【一日13個手作市集】堅持心中理想●第一屆手作設計展

相關網誌: 【週日熱烈逛】爆人氣港台手作嘉年華!!! 《重量級》 FUSION午後市集

哈!哈! 4日第二次專程又來闖九展...星期三剛玩完Hello Kitty, 今日再來逛「第一屆手作展」...(一入會場, 點解好似去咗海洋皇宮大酒樓咁?)

「嘩!加芬同小小超呀!! 原來係Lego嚟架!」, 「成幅都係Lego嚟架」, 以上是今日在Calvin的檔位, 聽得最多人講的話說.

Calvin創作Lego畫差不多一年, 最初創業因為想大家多點溝通:「E家係屋企, 大家顧住玩手機, 上網, 砌Lego真係一個幾好嘅家庭活動嚟」(係!SY最鍾意叫我同佢砌Lego)

交一張相給Calvin, 他就會幫你變成一粒粒的Lego:「客人收到後, 就可以同朋友, 或屋企人一齊砌...(你好鐘意砌Lego架?), 係呀!」

Calvin手持的是母親節作品, 我發現Lego畫不能太近欣賞, 因為遠一點看, 才會覺得似. (周潤發真係最似). Brick A Project

我的朋友仔阿Sing, 及Rice今日亦有擺檔. 而且我見阿Sing很努力在做微縮波鞋. (嘩!好鬼真呀!你做咗幾耐呀?)

女朋友Rice忍不住搭口:「做對鞋仔做咗成個月呀佢, (但係好靚喎!都唔合格?)」, Rice作狀搖搖頭:「阻慢晒我啲進度...」, 兩人又笑作一團, 非常羨煞旁人的一對小情人.

阿Sing最新研究的Air Jordon 1 OG Chicago...(點解兩隻都係左腳嘅?) 阿Sing:「我仲試緊, 因為想畀Figure著又得, 做匙扣又得囉」(係喎...你Starwars啲白兵都可以著喎)

而Rice同樣有新作品, 就是超精細的波波繡球花, 由無數花花皮革所造成, Rice:「算簡單, 都係用4-6個鐘就攪掂」(嘩!好花心機喎, 畀我一早放棄咗)

SIRIHOUSE

Carman 因為3年前學識用德國食用顏料畫碗碗碟碟:「當時沉迷得畫到一屋都係, 有朋友問, 點解唔買出去或者幫人畫賺吓外快呀?」, 於是Carman的手繪碟生涯就從此展開.

玫瑰花就是Carman的必煞技, (點解你會畫箭豬嘅?) 她說:「係一對新人要求, 我覺得靚又畫多一對, 但無問點解係箭豬喎」(可能一個叫箭箭, 一個叫豬豬掛)

原來, 近年興印BB腳仔在碟上, Carman:「我哋嚟緊有個工作坊,係7位媽媽帶埋BB嚟印腳呀!」(得意喎...不過我最記得當年6個月大的SY, 我帶佢去造3D手, 一印就喊, 嚇鬼死人)

Laphemster 手繪碟

Rex一向愛種植盆栽, 漸漸知道植物的習性, 於是一年前就嚐試自己組合小盤景. (易唔易種架? 我屋企連OK換醜比頭, 一條草都種唔出嘅, 都唔知做乜鬼)

專家聽後也笑一笑:「可能咁橋你攞咗啲死嘅種子啫, 我用嘅多肉植物好易種, 紅之玉, 鹿角, 到手香全部都係2星期淋一次水就得」

(可能我屋企長期拉埋廉, 無陽光呀!) Rex:「無陽光, 有足夠燈光都得架!」(燈都得?我以為只係光合作用, 原來燈合作用都攪得掂, 又幾好喎).

Rex安慰我:「通風就得架啦...好易種」(我懷疑我屋企風水唔好...乜都種唔出, 種生機可能就得)

森活製作室 WOOD3

中學時期的阿東, 因為視覺藝術堂的功課, 而有機會用鐵線, 接觸後自己貪得意扭來扭去, 發現竟然可以扭到機械人, 於是就慢慢愈扭愈精彩.

阿東:「暫時只有4款, 最難就係紅色E個機械人, (有雙炮架喎, 幾有氣勢, 扭咗幾多個鐘呀?), 6個鐘先完成到」

原來台灣一早有高人可以用鐵線扭變型金剛, 鐵血戰士...阿東:「暫時我又未考慮扭動漫人物...」(點解呀? 扭個小露寶畀我就好)

(其實你扭隻狗仔都幾得意吖) 阿東朋友阿昇:「係駱馬嚟架, (駱馬係咩?), 即係草泥馬」(乜真係有草泥馬? 我以為係粗口咋)

加油呀!阿東..我見你米奇老鼠都扭到...應該無其他角色難到你!!, 下次真的向你訂一個小露寶. 

Wire Operation

8年前在澳洲發現一本紙藝的書籍, 因而改變了Yuki的生命, 從此與紙藝變得不可分離...

(最困難的一款, 共做了幾多小時?) Yuki勾出喜悅的回憶:「做咗一個星期...(吓? 7日咁耐呀), 係一個十幾頁連盒嘅相簿嚟, 最大陣仗」

好有心的Yuki, 原來兩年前就構思出一本關於本地手作的書籍, 她說:「我經常叫朋友訂外國的手作雜誌, 但發現香港無, 所以半年前, 自己籌備, 自資出返一本」

不得不佩服Yuki對手作的愛, 因為整本手作書, 除了介紹不同創作人之外, 訪問也有7-8篇之多...今時今日, 單單今天就已經有15個市集, 看來Yuki的「手創」應該很快會出第二期喇

Yuki's Paperland

全場最有親情的一檔, 絶對賣香港舊情懷的小久工場...(最啱我老仁家想當年的集體回憶)

(你梗係讀設計, 你啲Post Card好靚, 開樽器都係), 阿皓:「我讀傳理系, 不過好鍾意從前香港的人同事, 唔捨得佢哋被人淘汰呀...好似E個紅綠燈燈箱, E家全港都係得返廿幾個咋」

(點解你咁細個, 咁有情懷?) 阿皓:「我睇返以前D資料, 同埋有部份都有接觸過...好似黑膠碟, 通渠牆...(米舖你都有見過?), 係呀!我屋企附近好彩都仲有一間」

我問阿皓:「你兩個同學仔真係好幫你手...」 阿皓:「唔係呀..我兩個妹妹嚟架」(單單睇兩位妹妹咁賣力Sell客, 就知平時你哋三兄妹, 感情一定好到不得了...羨慕死) 

小久工場

大仁生活facebook