飲品... 洛神花茶, 及 生薑熱飲 ($42) 一樣放入半個雪梨, 男人老狗不愛花茶, 而經常薑茶當水飲的我,
今晚發現, 原來薑茶入雪梨, 開心過齋薑茶多多聲㗎喎.
之後便是SY最愛甜點時間, 宇治抹茶紅豆泡芙, 士多啤梨棉花糖, 迷你酥皮鮮果撻...
泡芙皮略嫌硬了一點, 不過SY不認同:「最好食就真, 因為入面個啲嘢好似雪糕咁好食」(車!! 你甜品怪, 又係雪糕怪, 費事理你)
我愛那個菠蘿撻, 因為真的極舊原個菠蘿入撻,
而且這裡的撻就算夾菠蘿夾忌廉一樣輕甜...好正呀!!
甜品怪投訴:「咁少嘅, 又話有蛋糕, 可唔可以再食呀?」店員推介:「本和香糖布甸蛋糕, 聖誕限定㗎」, 正在偷笑的SY:「布甸好呀! 我最鍾意布甸狗麻」(阿囝...唔係乜都布甸狗嚟呀!!)
一邊食一邊眼都會笑的小朋友:「布甸真係好食, 爸爸!! 原來出面係白朱古力嚟架!! 超好食呀!」(你鬼識食啦...不過車厘子慕斯酸酸地,
夾布甸又真係幾吸引嘅)
捧住肚離開Cafe, 阿太大叫:「好飽呀!」我對囝說:「呻飢莫呻咩呀?」, SY:「"飽"...不過真係好飽, (我:梗係啦~你甜品都食咗咁多舊), 食剩你會話我喎」(你真係多辨駁)
Café&Meal MUJI Harbour City
電話: 39713220
地址: 尖沙咀海港城海洋中心4樓
大仁生活facebook
Café&Meal MUJI Harbour City
電話: 39713220
地址: 尖沙咀海港城海洋中心4樓
大仁生活facebook
沒有留言:
張貼留言