精力旺盛的阿囝, 自從復活節跳完彈床後, 不停追問我:「幾時可以再跳呀?
我好想再去玩呀!!」終於, 今個暑假, 小朋友又可以大跳特跳啦!!
今次活動以「小小建築師」為題. 一走到商場大堂, 我就同阿囝講:「你睇...咁大個建築師阿Bob」(我以為佢記得細個睇過阿Bob),
誰知...
(跳晒舞)阿囝:「Ba-ba-ba-ba-ba-na-na...Bello,
(你做咩??), 阿Bob麻...壞蛋吖麻, 迷你兵團囉」(小朋友...失憶症又發作)
閒日過來玩最好, 即使最皇牌的工程師瀡滑梯, 最高峰也只是排隊兩輪.
($50, 可以玩4分鐘, 即大約不需等超過10分鐘, 而5點過後,
更加無人排隊, 暢通無阻添!!)
(聞說周末打了長長的蛇餅, 挖波波剷泥車, 小朋友足足要等2粒鐘先可以玩...好驚呀!!)
挖波波剷泥車同樣煞食, 排隊期間, 突然遇上小丑哥哥走過來,
心諗:「係米同排隊小朋友解悶, 扭波波呢?」
原來小丑哥哥是清潔大使, 四圍幫小朋友噴酒精消毒水...
小丑哥哥走後, 排隊的小朋友竟然主動跟阿囝傾計:「一陣你做一號,
我同細佬係二號, 三號, 我哋鬥多波, 好唔好? (阿囝又點頭喎)」
之後小朋友的弟弟發問:「哥哥, 我哋一陣要咁多波呀? 點攞呀?
(阿囝神氣地答:無得攞㗎, 我哋鬥多咋)」
我好奇問:「工作哥哥好似即刻會將剷到嘅波, 放返入波波池,
咁你哋點數呀?」(我好似攪到三個小朋友忽然失落答:「係喎...」...真係唔好意思)
(同樣$50, 可以玩4分鐘)
場內我覺得最過癮的, 一定是體感夾扭蛋機. 不過要玩, 就要在商場內消費滿$100,
便可以夾一次.
將手放在夾蛋機前的玻璃, 用「5」Five~控制鐵夾前後左右,
當你睇準目標, 就可以用「2」字「V」手勢, 控制落夾.
有禮卷, 有小禮物, 有飲品...今次我們抽中免費英文班試堂,
得物無所用. (屋企嚟要45分鐘...阿囝又點會肯玩到慶起, 即刻走去讀英文吖)
一提到「玩泥沙」阿囝就最渴求...(因為他有個潔癖爸, 一定唔會帶佢去沙灘囉),
這個名為地質公園的堆沙遊戲, 他足足玩了3次.
沙堆上有感應器, 及投影機, 小朋友隨意堆沙, 感應器掃描後,
會依照高低, 自動在沙堆上投射出聳山峻嶺, 及河流的地理地形圖...
阿囝說:「好似剃鬚, 你都幫手剃啦! (乜你連沙都識分男女咩?)一睇就知佢係男人啦...」(其實點分啫?? 又唔教我)
我專登用頭遮住投影機...阿囝說:「爸爸你個頭呀...遮晒啲鬚啦...快D攞開啦」(乜你當地質圖係剃鬚都有嘅?)
($40, 可以玩4分鐘)
大人除了可親子堆沙外, 亦可以走到「工程師瀡滑梯」後方,
一個用竹搭成的小小遊樂場
小小棚架, 帆布小滑梯, 大人就不可以參與, 工作人員:「大人太重啦...會冧架」
不過, 這裡有2個竹鞦韆, 奇怪的阿囝, 在平日樓下公園仔,
一定拒絕坐鞦韆, 但今日又對竹造的鞦韆, 非常主動出擊...(正啦, 連帶我都可以玩幾下)
($30, 可以玩4分鐘)
今日, 我最最最開心, 就是我也可以玩了兩次打椿大打鎚...這個遊戲限制只可以超過高度140C M的朋友參加...(哈哈!!我終於有機會發洩啦)
第一次玩, 不懂用力, 敲不到鐘, 有少少不甘心...
之後...只要我想到我工作, 想到我公司, 想到我老細...絶對有如骷髏頭堡賜我力量...三次敲中兩次.
(清脆的鐘聲, 簡直令仁振奮)
($20, 三次 ~ 140C M以上)
然後, 我不斷邀請阿囝玩水上飄...他也搖頭:「你次次都轉得好快,
我好想嘔..唔玩呀!!」
結果, 我答應今次全程「睡眠」, 只是小朋友自己轉, 我們就順利親子水上飄.
我簡直覺得之前種下的因, 今次收成正果. 被下命不準「郁動」的情況下,
我「瞓」足全程, 嘆盡3分鐘. (嘩!我從未如此碧波蕩漾享受過, 好似瞓水床一樣..正到爆!)
(水上飄 $80, 3分鐘)
(撐船仔 $50, 4分鐘)
想不到今次「小小建築師」, 大人可參與程度也非常高...下次有可能,
不如舉辦一個全大人的「主題樂園」啦!! 到時我一定瞓身支持呀!!
愉景新城「小小建築師」主題樂園
日期 2015年7月24日 (星期五)至8月16日 (星期日)
(共24天)
時間 上午11時正至晚上7時正
地點 愉景新城 (荃灣地鐵站A3出口)
費用 免費入場，每個遊戲票價由港幣10元正至80元正不等
對象年齡 3歲至12歲
沒有留言:
張貼留言