愈來愈對中秋節冷感, (鬼咩!份工又無假, 月餅又食到嫌), 不過, 囝問:「點解今年唔去影燈籠?」 (佢真係記得上年做過乜架喎...), 所以今日兩父子就去深水埗逛一逛.
深水埗的燈籠依然以吹氣卡通燈籠為主, 十年前, 這款刺耳音樂電燈籠出場後, 其實應該算是中秋意義的末落. (第二時發展到, 生日蛋糕應該都係插電蕊蠟燭)
絶對覺得卡通燈籠不環保, 因為每年也推出年度最紅的卡通人物, 去年是冰雪奇緣Frozen. Elsa, Anna, 及小白, 今年兩位公主隱約也見被藏於燈籠堆中, 但一定不是當眼處.
今年以為InsideOut會接力, 但也只有阿愁, 及阿怒零零星星的散落於舖頭門外...我望著$84的價錢牌, 店員A可能覺得今天生意差, 主動走來:「平啲畀你...$60蚊」
很有趣的是...去年我們清楚記得, 正版燈籠深水埗的協議定價$84, Jusco售$63.9, 店員A的報價絶對是根據對手來打喎.
八卦的我又試探軍情, 「如果一次過買6個有冇批發價?」, 店員A:「最少要買10個架, 半價...(即係$30蚊?), 咩呀!$84一半$42蚊」(好貴...)
今年沒有新款戰隊, 或幪面超人燈籠, 我以為可以順利離開深水埗, 誰知囝說:「不如買個米奇畀我?
(你鍾意米奇咩? 你上年隻金剛攞返出嚟玩米得囉),
都唔知去咗邊啦」
我覺得全港多數家庭都會保留去年的吹氣燈籠, 不過「左塞右塞」情況下,
365日之後根本也忘記「塞」進那裡...結果又要買個新...
妖怪手錶也是翻版, 所以只售$20, 我說:「平平地買地縛貓畀你喇...(我都唔鍾意咩手錶, 你先鍾意之麻, 買米奇畀我啦), 唔要慳返」
老仁家還是鍾情傳統紙紥竹篾燈籠, 這店門外列明古式小白兔燈籠的價錢, 嘩!41X50吋...真的大過部電視機喎...$2000半價都好鬼. (點解左睇右睇, 也總覺得這些小白兔不夠傳統呢?
可能這些是東門版本, 我們傳統見慣的白綠黃紅小白兔,
始終都要在深水埗碩果慬存的同安紙紮舖才能發現.
(點解得返一隻小白兔咋?) 老闆娘:「賣晒啦, 得返E隻細咋, 過兩日都中秋啦, 仲未買晒就慘喇」(咁又係)
老闆娘:「買楊桃啦, 玻璃紙仲難做架, (乜唔係小白兔難整咩?), 梗係玻璃紙最難, 真係黐到手指都痛架...」
今日, 我沒有買到燈籠, 因為買一樣玩具, 又沒有升值潛力, 又只可以玩一晚, 絶對不是收藏家所為...結果我用甚麼KO了不停說要買米奇燈籠的小朋友呢??
就是一套8包泰國開心樂園餐Lego,
哈哈!! 無緣無故竟然給我執到寶...囝:「爸爸! 點解香港都未見過嘅」(有得砌, 又唔係老翻, 梗係買返屋企砌拉)
8包超值價$169, 可以慢慢玩, 8款還可以大結合, 真的正過買燈籠多多聲, 忽然想起, 可以用Lego砌個小小燈籠, 應該更加正喎.
大仁生活facebook
沒有留言:
張貼留言