網頁

2015年2月17日 星期二

【最後衝刺】行維園花市 就知你幾歲 ? @ 羊光燦爛的483

星期日, 相約朋友, 兩個家庭齊齊逛維園年宵, 一個令仁又愛又恨的地方(原來今年有483個攤檔咁多)


中學時代, 愈年輕就會揀, 愈接近年初一的時辰進入維園, 通常年宵會與午夜場同夜進行, 漸漸連電影都少有, 午夜場為何物, 當下很多年輕人應該聽都未聽過...


出來工作後, 行年宵已經會是年廿七, 廿八晚上, 因為又想有人流, 又怕太熱鬧.


到結婚生囝後, 行維園最好就揀開始的第一, 二日, 還要中午時份, 愈少人愈好, (費事同人迫餐死啦!! 人貼人行的情景, 真係諗起都驚...)


今年行花墟及維園, 我發現每一個攤檔, 也踴躍商惜產品給我們拍照, 個個又肯合照, 情況及氣氛比往年好得多. (其實我認我cheap, 影咗當買咗囉!!)


茶餐廳的三文治咕臣加毛布, 是我全場覺得算有創意的, 不過, 對不起, 我不知道原來是分體的, 掉了一片麵包落地下. (Sorry整污糟咗少少呀!!)  


阿實阿太最最最想去100毛見阿BU, (不過姨姨去到又唔敢合照喎, 可能係少婦矜持掛)


不過, 當日下午4點半「羊傲暉」己經售罄, 我問女店員原因, 她答:「可能佢真人靚仔啦!!


話時話100毛的女Sale真的全場最搶眼, 又識逗小朋友. 即是說主腦三子就冧中女, 男店員就Mark實少女, 美少女們就對付我這類阿叔及小朋友. 即全港男女殺晒~ 抵你發!! 


最吸引阿囝的是理大學生的文具咕臣, 老實說, 那支$198的中華牌鉛筆真的夠過癮. 像真度又夠高, 可惜我們的床已經一早被公仔佔領了1/3的位置, 再沒有辦法容納如此巨型的東西.


行行走走, 阿囝突然大叫:我哋個朱古力呀!! 我聽得一頭霧水, 原來他意思是聖誕我們買的My Wally朱古力. 我真的完全忘記了這位卡通人物. 於是給$10拍一張家庭照.($10影張相, 要影幾多先可以交到場租呀??)


暫時食字食得最好, 我見到的就是「夕羊無限好」, 最初我認不出是Emoji, 我還以為是串燒三兄弟. 我對檔主說:「乜唔係串串魚蛋?


場內有一間地產公司無端端放了一個太鼓出來, 新年當然敲敲鼓, 送舊迎新, 希望馬年衰運全部敲得走, 羊年多些好事來. SY不知敲得多投入, 直情當成個人演奏會一樣.


很奇怪, 場內有兩檔「厚多士」, 但其中與SY合照的多士姐, 卻說是全場獨家, 不過論吸引程度, 多士姐以紙袋當Cosplay一定羸晒!! CUTE到震呀!多士姐好野.


可樂一樣滿場撞貨, 不過超巨型大可樂就不是檔檔有. (大佬$688一個3呎大咕臣, 香港地有幾可會有咁大地方擺)


催淚彈打火機賣$99, 我跟SY:928日爸爸就係被佢乸到眼都睜唔開, 不停喊」


阿囝好大聲指住大大支催淚彈:「好驚呀!! 嘖出嚟啦唔好買啦, 咁驚仲要買?


我解釋這個是仿制品, 假嘅, 係肇筒扮成的, SY:「哦! 咁你唔買?(貴吖麻!阿囝)


最後見到一檔是賣正方卡通咕臣, 又有小丸子, 花輪, 毛毛, 大眼仔, 壞蛋, 檔主話:「估唔到反應好好, 2款忍者亂太郎差唔到無貨啦!!!」點解忍者亂太郎最太熱呢? 我也不知道原來亂太郎的人氣如此頂盛.


旺角花墟有維他奶機, 維園有檸檬茶毛巾機, SY當場不會錯過任何可以玩得的東西, 放銀入內, 機器後面就會人拗出維他毛巾.


這款大大毛巾, 不同檔主報價, 就有不同價錢, 一位說$128, 另一位則賣$168, 以一條普通毛巾來說, 真的算貴呀!! (不過, 唔買佢哋都無黑面, 仲人人有興趣都可以入銀玩一次, 難為了扮汽水機的同學啦)


羊年年宵又逛完, 今年臨入場前灑了兩小時的毛毛細雨, 幸好我們到達維園後, 天公造美又放晴, 看來今年我應該也有運行吧!! (明年猴年, 唔知點食字法最啱呢?  使立消潤猴糖??)






沒有留言:

張貼留言