初戀鴨腿粗麵啖啖情 @ 波記燒臘粉

阿太找來波記燒鴨麵的相片我看, 腦海即時回帶至小學時期, 每星期日跟爸媽到屋企隔離酒樓, 例牌必點「鴨腿湯麵」的回憶. 今日齊齊去西環皇后大道西「回味」.

第一次來波記, 甫一抵達, 即時有少少想「走」的感覺, 因為光看外表, 很怕這些燒臘店, 一定滿載舉指粗魯, 又愛呼喝客人的「老屁屁」.

阿太問:「咁走唔走呀? 」九龍仁西環路不熟, SY又話:「吓? 我有啲肚餓...」, 於是少少失落的等了五分鐘就到我們入坐. 

童年時覺得「鴨腿湯麵」是人間極品, 由小六開始, 每星期日食一碗, 一直至中三, 中四, 食到當時的待應叔叔也不用問我, 就自動端來一碗最多肥美的鴨腿給我.

阿囝說要食:「叉燒粉」我好想感染一下囝囝說:「爸爸細細個就食鴨腿粗麵, 你不如都要一碗啦」, 誰知他回答:「我鍾意叉燒多啲, 無骨好食啲喎爸爸」

時為下午1時, 我問老闆娘吳太 (我最初以為是女店員, 原來有眼不識泰山):「仲有無燒肉?」吳太答:「燒鵝剩返一碗, 燒肉一開門就賣晒, 每日都有人排隊等開門買燒肉架」

SY的叉燒河粉上枱時, 吳太靜靜對我說:「賣剩兩舊燒肉, 你唔介意畀埋你」, 嘩!! 實在太美妙的事情,  吳太像似拯救跌了出巢的小雞一樣, 人間有情, 感動的免費雙併. 

個人愛燒肉多於叉燒, 單單看波記的5層肥瘦相間燒腩肉, 未食已經興奮, 而且我覺得波記的燒肉, 較太子的永合隆更出色, 起碼入味又不鹹, 又脆又和味.

同一時間, 我的初戀鴨腿粗麵來了, 阿太問我:「點解唔要瀨粉?」很簡單, 因為我專一吧!!(嘻~), 十二歲第一次食就是鴨腿配粗麵, 正如我覺得兒童節目要由譚玉英主持, 沒有了譚玉英不如不看.

跟太太談初戀, 除非她是你的初戀, 不過, 我今日可以跟我的另一半大談我的初戀鴨腿麵.

三十年後這碗麵的味道竟然更勝當年, 這簡直如今天的萬綺雯, 較1990年《藍月亮》中的「姚慧芝」更索一樣. 

老闆娘見我們左影右影, 竟然像媽媽般溫柔的問:「駛唔駛畀多一碗湯你, 我見啲粉索晒..」, 從前老師教我看人不是單憑外表, 入舖前我還抗拒進入, 真的大錯特錯.

充滿光澤的鴨皮, 相隔一呎也聞得誘仁的鴨香, 入味的鴨肉, 救命的肉汁, 啖啖肉好食到有點想搬來西環居住。而最最最特別, 吃罷波記的鴨腿粗麵, 竟然一點也不吃喝, 我又發現多一間真正沒有味精的真心食肆!!

幸運的我童年是吃燒鴨麵長大, 原來波記的燒鵝每日只限賣8隻, 我讚揚波記令我重拾初戀, 師傅「大舊」舉起勝利手勢道謝, 並叫:「下次再嚟呀!!」 一定會, 因為波記是我食過最有情的初戀燒臘店呀!


味道: ★★★★★
環境: ★★★
服務: ★★★★★
抵食: ★★★★
推介度: ★★★★★



地址 : 西環皇后大道西425號P舖地下

大仁生活facebook