網頁

2015年12月21日 星期一

【排隊2個半鐘】每日限送30隻布甸狗杯~孤寒鬼 @ Pompompurin Café


今日陪SY到銅鑼灣見偶像, 自從上星期他知道「布甸狗Cafe」登陸CWB, 日日不停問:「布布開未呀...要早D去排隊, 要早D去排隊」



第一日18:00才正式營業, 我們17:30到達, 人龍已經排到SOGO, U字返回接近Cafe門口. (排首位的客人表示:「我三點幾就嚟到排Lu)


我們排第77, 籌號48, 店員說:「可能要等到9點先入到」. (? 真心驚, 排足3個半鐘?)


結果, 當然是誇大的預告, 19:50我們已經可以轉入舖頭樓梯, 後面有食客說:「之前E度係間日本餐廳, 人影都無隻, 一轉做布甸狗, 真係多人多到嚇死」


如果沒記錯, 這裡前身應該是, 食炸豬扒會鎅損上顎的銀座梅林. 其實, 我沒有太多空餘時間思考, 因為小Fans不停叫我影影影.


原來, 香港真的很多布甸粉, 很多少女也戴上布甸頭飾, 手持2,3個布甸公仔, 逐張海報, 每一張也與SY一樣, 攞出不同姿勢...真的卡嘩衣.



20:00終於可以就坐...阿太:「卡位有吊燈, 好似靚好多喎」(無計啦, 等咗2個半鐘, 唔通再等張卡位咩?)


其實, 我們排隊其間已經一早想好叫那些食物, 即時落單後便問店員:「係米有布甸狗杯送呀?


店員說:「唔好意思, 每日頭30位客人點指定食物先有...(其實, 會唔會孤寒咗D)


坐在我旁邊的太太聽到我們對話, 接口:「我哋排第35都無, 上次我哋去日本食, 人人都有, 香港都係唔識做, 價錢仲要同日本Yen10算」 (:咪就係囉!!)



據聞這裡餐牌忠於日本菜單,  6款主菜、4款甜品, 及飲品...無杯送忽然覺得價錢好貴. (事關單價一定將杯價打咗入去啦)


墨西哥塔可飯$139, (日本原宿價1290+) 這是我第一眼望見餐牌必點, 因為唯一立體整隻布甸企定定的一款食物.



黃飯布甸頭頂有半粒肉丸, 而肉丸上就是牛油造的朋友Muffin. 不要以為布甸肥嘟嘟塞滿整個杯, 因為杯內有一半是沙律菜.


究竟你忍心將布甸支解伴上肉醬嗎? 我與SY也在猶豫之際, 無情的阿太已經零秒出手...!!!SY直情想哭.


但沒有辦法, 因為沒理由只吃肉醬與菜, 而不吃飯喎...雖然布甸飯有點硬, 脆脆片有點疏風, 不過肉醬很入味.


飯後我問SY:「你又話唔捨得食嘅?」摸摸自己肚皮的他:「我鍾意布布, 我鍾意佢係我個肚入面」(:咁你頭先撈飯嗰陣又扁咀?)


再來就是我覺得比飯更好食的拿破侖意大利粉$149 (日本橫濱價1490+).


布布杯內的蕃茄汁不會太酸, 而且意粉非常好味道, 最起碼不會餸還餸, 意粉還意粉.



兩片麵包算是敗筆之作, 不如改火腿或煙肉更加...中間有一片蛋, 最初我還以為是第三件又凍又沒味道的敗筆包.


芒果梳打雪糕$64 ,(日本原宿$750+). 我想少冰, 不過店員說:「太少冰, 布甸狗會沉咗落去就唔靚」


底層算是有不少芒果啫喱, 我當然又是為了浮在杯上的雲呢拿雪糕狗仔頭啦. (雪碧溝雪糕前世未飲過咩?)


飯後甜品是布甸狗芒果芭菲 $119, (日本原宿$1100+). 絶對不能看少, 三個人一齊吃, 原來也非常膩, 可能超多忌廉的原故.


不過配搭非常豐富, 底層有海綿蛋糕, 面層芒果肉, 焦糖布甸狗, 還有兩粒小雪糕, 及三片橙.


其實再有誠意的, 應該小雪糕也畫成布甸狗朋友的樣子, 一定更煞食.


今晚聽得最多, 便是「好靚呀!!,「我未影呀! 等我影埋先食啦」對!因為是日本原裝100%賣相製作, 所以論外貌一定贏盡其他主題餐廳, 不過...


熊本熊, 蛋黃哥, 薯蛋頭的主題Cafe全部也每張坐位也放滿公仔任影, 這裡一隻也沒有...除非你即場購買. (全部Sanrio行貨精品, 駛鬼係度買咩, 又無限定品)


全店有一個店頭布甸狗, 一隻3D壁畫狗, 還有大大小小的海報, 及天花板的主角們. 老實說我不滿足, 但是SY及其他布甸FANS就整晚笑得見牙不見眼.  (乜你哋咁易氹嘅?)


店員說:「如果你想有毛公仔擺設借嚟影相, 我可以向經理反應一下」 態度很有禮貌又大睇, 不過我估計也是「耍」我多...因為好像原宿的也沒有!!


臨走前在收銀處有一些鎖匙扣, 我妄想是贈品, SY:「送㗎?」阿太很大反應:「有價錢㗎, ! 你就想」

環境:★★★☆☆
食物:★★★★☆
賣相:★★★★★
價錢:★★☆☆☆
滿足:★★☆☆☆



Pompompurin Café
營業時間11:00am-10:00pm (截單時間 9:30pm)
不設訂位,用餐時間限時90分鐘
地址:銅鑼灣軒尼詩道525號澳門逸園中心B1F



大仁生活facebook

沒有留言:

張貼留言