話說6月頭PR姐姐來電:「Luxe係iSquare開分店, 想請你哋去試食...」(Luxe未聽過, 上網搵搵...嘩!網民評價幾乎達「明將」級數, 只係差篇潮文咋)
之後「咁啱得咁橋」超愛食蠔的同事C對我說:「仁, iSquare有間任食蠔嘅自助餐, 超抵呀! $238咋, 不過無晒位, 要訂到6月尾」(同事C個肚唔知咩構造,
食Buffet可以隊50隻蠔, 嚇死人)
可能因為分店新開張太受歡迎, 結果試食活動由6月改到8月, 上星期我們懷著戰戰兢兢的心情一家三口去食Luxe.
甫一坐下, 阿太對我說:「咁多人食, 應該質素都唔會太差, 如果唔係都無人嚟啦」(咁又係...咁出去攞嘢食啦)
我總覺得有大廚「即直揮毫」一定最著數...這位師傅不單止要堅負切牛扒的使命, 更要炒奄列, 熟食師傅得他一人...辛苦死!!
師傅炒出來的奄列並不Hea炒, 蛋內仍會流汁, 半熟炒蛋是最好不過的選擇.
至於同事C及我最關心的生蠔問題呢??
嘩!好好好大隻呀! (係米我見識少, 隻蠔真係似大過我部Note)
這款日本蠔超大, 但又超鹹, 我問師傅:「係米啲鹽水洗唔乾淨呀?」師傅:「唔係呀!日本蠔係偏海水味, 不過食完會有鮮蠔味留係個口入面」(我就麻麻地)
師傅:「你可以試下美國蠔吖,
傳統得嚟又Creamy, 不過我就鍾意日本多啲」(嗱!終於似返D我平時食開嗰啲...)
(點解你哋唔一早攞美國蠔出嚟嘅, 日本嗰D鹹到死), 師傅:「其實我哋一日去貨幾千隻蠔, 所以一定唔會只入一個地方架,
兩種都成廿幾蚊一隻架」(老實講美國蠔好食好多)
記得網民曾批評這裡說:「蠔要問大廚先有, 其他嘢食攞完又唔添」, 今日則完全沒有這個情況出現, 壽司, 三文魚, 生蠔全部也補充得十分之高速.
鹹食的滷水鴨, 雞翼, 芝心丸其實也很不錯, 阿太說:「刺身只係得三文魚咋...」(其實, 今時今日$238, 可以係尖沙嘴食到Buffet,
而且食物質素都算合格,
夫復何求)
橙汁任飲, 朱古力小蛋糕任食, 阿囝吃了兩轉整個肚也突了出來...(一問之下, 原來婆婆怕他肚餓, 6點給了他一碗麵打底喎...蝕底了小朋友)
我最愛西焗布甸, 我個人清了半盤, 熱布甸我最愛加雪糕, 一凍一熱進食, 人間美食...(如果Luxe加設雪糕供應就真係畀多一個讚佢...)
綠茶慕絲都可以推介, 今晚我們掃了6杯.
第一次吃自助餐的阿囝, 一提起找他幫手拿食物,
相比叫他食還高興, 生果, 三文魚位置放得太高, 熱食的保溫蓋又太重, 所以只可以找他添橙汁,
夾蛋糕.
不過, 事後我問囝今晚自助餐最開心是甚麼, 他答:「"畢"豆腐花囉 (點解??),
"畢"得好玩, 你唔覺得咩?」(你都"畢"晒, 我都無得"畢", 梗係唔知啦...)
雖然今餐是免費, 但即使付款, 一家三口也是$675.4 (連加一), 這樣的價錢, 可以有16款鹹食, 10款甜品, 4款生果切粒...還有刺身, 生蠔, 壽司任飲任食, 尖沙嘴區絶對無得輸.
沒有留言:
張貼留言