今日我去「629雞蛋仔」找新哥, 因為前幾日新哥說:「嚟緊冬天, 我會有新嘢, 栗子雞蛋仔, 有冇興趣嚟試下」, (正喎!!我完全搵唔到理由唔嚟)
去到新蒲崗, 新哥如常雙手四爐, 不停反雞蛋仔, 塗格仔餅...新哥:「不過今日D栗子唔靚, 可能出來效果未必好. 正式推出時, 我會自己係屋企準備好晒D栗子, 所以真係每日唔會有好多底」
普通雞蛋仔製作需時3分20秒, 不過加入栗子就要花多少少時間...
新哥:「今次第一次整畀人食咋,
你睇吓得唔得...你唔好掛住影, 食咗先...」(...不過, 相機食...緊要過我食呀!!)
如此重任, 不如交回大廚先試. 新哥摘了一粒, 放入口認真反覆品嚐:「果然栗子都係新鮮, 會更香...今次栗子太乾身, 但回甘味都算OK」
栗子加雞蛋仔, 原來味道太夾, 簡直有合二為一的感覺, 最特別是嘴嚼過後, 栗子味會慢慢滲出來...
過程中,有食客問:「E款係咩嚟?」, 新哥可能未測試成功, 於是答:「貴嘢嚟」(事後新哥補充, 到時真係未知賣幾多錢, E家街邊「抄栗子」成幾十蚊一磅 , 你話唔係貴嘢呀?)
好鍾意食雞蛋仔的我, 走到全太子東最好食的雞蛋仔大師面前, 怎會輕易離去...我(奸笑):「新哥!! 我今日帶咗D熟到爛嘅蕉嚟喎...上次你話生蕉做雞蛋仔會好腥吖麻」(偷笑中)
新哥望了我帶來的香蕉就說:「有備而戰喎!!」於是將其中一條切半, 再倒入蛋漿攪拌...我有少少猶豫, 為何不似朱古力粒粒般, 逐粒放入雞蛋仔內呢?
大師好似一早知道我的疑問, 答:「放一粒粒無咁好食, 而且攪溶佢會易整, 最緊要方便我...」(我唔理啦, 有得食就得啦)
雞蛋仔大約焗至一半, 已經離奇地香噴噴...我:「嘩!超香喎...難怪你上次話仲好食過藍苺啦」, 不過新哥說:「今次應該唔會太脆, 因為香蕉嘅澱粉質會破壞咗D蛋漿, 所以, 唔係次次做得好食」
(都未焗得起, 你點知?) 新哥氣定神閒說:「Hey! 我已經訓練到聽聲都知道E底出嚟係脆定唔脆」(嘩!神乎技呀)
雖然新哥不停說, 今次效果麻麻, 但我卻未食過如此香口的雞蛋仔. 其實我不覺得今底雞蛋仔不夠脆...而香蕉雞蛋仔的味道, 我可以用四個字來形容:「心如鹿撞」, 愈食愈興奮...60秒KO整底.
挑戰無極限, 霸王硬上弓, 最後我拿了一罐菠蘿出嚟...嘻!嘻!!嘻!!!... 新哥:「我從來未造過喎...同埋菠蘿係酸架麻, 點夾雞蛋仔呀? 不如你攞返屋企自己夾腸仔算啦...」
因為我知道老友是一名耳仔軟的人...當然左氹右氹之後, 新哥:「咁你開喇...嗱!出嚟怪味, 我唔會理你呀!」(得得得...無問題)
新哥以純熟刀法, 將菠蘿切粒粒...其間有熟客問:「喂!乜你有香蕉, 菠蘿雞蛋仔架...整底嚟啦...」, 新哥指住我:「梗係無啦...佢叫我整畀佢試咋, 我唔會整咁多味, 未辛苦過咩」(今次辛苦晒新哥)
菠蘿粒粒放入雞蛋模中加熱, 但就沒有注入蛋漿...新哥:「菠蘿太濕, 要焗一陣, 走晒啲水先得...」(哦!又學到嘢啦今次)
我問新哥:「你最鍾意食咩餡料? 」, 新哥:「粟米, 好夾..不過你唔會鍾意食...(你點知?)...一睇就知你鍾意食濃味啦」(你真係了解我喎)
等待過程中, 我又忍唔住問足一年的問題
:「究竟點解你舖頭叫629啫? 係米你以前揸的士, 不見不散的密碼??」
新哥:「我以前中環賣三文治就已經叫629, 因為每年6月29日 我都會義賣一日, 我本來希望每個月29號都義賣, 不過維唔到皮, 無計」(你真係好有使命感)
菠蘿雞蛋仔完成了....YEAH!!
不過沒有香蕉出來的香,
而且因為菠蘿太甜, 搶了雞蛋仔的味道....新哥:「簡直食菠蘿一樣...唔得...」(唔係吖, 幾得意喎...好食因為我鍾意食菠蘿, 不過論味道, 一定香蕉完勝)
629雞蛋仔
新蒲崗康強街28號康景商場地下28J舖
沒有留言:
張貼留言