朋友O知道我去元朗華嫂食午餐,
建議:「有間係華嫂附近嘅小店仲正,
仲隱世, 仲好食, 朋友話好似係華嫂爸爸開...叫【和記】」, 嘩!聽完賣點, 如果不去真的對不起自己.
第一次去和記, 九龍仁不懂路, 於是走到塘坊村輕鐵站下車, 沿「屏竹里」直行落樓梯, 剛巧遇到一位村民, 我便老實不客氣的上前打聽和記的地址...
村民爪爪頭:「和記??未聽過喎...食菠蘿包架?華嫂呀?(唔係...好似話係佢親戚開嘅), 哦!間野無名架麻, 直行轉右再轉左就係, 唔係你提起都唔知佢叫和記」(嘩!我以為隱世得連村民都唔知添)
於是我們跟指示向前行, 幸好前面又有一對情侶同樣去和記覓食, 如是者齊齊轉來轉去至一窄巷, 終於到達門前寫著「宏英閣」的「和記」. (普通人一定唔識搵~)
此時為中午12時, 心裡暗喜:「好彩趕得切佢哋12點半前中場休息啫」, 誰知當時大門鐵閘關上, 坐無虛席…
女店員大叫:「上晝我們關門啦, 無位啦!! (吓! 我哋搭咗成個鐘頭車嚟架...) 唔好意思..你哋下次嚟, 我請你食嘢補數」
就在我們極度失望的情況下, 阿囝細聲說:「我想去洗手間...」, 我不好意思, 再走上前問:「可唔可以借洗手間用下呢?」, 其時有客人結帳, 醒目的阿太即說:「如果E家有位, 可唔可以賣埋畀我哋呀?」
女店員:「好啦, 不過今日無晒粉麵架啦, 三文治, 菠蘿包好唔好?」(有得食, 乜都好, 你話乜就食乜啦, 最緊要有得食…)
終於今餐全部由女店員慈嫂發板. (仲正!! 諗都唔駛我諗…其實今日極之幸運, 因為本來同行的情侶得知無位,
即時離去, 只有我們懶死唔走, 竟然又奇蹟地有得食…)
我的肚皮很敏感, 每次食到稍微放上涼了小小時間的碎蛋沙律, 很快便要找洗手間, 這裡的蛋沙律超新鮮, 配上甜甜的蕃茄, 愈食愈覺得相逢恨晚.
其實, 我不是太好鹹牛肉, 不過我愛不老不火的煎蛋, 兩者結合為一, 直情加分加至連鹹牛肉也變得好好味.
即叫即煮的菠蘿包, 絕對是今日的皇牌. 包身, 煎蛋全部熱辣辣, 令至鮮牛油一上枱已經流口水,
黃白黃紅的顏色組合, 超級搶眼, 未食我已經不停「吞口水」.
我將菠蘿包一分為二, 太陽蛋內的蛋黃配合牛油緩緩流出, 興奮程度拍得住恒指直逼3萬. (好食到無得輸, 如果唔係人哋休息, 我想再叫多一份獨食)
女店員兌現承諾, 為SY送上兩隻雞翼, 我說:「咁客氣, 你都畀我哋入咗嚟, 唔駛送啦!」(她笑笑口:「我頭先應承咗小朋友麻,
無所謂啦, 大家開心」)
我們進食其間, 「摸門釘」客人不絕, 店員逐一致歉:「唔好意思, 我們關咗啦...唔介意2點半再嚟過啦」, (每日都好多人無得食架?),
「無辦法, 我哋人少, 做唔切, 上晝啲料清晒, 一定要關門去買材料, 下晝先有嘢煮, 同埋我哋都要食飯呢!!」
(你哋係米多數做村民生意呀?) 慈嫂:「本來係...不過最近唔知點解好多人嚟食, 其實我哋好低調, 夠做就得, 都唔知啲人, 好似你哋咁, 點會識得搵到嚟...」(好嘢點都收唔埋嘅…我諗)
慈嫂怕羞不願合照, (其實你哋同華嫂係米親戚呢?),
一邊執枱的慈嫂:「都係...(好似話係爸爸??), 係咁上下啦...
(話題被扯開…)下次嚟食我哋個蕃茄湯粉啦...包小朋友實鐘意」(一定, 一定! 我一定好快再嚟, 因為我要「噅」妳同我合照麻)
沒有留言:
張貼留言