兩父子今日撐枱腳打邊爐, SY:「係米真打邊爐? (我:乜有假嘅咩?), 吉野家米係假囉, (假?), 被人放晒D嘢入去, 都唔係自己放, 仲唔係假!」. 其實我完全沒想過有真假分別.
12月中才殺入海港城的温野菜, 我打了幾次電話想訂枱, 也訂不到...店員:「唔好意思, 因為我哋只留3成座位定座, 暫時最早8日後有位」(咁巴閉?)
於是我們晚上19:30走到LCX排隊, 輪籌剛剛好30張, 不過店員溫馨提示:「因為我哋無限時, 所以講唔到你知要等幾耐,
但客人有籌就一定保證可以入座」
結果, 我們入座時間為21:58...SY望一望我手機:「都好, 差2分鐘先夠2個半鐘頭...」好彩落下有反斗城可以消磨一下.
這裡有一個好處, 便是沒有最低消費, 於是一老一嫩只點了一個$168定食A, 加年糕, 加烏冬得咗!
SY:「爸爸!對面閃閃下好靚!有D似迪士尼放煙花咁」, 奇怪! 詠香江不是每晚8點嗎? 為何10點又有一輪呢? 不過望住無敵維港景嘆火鍋, 真爽.
每份定食都有齊牛, 雞, 豬, SY好興奮, 不停說:「真係好香D菜, 爸爸!你睇個爐好似火山咁, 好得意」, 其實, 只是火滾可以落餸菜, 點解小朋友會如此雀躍呢?
這裡主打日本產地直送野菜, 定食籃內有齊來自日本不同地區的新鮮蔬菜, 我沒有阿囝的誇張, 不過新鮮日本直送到港,
其實還算不算新鮮呀?
女店員可能見我們大鄉里, 主動走來幫手:「E個竹筒免治雞肉, 份量大約做兩粒就好, 不過要熝耐少少」(好彩有妳講解, 我最初諗住分十粒落添)
之後芝士片捲牛的新玩意, 當然又是靠店員教路才學識, 估不到打邊爐都有得拉芝士. SY:「我想要多D芝士, 得唔得呀?」
對於骨瘦如柴的小朋友, 主動要求要食, 我當然十分樂意. SY:「爸爸! E度真係好食過吉野家喎」
一分錢一分貨, 吉野家當然無得比, 不過, 温野菜分店在日本勁多, 似十足7-11「梗有一間係左近」, 單單東京已經有89間分店, 其實在日本人心目中, 可能也只是普通級數的吉野家.
一邊食烏冬, SY一邊問我:「點解個碗多咗塊野?」 我答:「係喎...咩嚟呢?」
好彩有店員解畫:「可以幫你隔湯隔油, 咁你啲嘢食就唔駛浸住之前啲剩餘湯入面」(究竟係我老套, 定係新發明呢? 個設計好細心呀!)
回家告訴阿太:「今晚打邊爐, D菜真係甜, 連平時話D肉好韌, 今晚都不停食」, 阿太可能無得去, 有點唔抵得:「車! 上次同你去MouMouClub 牛涮鍋, 你又話唔抵, 佢哋米又係同一個集團, 你同個囝去就話好食, 同我去又話唔好...」
無言的我:「係咩!同一集團嚟架? 不過今次D食物質素真係唔錯, 下次再去啦! 我想試埋其他牛, 同佢哋嗰個美肌湯底, 話勁多骨膠原呀!」
不過下次一定要早10訂定位, 我唔想再陪阿囝反斗城玩車, 玩足2句鐘呀!
しゃぶしゃぶ温野菜
地址 / 九龍尖沙咀廣東道17號海港城海運大廈LCX 3樓37A號鋪
電話 / 21531801
營業時間 / 12nn-11pm
大仁生活facebook
沒有留言:
張貼留言