【中伏前必讀】$148 說好的Francfranc聯乘下午茶 @ Balencia

今日去HighTea, 我對阿太說:「三層架下午茶...$148二人餐, 仲要係用Francfranc餐具喎」, 阿太:「咁抵? 我上次同仙仙去君悅HighTea, 要$298」(用酒店級數比, 我驚你會失望)

去到沙田Homesquare, Balencia 正正就是在「宜家」前面...其實, 我記得之前同樣位置是「美心快餐」喎.

店員:「我哋係A-1集團, 只係開咗2個禮拜」, (哦!原來美心執咗)

今次很輕鬆, 因為一早便鎖定二人HighTea, 還要一家三口食...哈哈!超抵. 

不過, 為何上枱的餐具普通普通呢?, 官方又話「加埋Francfranc人氣餐具，除咗充滿味覺外，仲有視覺上嘅享受!」

我問店員原因, 他回答:「哦! 嗰個係餐牌影嚟靚D, 係宣傳, 我哋都係用普通白杯」

老實說, 真的有點失望, 阿太:「咁你影吓放係牆上面嘅杯杯碟碟囉」(其實點樣解法都唔係聯乘喎...)

至於食物方面,  本來第一時間要食朱古力的阿囝, 一見到牛角包竟然都會發狂. 我:「你好鍾意食牛角包咩?」, SY:「我朝朝早都食, 媽媽買畀我, 你瞓著覺梗係唔知啦」

我:「咁我畀埋個蛋沙律牛角包你食啦, (囝:蛋...我唔鍾意食), 蛋沙律好食架」, 如何訓練小朋友不再揀飲擇食呢? 真的要研究一下先得.

中層有英式鬆餅...有一個小小的果Jam, 對於果Jam怪, 老實不客氣問店員:「果Jam可唔可以添?」女店員幫我問完廚房答:「唔好意思, 無得添」~(一分錢一分貨, Jam太貴...應該, 應該).

吉士泡芙, 與朱古力泡芙, 當然我會被分到一個吉士味道, 朱古力味又是SY全包辦. 這個泡芙算不錯, 不過泡芙應該比較少遇到難食的吧!

不太明白為何中層有一碗生果, 吃擺甜品再吃生果, 太酸了吧! 而且生果賣相更加拉低了整份下午茶的分數, 換上雪糕可能我會額外加分.

最上層的四粒迷仔馬卡龍, SY個人8啖, 臉不改容KO入肚, 我問:「你唔覺得甜咩?」, SY:「甜甜地, 幾好食...有冇得添架! 太細粒」(果Jam都無得添, 你話馬卡龍有冇吖?)

嚴格來說, 全個下午茶最好食應該是那件朱古力切餅, 可能它放在那兩杯怪味慕絲旁邊吧!

這裡的裝修一定正過食物多多聲, 阿太說:「咁樣都叫做下午茶? 仲要我山長水遠走入嚟沙田食...哎呀...」(未食過鬼知咩!)

臨走我叫SY在樓下Francfranc影張相, 他問:「影嚟做咩? (我:頭先間餐廳話係用度D杯杯碟碟喎), 吓? 唔好講笑啦...咁靚E啲杯, 我哋頭先有用咩?」(米係囉!!)

回程時, 朋友知我食Balencia便問:「限定車厘子MousseCake好唔好食呀?」, 我答:「咩車厘子? 都無, (朋友:無? 又話限定獨家下午茶就有, 你係米被人呃), 呃都無計, 我都埋咗單走人啦」

A-1 Bakery Group (Balencia Homesquare)
沙田中央廣場5樓502號舖



大仁生活facebook