2015年9月26日 星期六

【懷舊迎中秋】 冷糕‧雞蛋仔‧豆渣‧霹啪筒‧回憶浪漫夜

WeShareGiSY去十日節做皮影工作坊, 心諗:「十日節?? 咩嚟㗎?...皮影咁老套...


(不過, 算啦!Gi姐姐咁靚, 應酬下, 坐一坐就走...如果係其他阿嬋打嚟, 唔駛旨意我會show...)



!在全無期望下, 原來十日節勁正!! 中秋嘉年華, 較青衣大戲棚更文化, 更乾淨, 更有氣氛.


這個潮版採燈晚會, 將傳統手作, 飲食文化重現, 有得玩, 有得食, 有表演, 好玩到不捨得走.


林村長大的Eddie示範玩竹筒槍: 「我E兩日做咗三十幾支筒, 但因為浸水浸到漲咗, 所以唔用到, E家要即場做過」.


Eddie見我目光迷茫, 就問:「你細個無玩過咩? 黃豆槍喎!」城市長大的我和Eddie, 原來童年時期, 玩具可以如此大分別.


如果時光可以倒流, 可能我不止玩痕粉, 火石槍, 應該可以學造更多新奇小玩意喎.


Eddie非常落力, 見路人眼神與竹筒一接觸, 即時講解,「無辦法, 反應麻麻, 唔係預期中咁好賣」. 很有心的Eddie, 雖然今晚反應一般, 但你團火連我也感受得到, 你的心機一定不會白費.


之後, 我們走了到莊師傅教授的工作坊, 學造皮影...不過小朋友學造的是「透明膠影」.


工作人員:「小朋友你想做嫦娥, 定係兔仔? (:爸爸嫦娥係咩嚟?...(..即係你阿媽囉, 日哦夜哦)...!我做兔仔)


:「師傅你做咗幾耐皮影? 」教授的工作坊, 學造皮影...不過小朋友學做的是「透明膠影」.


莊師傅:「十幾年啦...(E家皮影變咗用膠片造?)...唔係, 一直用牛皮, 不過畀小朋友學, 就轉用膠片, 真係用牛皮, 起碼要做2個星期, 上色好複雜㗎」


填好顏色, 再剪出兔仔的不同部份, 之後交由師傅打孔穿針, 最困難就是要用線將兔仔雙手, 及頭綁上竹支上. (我老眼昏花, 要穿針引線真的穿到想死)


本來完全不知皮影為何物的小朋友, 一見原來在白布前, 大光燈一照射下, 大白兔立刻走出來...即時大叫:「爸爸...你篤啦..你郁隻白兔啦...好好睇呀!(我夠知好睇啦...我都想睇呀)


原來, 莊師傅在JCCAC有工作室, 有機會過來探妳! 謝謝今晚汗流浹背的教導.


採燈晚會一定有猜燈迷...只要猜中其中五個, 就可以得到小小鐵皮玩具. 大部份燈迷以動物俚語為主, 非常容易....


只要參與, 基本上不會答錯, 今晚小朋友二話不說, 一手揀了一部鐵皮電單車仔. (點解佢咁鍾意電單車, 死都唔肯講!! 激死)


「食完嘅月餅罐唔好揼, 可以捐嚟土瓜灣鴻福街16號畀我哋, 我哋專門幫手將鐵罐變做雜物盒, 同層㗎」, 廢物利用又推廣環保家居...大家都可以支持一下.


同場還有超巨大層層疊, 大型(人咁高)效果好玩得多, 玩完之後阿囝也大叫:「我哋屋企嗰個真係好細」(不過, 香港地有幾多人可以係屋企玩咁大幅層層疊吖?)


吹糖技藝由鬼馬的杜師傅負責, 我問:「係米要不斷為麥芽糖加熱先得㗎? 師傅答:「好嘢喎! 你點知呀? 你唔見我大汗疊細汗咩? 好熱㗎」


師傅為小妹妹一邊扭玫瑰花一邊說:「小妹妹你支玫瑰花係獨一無二喎, 如果你遲D係街搵到一模一樣, 話畀我知, 我畀一千蚊同你買咗佢」(睇嚟你嗰一千蚊幾難賺咁喎)


玩了又玩, 當然要醫肚...今晚有久違了的牛下神級雞蛋仔, 先生的出品, 四年前「撞彩」食過一次...我就是喜愛他的蛋糕仔的質感.


有網友說:「你識唔識食㗎? 雞蛋仔梗係半中空先叫正宗」, 但我就是喜愛這種飽滿感覺.


我不知道是否與炭爐燒製有關, 但我「舊時」真是吃這種蛋糕仔的雞蛋仔口感長大的喎.


(如果之後想食, 可以點搵你呀?) 李老闆:「年三十晚到年初三, 你嚟牛下啦, 我一定係度...(其他日子呢?)...無喇..如果年初四都係假期就見多我一日囉」


雞蛋仔旁邊就是全場最長人龍的宙叔冷糕...我問老闆:「你搬咗去邊呀?, 宙叔望一望我, 食指上下動了數下...微微一笑:「乜係你呀!


其實, 我也不知宙叔口中的:「有人放上網...咁就每日多咗一倍人嚟排隊」, 因而連累他給食環警告, 被迫停業的人是否指我?? 如果我真的是罪魁禍首, 我要鄭重向宙叔道歉.


(我下次嚟探你賠罪!) 宙叔中氣十足:「你嚟就歡迎, 不過唔好再影相放上網喇下」(得得得!!) 今晚冷糕超受歡迎, 9點未到已經要截龍. 宙叔不好意思說:「無計...都無晒蛋漿喇」



商品設計畢業的Terry與三位朋友合作的「豆渣食驗室」, (?你哋讀商品, 讀廣告又關豆腐渣咩事呀?)



Terry:「食物都要包裝麻, 同埋香港豆腐廠每日揼好多噸豆渣, 好浪費, 其實豆腐渣好有益, 蛋白質好豐富,...你試吓食先啦」


(幾多錢㗎?)Terry:「唔駛錢㗎, E個本來係我嘅畢業功課嚟㗎, 最主要想畀大家試下豆腐渣都可以好好食」


外表看似炸魚蛋的小丸子, 當然沒有魚蛋的彈牙, 但我因為喜愛食豆卜, 所以除了外皮少少韌, 其實感覺較食豆卜更佳. (佢哋連沙律醬都係用豆腐整嘅, 認真勁


非常有理想的年青人準備的700粒小丸子, 一瞬間便派發完畢, 推廣的第一步應該算是非常成功...仁叔叔很佩服,及羨慕你們, 加油食驗室各成員!)


Terry旁邊有聖雅各福群會找來兩位姨姨即場包水餃, (請問之後想食, 可以點搵你哋?) 姨姨:「我唔係舖頭嚟, 平時都係屋企包家鄉水餃自己食, 都未試過包咁多隻」


(今日一口氣包幾多隻?) 姨姨:400! 我哋連皮都係自己搓」首次有機會食到河南水餃, 真的充滿誠意


純韮菜餃, 不占肉的家鄉水餃, 確實又有一番風味...阿太:「成口韮菜, 食落又真係幾苦」(!不過皮唔太厚, 偶然見識一下另類餃子食法, 都幾得意嘅!)


十日節的室內文化展覽, 還會繼續舉行至104. 不過「迎月月.大派對」就只有一晚...


今年是「十日節」第三年, 個仁強烈要求, 明年十日節嘉年華, 最少要舉行兩晚, 如果又撞正中秋佳節, 何不一連三晚, 等更多人感受一下又文代, 又藝術, 又浪漫的晚上.



【十日節 25/9 - 4/10

地點: 香港理工大學賽馬會創新樓


大仁生活facebook

沒有留言:

張貼留言