一別2年半的「望道號」, 又再回來香港探我們. 上次是上船見識「全球最大圖書船」, 今次似是老朋友聚舊...
登船費用不變, 大人仍舊捐款$10元便可, 小童及長者同樣免費, 真好. (這兩年, 我樓下快餐店, 一個雞髀飯也由$39, 加到$46啦)
登船後, 有一個簡介報導 「望道號」的情況, 不過好像沒有人有興趣收聽收睇...所以負責的Phoebe 也有點無奈.
來自馬來西亞的Phoebe, 因為大學期假, 所以就申請在「望道號」工作, 目請是第2個月, 「早前去菲律賓, 學到好多嘢, 今次嚟香港, 之後就返馬來西亞啦」
阿囝很奇怪為何有一堆小油筒, 後面還有一個大油筒...Phoebe解釋:「係幫 「望道號」籌集經費, 你可以用100 units 買小油筒, 又可以捐錢入大油筒」
遺傳了我八卦的阿囝, 探頭看看大油筒內的硬幣...不過他即時變臉大叫:「 好臭, 爸爸好臭」(唔係我臭, 係筒入面啲電油味臭咋)
當年的小小小朋友, 變成今日的小朋友, 高度及頑皮程度也直線上升. (好彩E家佢仲會聽我講...希望下次「望道號」嚟嗰陣,
阿囝唔會話:「我唔想跟你嚟呀」 就好)
因為「望道號」會環遊全世界,, 所以圖書室的數千本圖書,
全部一律以Units 做單位, 那就不用每個地區經常更改. 例如, 100 個Units 就等同HK$20.
可能今日是「望道號」開放的第一天, 人流超多, 我覺得有點似逛年宵, 阿太與阿囝玩玩填字遊戲, 揀揀貼紙, 之後阿囝說:「點解無中文書嘅?」
於是我們又專登左揀右揀, 原來中文書也有一少角,
但真的可能是藏書的百份之一...阿囝說:「真係得咁少少咋喎」(可能隻船好少去亞洲掛??)
原來除了「空肚唔好食早餐」, 我想「空肚都唔好逛望道號」,
點解我開始有少少搖搖晃晃, 暈暈地...阿太:「你係米無食嘢呀??我又...(話口未完)...係喎!真係有少少搖喎」
本來我們想買兩本書, 阿囝又想買貼紙, 但一見長長的人龍...我更加想暈, 我建議:「如果唔係必要, 不如唔好買啦, 我估起碼要排20分鐘隊...」
最後我們放棄了買書, 於是準備穿過「生命旅程展覽區」去Cafe補充體力...(阿囝唔駛扮人講電話啦,
我哋係晒你前面咋)
之後, 阿囝突然大叫:「呀!我幼稚園聽過E個故事...講個囝囝叫爸爸畀錢佢出去打工...(咁點解佢哋要攬住嘅)...好似囝囝返屋企, 佢掛住爸爸掛」(我無聽過E個故仔, 但我叫囝一齊扮, 佢話我條褲都無爛喎!!)
之後在模擬船艙, 有工作人員表演話劇, 最經典的「油漆未乾」故事, 所有小朋友都哈哈大笑...(原來船員的喜劇感, 一啲都不比詹Sir差喎)
阿囝問:「點解有個Stop呢?? (真係唔知...於是亂作...可能叫媽媽唔好玩咁多手機掛)...哦!」(佢真係信我講, 可能阿太真係玩緊電話)
推介大家食Cafe 的雙層朱古力芝士餅, 好好食...本來想買軟雪糕, 但怕阿囝食得「論盡」,
結果錯有錯著. (未肯定是否我極度肚餓,
總知就好食到停唔到口)
這個公仔牌與2年前的底色不同了, 而相中人亦變大了...不過, 始終不明白...當年阿囝對手為何已經有那麼長嗎??
Manna 本來於「忠僕號」工作, 「嗰隻船好古老, 佢仲大過鐵達尼號一年,
不過老紀太大, 2010年退役喇, 所以我哋先換咗「望道號」囉」
(2013我哋都有上「望道號」, 你係米度呀?) Manna說:「唔係呀, 2013年我係土耳其做地區工作, 我哋除咗船上工作, 都有到不同地區幫手嘅」
$5就可以捐贈一份文具給緬甸的小朋友, 笑容滿面的Manna指:「我哋離開香港, 就會去台中, 同馬來西亞後, 就會將文具送到緬甸嘅孤兒院」
(早知我係屋企, 攞埋阿囝之前玩遊戲贏返嚟D文具捐埋佢啦, 有好大袋呀!)
兩年前, 我們還可以走到船艙扮做船員,
又有不同國家的船員載歌載舞嘉年華, 不過今日全部節目也不作開放,
Manna解釋:「因為我哋尋晚10點幾先泊岸, 太趕未預備好, 所以你講嘅節目要下星期先有得睇...唔好意思」
下星期四, ( 8月6日) , 「望道號」有一個兒童環球活動, 大家記得臨離開前, 向工作人員索取免費門卷,
到時再次上船玩呀! (名額300人)
「望道號」由德國的非牟利慈善機構「好書共享」協會(GBA Ships)所營運，目的是把知識、幫助和盼望帶到不同的國家。
「望道號」於2015年7月26日 至8月9日 訪港並停泊於尖沙咀海運碼頭。
開放時間：
星期一至二下午2時至晚上9時半；
星期三至星期六上午10時至晚上9時半；
星期日下午1時至晚上9時半。
門票：港幣10元正
【12歲或以下的小童 (須由成人陪同參觀) 及65歲或以上的長者費用全免。】
沒有留言:
張貼留言