【劉華又有好嘢食】超強黑松露海膽手打漢堡 @ 元朗EC Kitchen

原來, 距離上次食「念念不忘劉華漢堡」已經有10個月, 今日再次來雞地, Eric依然有型的向我打招呼:「好耐無見」. (真係...時間咁快就10個月囉)

今日意想不到連老闆娘也有幸遇見...Carol指住Eric對我說:「自從上次你話佢係劉華之後, 不知幾多人走嚟問, 老闆呢? 佢哋真係嚟睇佢, 幾好笑...」(咁攪笑??)

Carol續說:「不過, 元朗劉華, E家已經變變下, 變咗簡稱元華啦, 你以後叫佢元華就得」(唔係喎, 佢笑起上嚟真係有9分似劉華喎)

劉華說:「一場嚟到, 試吓我哋個海膽漢堡, 好正架...」(好呀! 好呀! )

劉華漢堡, 依然份量十足, 我問:「嘩!成個銀包咁厚舊牛肉有幾多安士?」 劉華說:「我哋不嬲都係7安士」(真係超巨型, 仲好鬼香)

劉華大大羹幫我放上黑松露...雖然今次海膽漢堡賣$98, 但有大個豉油碟份量的海膽, 舖上大量松露, 還有拳頭大的漢堡, 絶對超份量, 超抵.

肉汁混入半溶芝士已經絶配, 還有食到嘴角自然笑的海膽和黑松露, 不得了...超強的組合, 市區肯定無可能食得到.

原來海膽配手打牛肉, 味道可以如此令人神魂顛倒, 本來我不太愛海膽, 不過, 今日海膽先生的餘香, 翻騰又翻騰, 我已經肯定...從此會愛你愛到死.

(如果你哋唔係開到咁遠, 我真係想個個星期嚟食) Eric: 「我哋12月會係荃灣開分店喎...到時嚟吖」(一言為定, 我一定嚟...不過, 劉華...可唔可以係旺角都開多一間呀?)

EC Kitchen
地址：元朗鳳攸南街3號好順景大厦二座19號舖
時間：12:00 – 20:30
電話：2529 4948




大仁生活facebook