「星馬烈, 星馬豪, 我細嗰都有部麥林, 我以為同卡通片一樣係聲控, 點知我係瀡滑梯放部麥林落去,
鬼有聲控咩, 散晒!!」以上是我的年輕同事, 講他的四驅車故事.
TVB 1991年播四驅小子, 四驅兄弟則1997年播出, 我完全答不上嘴, 因為我「摱車邊」最後睇無綫卡通片, 是1990年的聖鬥士星矢.(我唔敢出聲, 因為我正正就係佢哋所形容嘅老餅啦)
今日帶囝去黃埔, 因為復活節有砌車工作坊,
從未玩過四驅車的SY, 今日首次自己砌部四驅車來玩.
(我都好想砌, 不過中途我就要返工, 全程交托阿太接手...)
阿太:「佢點會識砌呀? 更加唔好指意我呀」我話:「放心啦!有專人導師教砌架」
現場SY不停拉住導師:「點解有兩個A5嘅?」導師:「係呀!左右轆麻」(中途竟然見到《愛‧回家~樓上友》變身導師教小朋友, 一問之下, 原來成個活動係佢攪架喎...不過Sorry, 我唔記得佢真名)
時間差不多, 我要先離開, 我跟SY說:「拜拜」, 平常他一定會不捨得我, 今日變得例外, 專心砌車, 頭也不抬一下, 冷淡一句:「拜拜爸爸」(呀...模型仲緊要過我呀???)
30分鐘後, 我就收到阿太電話:「我諗我要食多幾粒Panadol先得... 導師唔係成日可以教架, 啲零件細細粒, 真係砌到我頭都痛」(我不知幾想砌, 人人放假, 我就返工先真係頭痛)
海軍鬥水兵, 結果人人砌完去放車, 一老一嫩仍然進退兩難, 阿太:「好彩後尾兩個導師一齊嚟幫手,
我真係貼紙都唔知點黐...」(我無諗過砌得完都係一個神蹟嚟!)
SY睇完老師砌好他的熊貓車後, 就放在小朋友賽道玩車, 阿太:「好攪笑, 有位叔叔部車跑晒三個圈, SY部車都未行到一個圈, 後尾工作人員話佢部車改到好勁, 梗係快啦…」
專業級選手帶同的工具箱, 如同空姐篋大細, 應該屬於競賽級層次, 可能投資分分鐘5位數字也未定呀!!
我問:「點解佢唔去大人賽道呀?」阿太:「佢話唔想排隊, 嗰度不知幾多人呀, 嚇鬼死」 我看相片, 嘩!150米長超刺激賽道, 輪侯蛇餅足足圍住幾個鐵欄轉轉轉...真可怕.
不過, 我其實都想知道, 阿囝砌出來的熊貓四驅車能否跳過青馬大橋的「地獄跳台」, 宣傳影到好好玩, 衝衝衝…單單現場看人玩都好刺激, 難怪我的同事, 個個一講起四驅車, 眼神就發光, 似十足上身一樣.
SY怕人多, 所以沒有玩, 我以為他不愛四驅車, 誰知他拿著熊貓車, 一回家便第一時間在走廊瘋狂放車, 跑來跑去...我突然想起自己小朋友年代.
(當年我又真係成日係走廊玩, 不過有樓上樓下鄰居陪, 今時今日阿囝連一個鄰居小朋友也不認識, 望到E張相, 忽然覺得囝好孤獨!! 點解E家我哋好似無鄰離鄰舍咁嘅呢?)
沒有留言:
張貼留言