有幸於一月尾, 在油麻地聯豐藥房, 吃過宙師傅每日限造40底的冷糕, (老仁家最愛食老餅麻)…不過每晚18:45前一定賣清, 所以很難夾時間再食.
我問蔡老闆:「E...你哋有冷糕賣喎, 畀一底我吖?」老闆:「冷糕? 我叫佢做糖心餅, 好呀!等三分鐘有得食 (你哋賣咗好耐架喇?), 啱啱咋喎...三日」(吓??又會新成咁??)
原來蔡老闆經營夜冷店, 哥哥本來就在北角賣雞蛋仔,
大蔡生強調:「不過我唔係北角雞蛋仔呀!
我無咁叻」, 因為租用別人店外一角位置,
不幸被加租, 於是便唯被迫放棄.
大蔡生本來想於九龍城重操故業, 可惜有一飯店向他索價1.5萬, 大蔡生:「佢間舖都係幾萬蚊租,
我要佢門口細細個角位, 我開9千佢都唔肯, 咁米算囉」
(嘩!萬5蚊租, 即係每日要賣50底, 每個鐘要賣7底先打個和…難怪雞蛋仔舖一般都有十個爐一齊做, 唔辛苦真係賺唔到世間錢喎!)
說時遲那時快, 我們的冷糕就已經完成,
我遞給SY, 小朋友即時大叫:「好熱...好熱...好熱」, 於是又放低十秒才開始進食.
其實, 傳統冷糕~(我都係睇網上資料)~內裡部份有海綿蛋糕的厚度, 油麻地宙師傅的已經變得較薄,
而今日九龍城的更加更加薄.
我問 :「咁得意嘅, 你哋有三部機, 一部雞蛋仔, 一部冷糕, 中間嗰部做咩? 」蔡老闆 :「薄啲嘅糖心餅, (本來嗰件都算薄架喎), 因為有啲人唔鍾意食咁厚,
你要唔要試吓? 一樣都係十蚊 (好呀! 試埋囉)」
於是我又問老闆, 你哋過去個三日, 賣幾多件呀? 老闆:「我哋每日做三壺蛋漿出嚟,
用晒就唔再賣架啦」
(你哋知唔知冷糕唔易搵, 油麻地宙叔每日只賣個半鐘) 老闆:「我知, 佢下晝先開一陣咋麻, 不過我無食過.」其時, 「薄餅」登場, 我們吃了兩口, 老闆就問我口味如何...
有蛋香, 但如果可以濃一點, 冷糕感覺會更出, 當然如果糕身可以厚一點, 更符合當年的口感, 油麻地宙叔會用砂糖, 芝麻和花生粒「活埋」冷糕, 但蔡老闆則略嫌放得太少餡料.
個人比較, 今日厚身的一款比較好吃,
至於薄身的第二款, 我情願去吃班戟, 因為太薄, 感覺已經不再是冷糕, 如果當班戟, 我又嫌底部太滑, 不夠軟, 有點假…
無論如何, 兩位老闆誠意可加, 起碼又會問我意見, 希望夜冷店賣冷糕可以為他們殺出一條血路吧!!
沒有留言:
張貼留言