網頁

2015年7月15日 星期三

【10蚊可以做D乜?】書展原來可以咁樣行!! @2015

阿太知我帶囝去書展就問:「你都唔睇書, 去咩書展呀?」對! 我們上一次去書展是阿太「陀」住阿囝逛的首屆夜書展.


我答道:「我唔睇書啫, 可能阿囝想睇呢?」阿太回應:「吖!幾難喇」(真係知子莫若母啦...)


阿囝知道要去書展, 第一時間答:「我唔想去呀!(魚子醬都去喎...佢可以同你玩捉依欣喎)」之後才免為其難陪我去會展.

Minions襲書展, 無處不在, 一入大人區正門, 就已經有一堆迷你兵團, 圍住Minions圖書.

小朋友互不認識也可以議論紛紛:「同套戲一樣㗎喎!」, 「係呀!E本最新, 大嗰D係貼紙」, 「E本都唔夠新, 細E本得意D呀!」(氣氛從未如此和諧過...正呀!)

因為小朋友走了, 阿囝又說要走...於是我們直行, 忽然看到一位身穿十分搶眼, 鮮紅色晚裝的作家在整理書籍.

我八卦問:「你寫㗎?」作家答:「係呀, 我叫塵沙沙, 本漫畫係寫三代人~我爸爸, 我, 同堂妹結婚的喜恕哀樂」

 (你幾時結婚㗎?), 塵沙沙:「十年前...(吓?你個樣好後生呀咋喎??), 但故事一開始係𧪿2008年我陪堂妹去睇婚紗展被人呃嘅事...」

(我好Cheap)「請問你有冇網上版睇??」塵沙沙笑笑口:「我個FBpage有一期, 你可以E家隨便睇喎」(最衰我趕時間...我下次見到一定同你買一本...預祝漫畫大賣!!)

之後我們走過「東京堂」, 她們擺放了12箱過期日本雜誌, 售價$10, 女性時裝我沒有興趣, 但迪士尼, 超人, 戰隊...我後悔看中未有即時緊握實, 本來看中兩本, 最後只剩一本咋.

轉角的「自由人」, 大大隻字寫住$20一本旅遊書, 店員說:「只是面前的6本, 因為是2014年版」(原來旅遊書只有一年壽命?) 我想買本京阪神...但阿太電話傳話:「你唔去買嚟做咩?」

其後, 阿囝發現:「爸爸!..$10蚊咋...買唔買呀?」(唔買啦...我都唔識佢哋...我覺得韓星男男女女, 個個都一模一樣...因為我實在太孤陋寡聞喇)

經濟攤位的書籍, 最多贈品送, 美容書送護膚品, 煮食書送蠔油...真貼題.(如果電腦書送電腦就更加好啦!!)

行了大約15分鐘, 阿囝不停問:「魚子醬幾點嚟??」一問之下, 原來他們改了晚上才過來...於是我唯有帶囝去三樓兒童區解悶.

一到兒童區, 小朋友就被那吹氣吹波膠吸引住, 當年士多賣$2一小支吹波膠, 現在大支了3倍左右, 但售$35.

(咁貴...都係等店員陪你玩玩就算) , 即使「齋」玩, 每逢路過的小朋友, 個個也高高興興拍一兩下, 當然最瘋狂一定是囝, 十足蜜蜂見蜜糖一樣啦.

之後, 就是被阿囝譽為全場最好玩的玩具, 震震筆...(點解支筆會震呢??)

店員解釋:「主要訓練小朋友寫字的用力程度, 幫佢哋要揸穩支筆, 咁先唔會寫出界...」(阿囝:好攪笑..震震震...震震震咁, 好似有人「吱」我隻手咁)

再向前走...忽然阿囝一支箭衝上前去看書...吓??世界變啦...天下奇聞呀! (這亦是全日唯一一次, 囝的雙手雙眼, 正正經經與書接觸的機會)

(你睇咩呀?) 阿囝一邊笑咪咪一邊答我:「好笑!! 你睇呀..嘻嘻...講痾「懂」嘻嘻...佢痾唔出」(我家叫大便做痾「懂」..唔好意思)

他願意看書, 我也不理他, 想不到他連旁邊的書也看了一共5分鐘...也算一個不錯的紀錄喎, 雖然因為「屎尿屁」, 但好醜都叫做書啦!!

忽然我聽到有人大叫:「Wall.E 砌圖$10蚊!!」(十蚊咁抵...24塊咋??) 店員:「有104塊㗎, 最後幾十盒啦...因為Wall.E麻麻地受歡迎, 所以平啲賣囉」(真係超值...即買)

阿囝:「魚子醬唔嚟...咁你同我捉依欣啦!!」(吓??我最怕捉依欣...)幸好剛剛有一個棋藝店攤位...(哈哈!!有救喇...阿囝除咗捉依欣, 最愛就係捉棋.)

這攤位的Alvin哥哥非常有心, 一連跟阿囝捉兩款不同的棋, 而且(估計專登)刻意成為阿囝的手下敗將. 小朋友不知多高興...(哈哈...好似佢又忘記了捉依欣事件...正)

臨走前, 阿囝被魔術吸引過去, 變啤牌, 變骰仔, 刺穿銀紙, 變銀仔...睇完又睇, 目瞪口呆, 結果我們買了一款, 就可以8月免費上一節魔術課.

於是今晚, 阿囝變了街頭魔法王, 不停慢動作重複又重複「篤穿銀紙」...原來魔術拆穿了, 真的一點也不好玩, 還要一程地鐵睇足20次呢!!


沒有留言:

張貼留言